السلام عليكم ورحمة الله وبركاته
حبايب قلبي…أخباركم إيه…يا رب تكونوا بخير وصحة وسلامة يا رب
انهاردة جبتلكم طريقة العيش على البوتاجاز من أسهل وأجمل وأطعم العجاين وتقدري تعمليه بسرعة ولا أحلى ست بيت في الدنيا
ندخل بأة على المقادير والطريقة
مقادير العجينة:
3 كوب دقيق
كوب ماء دافيء جدا جدا …أو على حسب احتياج العجينة
معلقه كبيره خميره فوريه
رشة ملح
معلقه كبيره سكر ..أنا بحط سكر بودرة…بس لو مش عندك اعملي بالسكر العادي بس يكون ناعم عشان العجينة تبأة ملساء مش محببه
بيضه
الطريقة:
هنحط المواد الجافة على بعضها
الدقيق والسكر والملح والخميرة الفورية ونقلب كويس لحد ما يختلطوا
بعد الخلط
وبعدين بنضيف البيضة وندعكها كويس مع خليط المواد الجافة
وبعد الدعك الكويس هيبأة ده شكل العجينة
وبعدين هنضيف الماء تدريجيا مع العجن كويس جداجدا جدا على أد ما تقدري
وهيبأة ده شكل العجينة…وهي أخدت مني اقل من كوباية مية..كل ما تعجني أكتر هتاخدي نتيجة أحسن وهتبأة العجينة أنعم…طلعي كل اللي جواكي في العجينة
وبعدين هنغطيها بكيس بلاستيك
ونغطي الطبق بغطا حلة عشان الخميرة تنشط بسرعة …
وممكن زيادة في السرعة تغطوا كمان بفوطة
وتسيبوها تخمر…ممكن تاخد ساعة أو أكتر…انتوا بعد ساعة شوفوها لو لقيتوها خمرت ابدؤوا في الشغل …لو لسة سيبوها تريح كمان شوية
هي لو في الصيف طبعا بتاخد وقت قليل
ده شكلها بعد التخمير
على الرخامة هنرش دقيق وناخد كورة صغيرة من العجينة ونفردها بالشكل اللي نحبه ومش لازم تكون متظبطة عالأخر
وبعدين نمسح طاسة بزيت قليل جدا جدا ..يعني نحط شوية زيت على منديل ونمسح الطاسة بيه ..والطاسة تكون تيفال
طبعا
ونحطها على البوتاجاز ونسيبها تسخن جدا وبعدين نحط عليها عجينة العيش
شوفوا بعد ثواني بسيطة العيش بيبدأ يرتفع إزاي…أول ما تلاقوه ارتفع كده اقلبوه على الناحية التانية بسرعة
وسيبوه ثواني وشيلوه في صينية محطوط فيها فوطة نظيفة وغطوه بسرعة عشان يبأة طري وجميل
هنا حطيته على الفوطة
وغطيته بيها عشان يفضل طري
وده بعد ما خلصت كمية العجينة كلها
ها إيه رأيكم بأه
ما شاء الله عملتلي 12 رغيف بالحجم ده…وكل ده ب3 كوبايات دقيق…وحاجة من عمايل إيديكي الجميلة
يا رب يكون العيش عجبكم…وقريب جدا بإذن الله هنزلكم سندوتشات الشاورما وعملتها من العيش ده
منتظرة ردودكم وتعليقاتكم
جربوها وعلى ضمانتي مواضيع هذا القسم برعاية
غدودة 2024 غدودة 2024 105616_5.gif سوبر فتكات Fatakat 105616 طنطا – مصر