السلام عليكم ورحمه الله وبركاته
ازيكم يابنات يارب تكونو بخير
موضوع اليوم عن حاجه كلنا بنزهق من عمايلها وخصوصا الناس الجديده في المطبخ والعرايس والناس اللي عندها ريا وسكينه قصدي بنات زي حالاتي
نبدا بسم الله
المقادير حسب الكميه اللي هتعمليها وبصراحه انا ماما علمتني اعمل كل حاجه بالنظر وسبحان الله بتطلع مضبوطه ازاي معرفش
كرنبه وياريت متنقيش اللي ورقها مكبوس خبطي عليها كدا من برة لازم تسمعي صدى الصوت انا عن نفسي مبعرفش اعمل الخطوة دي بس الراجل بتاع الكرنب بيشكر فيها فباخدها وخلاص
بصل
طماطم
خضرة محشي
كيلو رز اقل حاجه
فص ماجي
اولا نفرم البصل في الكبه
نحمر البصل في معلقه سمنه كبيرة لحد مايصفر مش يتحرق ياناس البصل ميتحرقش ابدا على النار حتى في رز السمك لانه غلط جدااااااا
نضرب الطماطم في الخلاط ونحطها على البصله ومعاهم فص الماجي ونتسيبهم يتسبكو
نحط التوابل بتاعتنا وهيا ملح وكمون وفلفل اسمر
نغسل الخضرة ونقطعها رفيعه جدا
نحطها في مصفى عشان تنشف من الميه
لم الطماطم تتسبك والخضرة تنشف من ميتها نغسل الرز ونخلط كله مع بعضه
كدا خلصنا الرز نسيبه على جمب ونمسك الكرنبه نقطعها على شكل مربع من فوق بس منوصلش بالسكينه للاخلا يادوب نفكها من بعضها
اول طبقه من الورق الاخضر دا بيترمي لانه بيبقى متوسخ جدا وناشف في الاكل
ناخد الطبقه التانيه نفرش بيها الصينيه او الحله اللي هنعمل فيها المحشي
باقي الورق هنفصله على بعض وناخد واحده واحده نقطعها بالشكل دا
الجزء اللي على اليمين وعلى الشمال هو اللي بيتحشي والجزء اللي في النص في ناس بتحب تقطعه وتخلله بيبقى حلو
نغلي ميه على النار ونسلق فيها الورق اللي قطعناه
انتبهي لدرجه السلق اوعي يتهري منك يادوب يتسلق بحيث تعرفي تلفيه لانه بيكمل سوا على النار
ولم يتسلق تطلعيه يتصفى على مصفى
متحطيش الورق كله مرة واحده لا شويه بشويه وتطلعي على المصفى لحد ماتخلصي الكرنبه كلها هيطلع عندك ورق كبير تعملي فيه ايه بقى
تبدئي تقسميه على مرحلتين
اول مرحله تاخدي الورقه لو كبيرة اوي تقسميها على تلاته او تقسميها على اتنين حسب حجم الصوباع
تاني مرحله بتاخدي الورق الاخضر تحطيه فوق بعضه والورق اللابيض فوق بعضة وهكذا
كدا انتي جهزتي كل حاجه تاخدي المحشي بتاعك في صنيه وتفرشي حاجه كبيرة في الارض وتقعدي تعيشي حياتك اوعي تعمليه وانتي واقفه مش ناقصين زهق وقرف وياريت يكونو الكتاكيت الصغيرين نايمين ابقي اعمليه الفجر ولا هما اصلا بيبقو صاحيين الفجر
يتتتتتتتتتتتتتتتتتتتتتتتتتتتتتتتتتتتتبع مواضيع هذا القسم برعاية
لتين_89 لتين_89 فتكات هايلة Fatakat 1113670 اسكندريه – مصر