السلام عليكن ورحمه الله وبركاته
اخواتى الفتوكات العسيلات
عاملين ايه
اولا ربنا يتمم حملنا على خير ويرزق كل مشتاقه بالذريه الصالحه
ويارب يا حنان يا منان ترزق اختى حبيبتى رانيا بالذريه الصالحه عاجلا غير اجل
ماتقولى امين بقى يا حوبى انتى وهيا
انا والحمد لله وبفضل الله حامل ف اول التالت يعنى مش اوله اوله والله ما انا عارفه كله بيحسب بشكل مختلف هاهاهاههااااااااااا
المهم بما انه اول بيبى فطبعا بحب ابحث واعرف وانا بدور عجبتنى معلومات لحوامل الشهر التالت
قولت كلا وبتا البتا احرم حبيباتى ف الله منها
هنتابع وان شاء الله ربنا يتمم حملنا على خير
ويرزقنا بالطفل السليم المعافى بدون زياده ولا نقصان
رغايه انا خلاص هدخل ف الموضوع اهون
اول حاجه ايه هيا التطورات اللى بتحصل للجنين ف الشهر التالت ؟
قولى سبحان الله
فى نهايه الشهر التالت بيكون الجنين اكتمل نموه من حيث التشكل والمفروض انه يبدأ يحرك ايديه ورجليه وراسه
وكمان يقدر يفتح يقه ويقفله بس مش بيقدر على المص بس يقدر يبلع
وبيبلع شويه من السائل الامونسى اللى بيكون حواليه لحد يوم ولادته
وعشان هوا حبيبى صغير جدا متقدريش تحسى بالحركه دى وكمان المكان الموجود فيه بيكون ضيق عشان كدا حركته محدوده
وصوابع ايديه ورجليه بتكون اتكونت بدقه كامله وساعتها بتتكون اظافر رقيقه
وايد الجنين بتكون اكتر تطور من رجليه
وراسه بتكون اكبر من باقى اجزاء الجسم
وهيكون ف شعر غطى الرأس عند الجنين
وبتتشكل طلائع الاسنان
وعنيه بتبدأ تتحرك بعد ما كانت كل عين بعيده عن التانيه بيقربو عشان ياخدو وضعهم الطبيعى
والجفون بتغطى العين ف الوقت دا
بس العين بتفضل مغمضه لحد نهايه الشهر السادس
وبرضه الاحباال الصوتيه بتكتمل بس طبعا ميقدرش يطلع صوته لانه معندهوش هوا
وكان الحبل السرى بيكتمل مع بدايه الاسبوع 13 من الحمل
والقلب بيعمل بسرعه كبيره ما بين 120 و 160 دقه ف الدقيقه
والكليتين بكونو اكتملوو وكمان بيبدأ باخراج البول ناحيه المثانه
وف الشهر دا رأتيه بيكونو اكتملوو ويقدر يتنفس ولكن مفيش هواء وانما السائل الامونسى بيدخل ويخرج من الرئه
ودا بيساعد على تكوينهم بشكل كامل
والحمد لله ان السائل مش بيخنق الطفل
لانه بيقدر ياخد الاوكسجين من الحبل السرى
وامعاء جنينك بتكون اتكون ف نهايه التالت بس بتكون خارج بطن الجننين وبتكون تابعه للحبل السرى لان بطن حبيبك مش بتكون قادره تشيل كل الامعاء الدقيقه وبترجع بطنه بعد كدا
قد ايه بيكون حجم الجنين ف الفتره دى؟
بيكون حجمه فى نهايه الشهر التالت حوالى 10 سم ووزنه اكتر من 30 جرام بحجات بسيطه
ايه بقى التغيرات اللى بتحصلنا احنا كأمهات ف الشهر التالت؟
اعراض الشهرين الاوليين هتستمر طبعا مش كل واحده زى التانيه وربنا يعافينا كلنا
الاورده ممكن تظهر واضحه على البطن والثديين والرجلين
ف اخر الشهر البطن بتبدى تكبر وممكن تبان عليكى وتبقى كروشه حلوه
ممكن ودا طبيعى ان شهيتك تتفتح بس حاسبى على دراع الراجل مش ناقصين
طبعا المزاج شغال حبه كدا وحبه كدا
لدرجه ان جوزك ممكن يقول عليكى ساعه تروح وساعه تيجى هاهاهاهااااااااا
بس مع نهايه الرابع خلاص الواحده ان شاء الله بتبدأ تطمئن لان تقريبا الخطر يعتبر بيزول وربنا يعافينا كلنا
بصى حبيبتى هوا كدا وبس
انا صراحه تعبت جدا ف كتابه الموضوع
لانى مخدهوش كوبى باست
لا انا قلايت ف كذا حته وطلعت بالمعلومات دى
وكتبتها لحد ما صوابعى ورمت
وبحذر بقى ملاقيش تشجيع والله ازعل
وانتو عارفين الزعل وحش على الحامل وذنبى بقى هاهاهها
مش طاله منك غير دعوه حلوه كدا
ربنا يهديلى جوزى حبيبى ويتمم حملى على خير
ويرزق اختى حبيبتى رانيا ذريه صالحه معفاه
ولو قيمتى دا تقدير منك
وهستنى رددكوو بقى وكمان اللى عندها معلومه تفيدنا يبقى كتر الف خيرها
وربنا يكرمنا كلناااااااااااااااا
وسلام بقى يا حلوه انتى وهيا نتقابل ف الردود
malak_bare2 malak_bare2 352094_3.gif فتكات رائعة Fatakat 352094 كنت ف رفح سينا وحاليا المعادى بين هنا وهناك – مصر