ازيكم يا احلى فتوكات واحلى ستات وبنات
النهاردة جبتلكم طريقتى ف عمايل الارز بالخلطة
انا بصراحة اول مرة ف حياتى اعمله
وحقولكو ع الطريقة والمقادير
احنا حنجيب الاول مقلاية ونحط فيها شوية زيت
وبعدين نحمص المكسرات اللى عندى
ممكن يبقى لوز او سودانى
انا عن نفسى مكنش عندى لوز فعملت بالسودانى
بس اعتقد الطعم حيبقى احلى باللوز
وبعدين اطلع المكسرات واحط مكان الزيت الزبيب واحمصه
واشيل الزبيب واحط ف نفس المقلاية ونفس الزيت الكبد والقوانص
لحد ما تبدأ تدخل ف السوا بعدين ابدا اضيف
عليها البصلة و كام فص توم كده
واسيبها لحد ما تستوى واركنها ع جنب
حجيب حلة واحط فيها معلقتين كبار سكر وعليهم معلقة ميه
واحولهم لكراميل واكون محضره ميه بتغلى (دى كميه الميه اللى حتشربى الارز بيها حسب كمية الارز اللى عاملاها)
واضيف الميه المغليه دى فوق الكراميل وخلى بالك وانتى بتضيفى
عشان بتعمل فوران بسيط
فى حلة تانية حبشر بصلة صغيرة واشوحها وانزل بالارز المغسول فوقها
واقلبه تقليبتين كده وبعدين انزل بالحلة اللى فيها الكراميل و الميه المغليه
واسيب الارز لحد مايتشرب ويستوى عادى جدا
وبعدين اقدم الارز وفوقه الكبد والقوانص وعليهم المكسرات بالطريقة اللى انتى تحبيها
مننساش : نبقى ننقع الزبيب ف ميه قبل ما نحمصه
واسيبكم بقى مع الصور
وفى النهاية يارب تكون طريقتى عجبتكم واتمنى تجربوها
بس ياريت متنسونيش بدعائكم
مواضيع هذا القسم برعاية
سانديرو سانديرو 434667_7.gif فتكات متميزة Fatakat 434667 قلب زوجى – ام الدنيا