السلام عليكم ورحمه الله وبركاته
ازيكم يابنات اخباركو ايه يارب تكونو بخير
كل سنه وانتو طيبين وكل ام طيبه يارب
وطبعا بشكر حبيبتى PrincessRosha على تعبها ومجهودها معانا ربنا يجازيها خير يارب
دى بعض الاكلات البسيطه الى عملتها يارب تعجبكو
بسم الله نبدأ
دى صوره مجمعه لكل الاكلات
هنبدأ اول حاجه طريقه عمل الكشك
المقادير
2 كوب شربه ويفضل شربه دسمه
ربع كوب رز مغسول
2 علبه زبادى
معلقتين دقيق
ملح وفلفل اسود
بصله كبيره مفرومه
توم مفروم
الطريقه
اول حاجه هنخلط الدقيق مع الزبادى ونحطه ف مكان دافى نص ساعه عشان يتخمر ويتفاعل مع بعضه
بعد كده هنحضر الشربه ونغليها وننزل عليها بالرزوالملح والفلفل ونقلب ونسيبه يستوى ع نار هاديه لو احتاج شربه طبعا هنزود اول مايستوى هننزل عليه بخليط الزبادى والدقيق ونقلب اول مايغلى نطفى ع طول اخر حاجه هنعملها التقليه
هنجيب معلقه سمن وننزل عليها بالبصل المفروم لحد مايتحمر وبعد كده التوم تقلبتين ونطفى ونحط نص كميه البصل مع الكشك ونقلب والنص التانى نخليه جارنش للوش
تانى اكله الملوخيه
طبعا طريقتها سهله جدا والكل عارفها
المقادير
كيس ملوخيه مجمده او ملوخيه فريش
كوب شربه قابل للزياده
سمن – معلقه كسبره ناشفه – توم مفروم –معلقه سكر
هنحط الشربه تغلى وننزل عليها بالملوخيه مع معلقه سكر وفص توم مفروم ونقلب لو حتاجت شربه ضيفى بمجرد ماتغلى من الجناب نطفى عليها مانخلهاش تفور ونسيبها ماتغطيهاش عشان ماتسقطش
هنعمل التقليه
معلقه السمن والتوم والكسبره وسنه ملح لحد التوم مايتحمر وننزل بيه ع الملوخيه
تالت اكله تارت البطاطس
المقادير
كيلو بطاطس
2 جزره
2 فلفل رومى او الوان
بصله متوسطه
زبده
جبن كوبيات او جبنه نستو
ملح – فلفل – كمون – كارى
الطريقه
هنسلق البطاطس والجزر ونهرسهم ونحط عليهم الجبنه والتوابل ومكعب زبده ونقلب كويس ونفردها ف قالب اى شكل يكون مفرود فيه كيس بلاستك نفرد طبقه بطاطس ثم الحشوه ثم باقى البطاطس ونسكنها كويس ف القالب ونقلبها ف صينيه مدهونه ونحطها ف الفرن تتشمع وبعدين نرش بقسماط مطحون ع الوش ونشغل الشوايه عشان تاخد لون حلو
الحشوه عباره عن
مكعب زبده ونشوح فيه البصل الجوانح والفلفل الالوان ونحط ملح وفلفل وكارى
رابع اكله ودى الطبق الرئيسى بتاعنا
المقادير
كيلوبانيه مفروم
2 فلفل الوان او رومى جوانح
بصله جوانح
بيضه
نص كوب بقسماط
توم وبصل بودر
جنزبيل بودر
ملح وفلفل اسود
زبده
معلقتين دقيق
كوب لبن
الطريقه
هنفرم الفراخ ونتبلها بالملح والفلفل والبيضه والبقسماط والجنزبيل والتوم والبصل البودر ونجيب ورقه فويل نفردها وندهنها زيت ونفرد عليها الفراخ ونحشيها بالبصل والفلفل الالوان بعد ماندبلهم ف معلقه زبده ع النار
ونبدأ نلف الفراخ رول ونغلفها كويس ونحطها ف صينيه فيها كوب مايه وع الفرن بتاخد حوالى ساعه
بعد السوا شلت الفويل من عليها واخدت باقى الزبده الى فاضت من تشويح البصل والفلفل وحطيتها ع الوش ودخلتها تحت الشوايه وبعد كده حطيت عليها الصوص الابيض
طريقه الصوص
معلقتين زبده وعليهم معلقتين دقيق اول مايصفر انزل بكوبايه اللبن الساقع وملح وفلفل ومكعب مرق اول مايغلى اطفى عليه مانخلهوش يتقل اوى احنا مش عايزين بشمل
معلقتين كبار كارى
2 كوب رز
ملح
هنحمر الكارى ف ماده دهنيه وننزل عليه بالرز يسخن انزل بالمايه المغليه اول مايتشرب اهدى عليه لحد السوا
هنحضر سيرفيس كبير ونفرد فيه الرز وعليه الرول وع الوش هنوزع الصوص الابيض
مواضيع هذا القسم برعاية
ساجدة غفران ساجدة غفران 257302_19.gif شيف فتكات Fatakat 257302 القاهره _ الحلميه الجديده – مصر