انا بكتب الكشري المصري مخصوص للى كانت بتسأل على طريقته وهى طريقة سهلة وسريعة وهكتب الطريقة على طول والمكونات باينة فيها
1- حمري 2 بصلة مقطعة جوانح رفيعة ورشي عليها رشة دقيق بسيطة فزيت غزير جدا لاننا هنستعمل الزيت ده بعد كده ولما لونها يتحمر كلها شيليها من الزيت وصفيها على طبق
2- هاتي كوب عدس بني واسلقيهم مع شوية ملح ونص معلقة ثوم مفروم ومايه كتير عشان هنستعمل الماية دي في الرز بعده ما العدس يستوي بس ما تيهريهوش سيبيه محتفظ بقوامه صفيه بالمصفا واحتفظي بالماية بتاعته زي ما قلتلك.
3- هاتي معلقتين من الزيت اللى حمرتي فيه البصل وحطيهم في حلة واعملي رز بالشيعرية وطبعا اكيد عارفة طريقته بس بدل ما بتحطي ماية عادية لمقدار الارز بتاعك حطي ماية العدس اللى استوى فيها العدس .
4- اسلقي كيس مكرونة يكون عقل صغيرة جدا (مرمرية)وضيفي ليه حبة مكرونة اسباكيتي وصفيه وبعد ما تصفيها رجعيها الحلة وضيفي ليها معلقتين من الزيت اللى حمرنا فيه البصل الاول.
5- كده يكون الكشري خلص بس اهم من الكشري نفسه هى الصلصة او الدوقة بتاعة الكشري ودي سهلة جدا .
طريقة الصلصة :
حمري معلقتين ثوم فمعلقتين من الزيت اللى حمرنا فيه البصل لحد ما يصبح لون الثوم وردي وبعدين حطي معلقتين صلصة كبيرة وضيفي ملح وكمون وشطة حمرا وسيبيهم يغلوا ويتقلوا وبعدين ضيفي ليها معلقتين خل صغيرين وطفي عليها
طريقة الصلصة البيضا:
حطي معلقة ثوم كبيرة فطبق عميق وحطي عليه معلقة كمون ومعلقة كسبرة ناشفة مطحونة ومعلقة كبيرة خل واغلي كوب ماء وضيفيه عليهم وقلبيهم كويس وبس
طريقة الغرف :
– هاتي طبق غويط وابدأي بغرف الارز وبعدين حطي فوقيه المكرونة وبعدين معلقتين كبيرة من العدس وبعدين البصل المحمر وبعدين قليل من الحمص الشامي المسلوق او المعلب فوق الوش للتزيين
– ضيفي اليه الصلصة او اغرفيها بطبق جمب طبق الكشري المصري واعملى نوعين الصلصة مش نوع واحد
انا عارفة ان الكشري المصري طويل شوية بس بصراحة فالاخر بيستاهل العناء بتاعة وبالهنا والشفا
ما تحرمونيش بقا من ردكوا مواضيع هذا القسم برعاية
سمورة حلوة وامورة سمورة حلوة وامورة 120317_4.gif فتكات ست الكل Fatakat 120317 الاحساء سابقا والرياض حاليا – السعودية