السلام عليكم ورحمة الله وبركاته ..
مساء / صباح الخير ..
كيف حالكم يا فتوكات إن شاء الله بخير حبايبي ..
طبعاً أختكم في الله عمرها ماحملت ولا عندها خبرة في الحاجات دي ..
بعد أيام التبويض تقريباً اليوم السادس عشر من الدورة نزل لي نقط دم غامقة مرررة صغيرة و قليلة يمكن 6 أو 5 نقاط .. ( أنا باحسب أيام التبويض ببرنامج )
ماحطيت في بالي قلت يمكن من تعزيل البيت و شيل التقيل ..
جيت أمس واليوم حاسة بصداع خفيف ( رغم الحمدلله أنا عمري ما أصدع ) و دحين ماسكني جامد .. و مغص في بطني و ألم في ضهري على غير العادة موعد دورتي كان فاضله 11 يوم .. وأحسها كأنها حتنزل خلاص
إللي مستغربته إنو بدري على ألامها العادة قبلها ب3 أيام تبدأ الأوجاع مو أكتر ..
المهم مالكم في الطويلة أنا كمان لاحظت نفسي أكلي كتران و بأجوع كتيييير 
يعني عادتي فاليوم وجبتين و أكلي عصافيري لكن دي ال3 أيام تقريبا مفجوعة كده وأصحى فنص الليل من الجووووع
المهم يا حضرات أنا شكيت في نفسي و من غير أي تفكير رحت عملت تحليل بول الساعة 11 الليل اليوم ..
صحيح أتهورت بس صراحة خفت لأني بأتعالج حالياً من إلتهاب فالأوعية الدموية رغم إن الدكتور قالي الأدوية ماتأثر إن شاء الله لو حصل حمل بس أنا برضو خفت ..
المهم يا بنات عملته و سبته جنب البانيو كده على ماتطلع النتيجة و النتيجة طلعت في دقيقتين خط أحمر غامق و الخط التاني وردي لكن وااااضح .. جريت لزوجي قلت له إنت شايفه قالي إيوة واضح .. وفررررح جداً
وفرحت لكن قررت أعمل تحليل دم بكرة إن شاء الله ..
وبعد ساعة شيكت لقيت الخط زي ماهو خفيف لكن واضح
ودحين الساعة 2 رحت أشوفو لقيتو باااااااااااااااااااهت لدرجة مهو واضح أبداً
أنا موعد دورتي القادمة 21/12/2016
يعني فاضلها من إسبوع لـ8 أيام
أنا عارفة إنو بدري حللت بس إيش تفسير التحليل إللي عملتو ؟!
هل ممكن يكون خربان ؟!
وشكراً مقدماً للي حيردوا و ياريت تدعوا لي لو ربنا كتب لي حمل يكون معافى سليم من الأمراض ومايتأثر بالأدوية إللي بآخدها
( إللي حتقولي طيب ليه ما نتبهتي إنك ماتحملي فدي الفترة حأقولها أنا مشيت على الأيام النضيفة إللي الدكتور تبعي قالي مايسير فيها حمل لكن على الجهاز بتاعي البرنامج كان يقولي إنها ضمن أيام التبويض حقتي فأنا مشيت على كلام الدكتور .. و انتبهت إنو الأيام دي فقط اليومين إللي قبل البيريود و اليومين إللي بعدها لكن لو حصل حمل فده أمر الله )
Rawan.Morya Rawan.Morya 763237_9.gif فتكات هايلة Fatakat 763237 Jeddah – K.S.A
سبحان الله و بحمده