صباح القشطة يا أحلى فتوكات
كذا موضوع أشوفه هنا على فتكات عن عمل اللانشون فى البيت وأدخل ألاقى بيض وجبنة ولون أحمر وخلاص
قولت امال بتوع اللانشون بيشتغلونا ويقولو لحم بقرى ولا ايه ؟؟
كنت عاوزة وصفة فيها لحمة وفراخ علشان أحس انى عملت لانشون بجد وفى البيت أضمن من الجاهز
المهم فى البداية بشكر الجميلة سيدة اكتوبر على موضوعها اللى اخدته وحاولت بيه وعملتها اول مرة باللحمة البقرى ونجحت نجاح باهر
والنهاردة جاية اوريكم التطبيق بالصور وتكات من عندى أنا كمان وعملتها المرة دى بفراخ مفرومة … ونبدأ بسم الله
المقادير أهى فى صورة جماعيه أثناء الحفلة
3 بيضات
نص كوب كبير نشا
لحمة مفرومة او مفروم فراخ .. المرة دى أنا عملتها بالفراخ زى ما قولت لكم دة نص كيلو اخدت حوالى تلت الطبق
نص كوب كيير زيت
3 جبنه مثلثات أو جبنة شرائح بتاعت البرجر ودى اللى كانت موجودة عندى واستخدمتها بالفعل
مكعب مرقة دجاج .. هرب من الصورة الندل
ملح .. فلفل اسود مجروش خشن .. ورق لورا . فصين حبهان .. معلقتين سماق .. معلقة صغيرة توابل شوربة … حبة بنجر صغيرة .. بصله صغيرة .. فصين توم مهروس
الطريقة :
شايفين الكوباية اللى فيها لون أحمر ورا دى ؟؟ دى خلاصة النكهات والألوان اللى فى الموضوع كله
زى ما تقولى كدة ( مكسبات طعم ولون صناعية )
هتجيبى البصلة وحبة البنجر وتقطعيهم
نحطها فى حلة صغيرة أو كنكة عميقة وعليهم كوباية مية ونضيف التوم وباقى التوابل كلها ماعدا الفلفل الإسود ،، ونسيبهم على النار يغلو لغاية ما يتركزو شوية
أسيبهم يبردو وبعدين اصفيهم من قطعة شاش نضيفة .. بقى عندى كوباية لون وطعم مركز وطبيعى تماما … لا دم غزال ولا أوان غذائية ولا حاجة
بعد كدة بجيب الكبة بتاعتى .. وأحط فيها اللحمة ، الجبنة ، مكعب مرقة الدجاج بس يكون مفروك كويس ، وأحط معاهم البيض واحدة واحدة
شايفين مكعب مرقة الدجاج الندل رجع تانى أهو
كدة أنا لسه محطيتش البيض .. بضيف واحدة وأشغل الكبة دقيقة وأطفى .. وبعدين اضيف التانية واشغل وبعدين التالته
هنجيب بقى اللون المركز دة ونضيف عليه نص كوباية النشا وندوبهم مع بعض كويس قوى علشان النشا ميعملش أى كلاكيع
شايفين اللون بقى وردى ازاى ..؟؟ معلش الصورة مهزوزة علشان بصور وأنا بشتغل .. وبنتى كانت تحت رجلى وبتفضى كل اللى فى ترابيزة المطبخ ع الأرض
بعد كدة هننتقل للخلاط .. عاوزين نحط السوائل الأول علشان تسهل الموضوع شوية
نحط الزيت وكوباية النشا الدايب فى اللون والنكهات
ونضيف عليهم خليط اللحم والبيض والجبنة اللى كانو فى الكبة ونضيف كمان معلقة ملح صغيرة مليانة ومعلقة صغيرة فلفل اسود مجروش
ونضربهم ضرب مبرح ونكون صبورين شوية .. هنلاقى خليط متجانس وقوامه شبه عجينة الكيك كدة
المهم رجعته لطبق عميق وجهزت الحاجات اللى هسويه فيها
أنا كان عندى طقم توابل ستانلس ستيل للأسف مش لاقية منه غير أكبر وأصغر علبة … الكبيرة واسعه قوى والصغيرة كنت فاكراها هتكفى بس اتفاجئت للأسف .. واضطريت أحط شوية فى كوباية من بتوع جبنة بريزيدن وخليت الاتنين مش مليانين قوى .. يعنى لازم تسيبى شوية فراغ
وممكن تعمليها فى علبة سمن اللى هى كيلو … بتدهنيها زيت وترشى دقيق وتنفضى الدقيق الزايد منها وبعدين تضيفى الخليط بتاع اللانشون
وبعد كدة غطيت الاتنين بورق فويل ولفيتهم كويس قوى علشان مفيش حاجة تخرج ولا تدخل للعلبة أو الكوباية .. بالشكل دة
بعد كدة المفروض هنسويها فى حمام مائى .. جيبت حلة عميقة ومليتها مية وحطيت فيها العلبة والكوباية
وسيبتها تغلى … وبعدها هديت النار وقفلت الحلة كويس قوى .. وسيبتها لمدة ساعه كانت كافية تماما للتسوية بصو لما خرجت كانت منفوخة وقطعت الورق الفويل كمان ازاى
ودة المنظر بعد ما شيلت الورق
ومقدرتش استنى لغاية ما تبرد شوية وأطلعها تتقطع زى الناس العاقلين ما بيعملو
حبيت أطمن على الطعم روحت خدت حته من غير ماحد ياخد باله
وطلعتها شوية وسيبته تبرد على لوحة التقطيع وبعدين قطعتها شرايح بقى
طبعا هو طلع فاتح شوية مش احمر خالص زى اللانشون الجاهز .. بس عموما دى نقطة ممكن نتحكم فيها لو زودنا البنجر والسماق شوية
أو ممكن نخليه كدة واللون مش فارق معانا فى حاجة
وكمان حاجة ظريفة قوى حصلت معايا .. بعد ما خلطت كل حاجة وصبيتهم فى العلبة … افتكرت انى محطيتش ولا فتفوته ملح فى الموضوع دة كله
روحت زى الشاطرة مرجعه كل حاجة للطبق تانى وضيفت الملح وقلبت وبعدين رجعتها للعلبة تانى
أدى جزاة اللى تشتغل وتصور .. وتخلف نسانيس
المهم يارب يكون عجبكم ياحلوين وعاوزة التقييم بقى والردود تنزل عليا من حيث لا أدرى
الموضوع بقالى يومين تلاته بصور وأنقل الصور وسربت لكم البنت وباباها علشان أعرف أكتبه
وكمان دعوة صادقة من القلب ان ربنا يهدينى وأسرتى ويجعلنا من عباده الصالحين المصلحين ويجعلنى فى خدمة عباده
وتصبحو على كل خير ياحلوين .. فاضل خمس دقايق يادوب على أذان الفجر
سلامو عليكووووووووووووووو
مواضيع هذا القسم برعاية
ثومه حمدى ثومه حمدى 276742_1.gif فتكات ست الكل Fatakat 276742 حائل – السعودية – مصر