السلام عليكم ورحمه الله وبركاته
ازيكم يا فتوكات يااارب تكونو كلكم بخير
عايزه احكيلكم على حاجه بس معلش استحملو رغى
انا مليش غيركم وخايفه اسال ماما او حماتى اعشمهم على الفاضى
المهم يا جماعه انا كنت متابعه التبويض الشهر ده واخدت الكلوميد وبعدين حقنه تفجيريه يوم 5 اكتوبر
وبعدين مثبت من يوم 10 اكتوبر ليوم 20
والدكتور قالى لو البيرويد اتاخد لغايه يوم 23 الى هو النهارده اعملى اختبار منزلى ( دا اليوم ال18 من الحقنه )
المهم فعلا لغايه دلوقت ماجتش وياااااارب ما تيجى خالص
فقولت لجوزى بالليل يجيبلى اختبار منزلى علشان اعمله الصبح
وفعلا جابه بس الصيدلى اداله النوع الى هو ب2.5 ده وهو طبعا ما يعرفش حاجه عن المواضيع دى واول مره يشتريه فاخده وخلاص
بس نوع حقير حتت ورقه رفعيه مش عارفالها وش من ضهر
توكلت على الله وقولت نجرب بس ماكنتش حاطه امل كبير لانى قريت هنا كتير ان فى بنات عملته وما بينش رغم انهم حوامل
المهم صحيت اصلى الفجر وقولت اعمله قبل الصلاه وفعلا عملته وسبته
ورحت صليت وجوزى خرج يصلى وبعد ما جه دخلت اشوفه لقيت خط واحد
ومش احمر اوى حاجه كده لونها فاتح بس باينه وكمان مش خط خط دا كانه نقطه كده عريضه
فقولت خلاص وانا ما كنتش واثقه فيه وخلاص جوزى اخده يرميه فى الزباله قولتله لاء خليه
وبعدين نمنا شويه وجوزى شغله بدرى فبيصحى من الساعه 6
لقيته بيصحينى بيقولى شوفى كده دا فى خط تانى
هو فعلا ظهر خط تانى رفيع اوى وخفيف بس باين
فالسؤال بقى ده حمل ولا لاء؟؟
السؤال الاهم انا برضه لسه شاكه ومش متاكده اعمل ايه اعمل تحليل دم؟؟
ولا انا كده كده رايحه للدكتور بكره ان شاء الله فاستنى يمكن يعرف بالسونار المهبلى ؟
قولولى الله يخليكم اعمل تحليل الدم ولا مالوش داعى والدكتور هيعرف لو فى حاجه
ادعولى بالله عليكم يكون حمل
وربنا يجازيكم كل خير ويرزق كل مشتاقه عاجلاا غير اجلا يااااااااااااااااااااارب
معلش طولت عليكم استحملونى
فيونكه بمبه فيونكه بمبه 432454_6.gif فتكات رائعة Fatakat 432454 الاسكندرية – مصر