السلام عليكم ورحمة الله وبركاته
فى حاجات كتير بتحصل وبتتكرر معانا فى المطبخ ومبنعرفش نحلها
أنا انهارده هقولكم على حل كام حاجه يارب حد يستفيد منها ويدعيلى
1- إذا زادت الدهون او السمن فى الطبيخ بنستنى لما التسبيكه تستوى هيطلع كل الدهون الزايده على الوش
ننقلها من على النار ولما تهدى برغيف فينو او عيش عادى بس الفينو أفضل وتمسحى وش التسبيكه
هتلاقى كل الدهون الزايده اتمصها العيش
2- إذا زاد الملح قشرى بطاطسايه او إتنين وقطعيهم مكعبات كبيره واديهم غلوتين فى الأكل أو لو لسه بدرى على الغدا اطفى وسيبيهم المهم متشيلهومش خليهم واتجنبيهم عند الغرف وخلاص وبإذن الله مش هتلاقى اى أثر للمولوحه
3- لو شاط منك أكل سواء رز أو محشى بسرعه املى حله كبيره مايه ونزلى فيها حلة الأكل وإكشفى الغطا ومتغطيش
لحد ما البخار كله يخرج وإذا قدرتى تغيرى الحله بعد كدا افضل اما بالنسبه للتسبيكات فبتعملى نفس حوار المايه بس لازم تغيرى الحله ومتحاوليش تقلبى بالمعلقه صبى التسبيكه على طول
4- لو زادت منك البهارات للشوربه يعنى وانتى بتضيفى البهارات او الفلفل الإسود غصب عنك نزل كميه
متكبيش المرقه لا إبعديها عن النار دقيقه وهاتى حله تانيه وخرجى فيها الفراخ أو اللحمه وبعدين صفى بالراحه المرقه عليهم هتلاقى كل التوابل الزايده مرسبه فى ارضية الحله القديمه ارميها
5- الكوسه عشان تبقى طعمه وتاخد من نكهة التسبيه واللحمه صفرى التوم مع البصل متحمرهمش وخلى التسبيكه تستوى على الأخر ونزلى الكوسه تاخد حوالى 10 دقايق فى الصلصه على نار هاديه وانتى بتلاحظيهم وبعدين تضيفى الشوربه واللحمه المستويه وياريت تعمليها بدرى وتسيبيها تبرد وساعة الغدا تسخنيها تبقى اروع
6- الباميه عشان تبقى واو متنسيش حاجتين اولا تسلقيها نص سلقه فى مايه قبل ما تطبخيها حتى لو مجمده
ثانيا افرمى قرن فلفل أحمر مع فصين توم وضيفيهم للباميه اول ما تنزليها التسبيكه وسيبيها بدو لما تبرد وابقى سخنيها
7 -الفلفل الأحمر متستهونيش بيه كل ما تلاقيه اشترى وحطى فى الفريزر زى ماهو قرون كدا رهيب فى الأكل ومفيد جدا وبيظبط الصلصه لو فاتحه لما يتضرب مع الطماطم فى الخلاط
8- الفراخ عشان تبقى مستويه وناعمه ومش متفله إعمليلها التوابل والبصل المبشور ولفى الفراخ بيهم وحطيها فى الحله وغطى عليها على نار هاديه هتنزل مايه سيبيها تستوى فيها ومتعليش النار وكل فتره قلبيها ولما تستوى الوراك خرجيها وسيبى الصدور بعدها 10 دقايق لو إحتاجت مايه متكتريش لحد ما تستوى الصدور خرجيها وابقى زودى على الباقى عشان تعملى شوبه
9-الكفته اللى بالرز اللى بنعملها بالصلصه عشان تبقى واو ظبطى مقاديرك كوبايتين رز بس لكيلو اللحمه المفرومه ومتزوديش خضره ومتحطيش كسبره بقدونس بس
10- الرز باللبن عشان يظبط معاكى من غير حركات كتير ظبطى مقاديرك يعنى كل كيلو لبن ياخد كوباية رز تغسليها كويس وتصفيها وتسلقيها فى مايه لحد ما تستوى كويس جدا وميكنش فيها مايه ضيفى اللبن والسكر والفانليا وسيبيهم يلفو مع بعض كويس مع التقليب لحد ما يبقى كريمى وتقيل زى ما يكون حاطه عليه نشا بالظبط اطفى وإغرفى وبالهنا والشفا
11- الرز العادى عشان يظبط معاكى ويبقى مفلفل ولا طرى ولا ناشف حاجتين مهمين اعمليه بسمن وزيت على بعض وخلى المايه تغلى قبل ما تصبيها عليه وخلى لكل كوباية رز كوباية مايه ولما تقلبيه متقلبيش بمعلقه صغيه لا بمعلقة الغررف وإغرفى من تحت وإقلبيها فى مكانها على وشها
بالنسبه للمحشى فى ناس بيشتكو من محشى الفلفل والبتنجان والكوسع بيبقى مش مستوى قوى من بره ومن جوده وبشدوممكن يقطم
الحل بإذن الله فى حاجتين اولا متملش الفلفله او البتنجنه او الكوسايه تلت ارباعها بس ومتضغطيش الرز جواها علشان يستوى براحته
ثانيا بقى وهى حركه بسيطه بس بتفرق مراحل فى المحشى
جهزى طاسه كبيره او صنيه وحطى فها شوية زيت وشوحى فيها المحشى بعد ما تحشه وقبل ما تسوه فاهمين
وبعدين ترصيه كويس واقف جنب بعضه فى الحله ومتخليش الشوربه تغطيه
لإنه بيكون خد جزء من سواه وهو بيتشوح
وبس مبياخدش سوا بعد كدا وبيبقى تاكليه دايب فى بقك وبالهنا والشفا دى الحاجات اللى إفتكرتها يارب حد يستفاد منها لو افتكرت حاجه تانى هعمل بيها مشاركه واضيفها
معلش طولت عليكم ودعواتكم
مواضيع هذا القسم برعاية
دوده حبيبى دوده حبيبى 431574_20.gif سوبر فتكات Fatakat 431574 سوهاج – مصر