السلام عليكم ورحمة الله وبركاتة
امبارح قبل السحور بشوية طقت فى دماغى اجرب اعمل عيش بيتى نتسحر بية وفعلا روحت داخلة المطبخ وكانت المفاجاة
تححححححححححححفة يافتوكات والله بتاكلى حاجة نضيفة وطعمها جمييييل وكفاية انك انتى اللى عاملاة
انا جربت فى كوباية دقيق واحدة عشان اول مرة وطلعتلى رغيفين ماشاء الله
هو طبعا لو جيتى تحسبيها هيبقى اغلى من اللى بتجيبية من الفرن بس مفيش مانع انك كل فترة كدة تعملى كيلو تفرحى بية نفسك وولادك وزوجك لانة بجد لية فرحة
ندخل بقى فى المقادير بدل اللوكلوك اللى انا فية دة سمعاكى يالى بتقولى فعلا لوكلوك بس متقوليش انتى انا اللى اقول
المقادير
كوب دقيق
نص معلقة صغيرة خميرة فورية
نص معلقة صغيرة سكر
نص معلقة صغيرة ملح
حوالى ربع كوب مية دافية او حسب العجن
الطريقة
هنحط كل حاجة على بعض ماعدا المية
هنضيف المية حبة حبة ونعجن لحد ماتبقى عجينة متماسكة شوية ومبتلزقش ومتخليهاش لينة قوى عشان متتعبكيش فى الفرد وهنقسمها كورتين
هنسيبهم يخمروا كدة
هنرش دقيق على الرخامة وعلى النشابة ونفرد كل كورة ونخليها دايرة على قد ما نقدر
هنشيل شبكة الفرن ونولعة على اعلى درجة ولما يسخن هناخد الرغيف ونحطة على الصاجة اللى تحت دقيقتين بالظبط لحد ماينفخ يبقى استوى هتقلبية على الوش التانى مش هياخد دقيقة
لما نطلعة بقى هنحطة بين فوطتين لو عايزاة طرى لكن لو عايزاة من برة مقرمش متغطيهوش ودة شكلة بعد ماطلع
ولما يهدى هنحطهم فى كيس بلاستيك ونقفل عليهم لوقت الاكل وبالهنا والشفا مواضيع هذا القسم برعاية
دودى وبسسس دودى وبسسس images/flowersavatars/avatar0020.gif عضوة فى ذمة الله Fatakat 309416 المنصورة – مصر