مساء الورد علي أجمل فتوكات في الدنيا
عارفين يا بنات أحلي طبخ طبخ بالليل يااااااااه بيبقي ليه متعة عجيبة كدة
كنت جعانة و مافيش أكل في البيت أنهاردة ماما عامله بط و دي أكتر أكله ماليش فيها في الدنيا من شوية جوعت و طلعت الحمام من الفريزر
والله يابنات طعمة حلو اوووي دة غير ان الريحة بقت في العمارة كلها مش الشقة بس , بس ما تقلقوش ماولعتش في حاجة
أنا عملت حمامتين بس علي قد بطني بقي ندخل علي المقادير
المقادير:
حبايه طماطم واحدة وسط + بصلة واحدة وسط + تلات فصوص ثوم + حبايتين فلفل رومي وسط + ورقتين لورا + رشه بسيطة قرنفل مطحون + عود قرفة + ربع معلقة صغيرة كاري + رشة خفيفة ريحان ( المقادير دي لعمل حمامتين بس لو هانزود الحمام هانزود المقادير ) + حمام متنظف و مغسول + ملح حسب رغبتكم بتحبوه حادق أو مظبوط
ندخل علي الطريقة :
هانغسل الحمام كويس و نسيبه يتصفي من الميا بتاعته
بعد كدة هانجيب الطماطم والفلفل و البصل و التوم و هانقطعهم حلقات و هانحطهم في الحلة و هانحط عليهم تلات كوبايات ميا و هانحط البهارات بتاعتنا و نحط الحلة علي النار
هنا سر الطعم يابنات ماتحطيش الحمام في الحلة أول ماتغلي الميا لأ سيبي لحد ما تتفضل نص كمية الميا اللي أحنا حطيناها في الحلة بالظبط و أنا دة قصدي بحيث إن الحمام يتسلق في الميا اللي تكون شاربة طعم الحاجة دي كلها أو بمعني تاني أننا نسلق الحمام في الميا دي بعد ما تبقي مركزة شربت طعم الفلفل والبصل و الطماطم والبهارات بتاعتنا , علي فكرة الريحان و الكاري بيدوا طعم روعة في اللحوم
بعد مانحط الحمام عشان يتسلق نسلقه علي نار هادية عشان مايستويش بسرعة و يلحق يشرب طعم الحاجة و نقلبه كل شوية علي كل الجوانب
قبل ما الحمام يستوي نضيف الملح عليه ونقلب و بعد مايستوي نطلعه من الشوربة و نحمره في الفرن نفتح عليه الشواية بس و نحط حتة زبدة من فوق الوش
أنا كنت مولعة فحمة علي النار و لما الحمام أتحمر حطيت الفحمة في نص الصينية و حطيت حتة زبدة عليها و غطيتها بسرعه , الطريقة التقليدية عشان ناخد طعم المشوي من غير ما نشوي
أنا كنت عاملة رز أبيض بس بطريقة ماما بحط الميا في الحلة تغلي و بحط مكعب مرقة دجاج و لما تغلي الميا بحط حتة زبدة و ملح و لما تغلي بحط الرز عليها
و كنت عاملة خيار مخلل قطعته و حطيته في الطبق
والله يابنات الطعم أكتر من رااااائع جربوها و هاتدعولي أنا بعمل الفراخ بنفس الطريقة كمان بس بزيادة المقادير و مش بحط ميا كتير للفراخ و بسويها علي نار هادية في ميتها و ميه الحاجات دي أنا أصلآ مابحبش الحاجة المسلوقة
جربوها يابنات و هاتدعولي والله هاتعجبكم أوي و عملت معاهم عصير رمان بس حطيت عليه فيمتو وهوا بيضرب في الخلاط كان طعمة جناااااان
كل سنة و أنتم طيبين يابنات العيد قرب أسيبكم مع الصور
أدعولي ربنا يجمعني بجوزي قبل العيد
اللهم أجمعني بزوجي عاجلآ غير آجل يارب مواضيع هذا القسم برعاية
Noodee 55 Noodee 55 651146_7.gif فتكات هايلة Fatakat 651146 الكويت – الكويت