ازيكم يا قمرات
من كام يوم عملت معجنات وبصراحة طلعت روعة وطرية اوي
فقولت لازم اقول للفتوكات الحلوين علي الطريقة ومستنية اعرف رأيكم
بسم الله نبدأ
المقادير
مقادير العجينة
3ونصف كوب دقيق (منخول)
كوب ونصف لبن رايب
فنجان زيت (ربع كوباية)
3م.ك سكر
م.ص ملح
م.ك خميرة
3م.ك لبن بودر
م.ك بيكنج بودر
مقادير الحشوة
جبنة بيضاء بالزعتر
سوسيس (فراخ ولحمة)
فلفل مقطع
طماطم مقطعة
زيتون مقطع
جبنة موتزاريلا
صلصلة زي بتاعة البيتزا ( معلقة صلصة ورشة ملح وكمون وفص ثوم وشوية مية)
وطبعا يا قمرات العجينة دي ممكن تحشيها باي حشوة حادق او حلو
ممكن لحمة مفرومة فراخ سبانخ زيت زيتون وزعتر
ممكن تحشيها مربي شيكولاتة عجوة
او اي حشو علي ذوقك
ندخل بقي علي الطريقة
اول حاجة هنخلط المقادير الجافة كلها مع بعض
بعد كدة هنضيف اللبن الرايب واحدة واحدة وياريت يا بنات ما يكونش بارد
ونعجن كويس بعدين نضيف الزيت ونكمل عجن لمدة 10 دقائق
لانك كل ما تعجني اكتر هتلاقي نتيجة احلي بكتير
هتلاقي العجينة معاكي طرية اوي وجميلة بسبب اللبن الرايب
هنسيب العجينة تخمر لمدة ساعة
ودة شكلها بعد التخمر
هنبتدي بقي نشكل العجينة ونحشيها بالحشوات اللي عندنا
هتلاقي العجينة بتمط معاكي وطرية
وطبعا شكليها زي ما انت عايزة ممكن تعمليها شكل كرواسون
ممكن تعمليها زي القطايف ممكن تعمليها ميني بيتزا
وانت بتشكلي العجينة حطي شوية دقيق علي السطح اللي بتفردي عليه
انا عملت الشكل دة (تفردي العجينة علي شكل بيضاوي وتيجي عند طرف منها وتعملي خطوط بالطول بالسكينة)
دي محشية جبنة بالزعتر
ودي محشية سوسيس وزيتون وفلفل وطماطم وجبنة موتزاريلا
ودي دهنتها بالصلصة وحطيت سوسيس وفلفل وزيتون وطماطم وجبنة
ودة شكلها بعد ما خلصت (بلفها رول زي العيش الفينو)
دة شكل تاني عملته زي القطايف
ونخلص كل الكمية بتاعتنا ونحطها في صنية مدوهنة بزيت بسيط اوي
علي درجة حرارة متوسطة لحد ما تتخبز
ممكن للي يحب يدهن وشها بالبيض بس انا ما عملتش كدة مش محتاجة اصلا
ودة شكلها لما طلعت من الفرن
ودي صورة كمان
بجد يا بنات طعمها رائع وطرية جدا واحسن بكتير من اللي بتتباع في المحلات وكمان مضمونة
جربوها علي ضمانتي وان شاء الله تعجبكم
وبرضه مستنية رأيكم
وياريت يا بنات ما تنسوش التقييم لاني والله تعبت في الموضوع
في رعاية الله يا قمرات مواضيع هذا القسم برعاية
(Lara) (Lara) 265722_27.gif فتكات غالية قوي Fatakat 265722 الرياض – السعودية