مشكلتي مش صعبه لكن تعباني
انا مش جبانه في المواجهه بالعكس بعرف اتكلم
لكن لما تبقى المواجهه صريحه ومليش في التحوير
جوايا مشاعر للناس سلبيه وايجابيه وللأسف مبخرجهاش
سواء كانوا اهلى او اصحابي او ناس معرفهمش
في ناس بحبهم وبتمنالهم الخير حتى لو معرفهمش او مفيش بيننا كلام
ومبيبقاش في فرصه أقولهم مشاعري اتجاههم وده بيضايقني
ومشاعر سلبيه قديمه من ناس سواء بعيده او قريبه بتتقلب عليا كل فتره
لكن مبقدرش اواجههم اني بجد تعبت نفسيا بسببهم
القريب بيبقى عارف اذاني ازاي وممكن كمان يستعبط اما اللى مش عارف فمش ذنبه
ممكن ميتخيلش اصلا وصلت بسببه لايه
وممكن ابقى بحبه وبخاف عليه واتمناله الخير بس اللى عمله معايا قفلني من نحيته
ويخليني اتراجع عن اى مشاعر ايجابيه ممكن اعترفله بيها لكن ببقى ناويه اساعده لو احتاجني
والخبرات السلبيه اللى عديت بيها لسه اثرها جوايا وبفتكرها وبعيط وبكره نفسي جدا ساعتها
ومفيش مجال ولا ينفع اني اتكلم فيها مع اى حد حتى اللى يعرفها
وبفتكر كل الاحاسيس بتفاصيلها الحلو ه او الوحشه وبزعل
ولما بشوف حد بيتألم قدامي او شكله فرحان بس اللى جواه غير كده
بتعب جدا .. بحس بإحساس اللى قدامي بطريقه سلبيه
بحس ان المشاعر بتسيب اصحابها وتتجمع جوايا
مبيعديش عليا الموقف اللى يخليني اطلع مشاعري بالكلام او الفعل
يمكن لان الشخص بعيد او يمكن لانه عيب او مينفعش
ومبحبش ابدا اني اسبب اذى نفسي لحد او اضايقه بكلمه سهل جدا اقولها
وفي الاخر كل ده بيطلع عليا انا
مشاعري كلها مكبوته جوايا وتعباني ومتلخبطه
وخايفه توقفني مكاني او ترجعني ورا
طب ممكن اعمل ايه ايجابي اتفادى بيه الشعور ده
انا كنت الاول بكتب وبطلع طاقتي السلبيه في الكتابه وكنت بلاقي تشجيع
لكن مريت بظروف خليتني ضعيفه فيها ومبقتش زي الاول
انا بعيده عن الناس الكويسه والوحشه
ومعنديش لا رغبه في الكتابه ولا حتى رغبة في الكلام مع الناس او مع نفسي حتى
بس محدش يقولي قولي للناس مشاعرك اتجاههم لانها كلها حجات خلاص عدى وقتهاا
وجوايا انا بس ومتفرقش مع غيري
انا بحب السكوت والتأمل وكلامي قليل وكمان علاقاتي وغالبا مرتاحه كده
والناس من وانا صغيره حبتني كده
لكن بتعب لما بحس اني مجبوره ع الوضع ده او بفتكر الحاجه اللى وصلتي لكده
انا خايفه اعيش حياتي كده في صمت واموت وكل الاحاسيس تموت معايا
من غير ما حد يعرفها او يفتكرها
ومحدش يفتكرني و يدعيلي ..
أنا من كتر ما بخبي بخجل من نفسي !
معلش صدعتكوا
Ramo_Ar Ramo_Ar 1185232_1.gif فتكات متميزة Fatakat 1185232 دمياط – مصر