السلام عليكم يا فتوكات , اخبار الصحه ؟؟ يارب تمام
النهارده هقدملكم وصفه لذيذة و سهلة جدآآآآآآآآآآآآآ من مطبخي الخاص , بس سامحوني مفيش صور لاني نسيت اصورها , المره الجايه إن شاء الله هيكون في صور
مش هطول عليكم
المقادير :
– نص كيلو صدور فراخ
– نص كيس مكرونه
– نص علبة كريمة طبخ ( بس تقدري تزودي الكمية لو حابه )
– معلقة كبيرة لبن سائل
– ملح , فلفل , و لو حابه ممكن تحطي شطه بودره , مكعب ماحي
– بصلة متوسطة
– زيت للتحمير
– جبنة موزاريلا مبشورة
الطريقة :
– نسلق المكرونه
– نجيب البصله و نقطعها مكعبات صغيرة
– صدور الفراخ هنسلقها ( خطوة السلق دي عشان تساعدك ان الفراخ تستوي بسرعه و عشان متاخدش منك وقت في التحمير ) و بعد ما تتسلق هنبردها شويه بعدين هنقطعها مكعبات متوسطه
– بعدين نبتدي نحمر البصل في شوية زيت و نقلبه كويس لحد ما يتحول للون الدهبي , لما يبدأ يتحول للدهبي هنضيف عليه صدور الفراخ اللي سلقناها و نقلب كويس لحد ما نلاقي ان الفراخ بدأت تتحمر و تتحول للون الدهبي و هنحط رشة ملح بسيطه
– دلوقتي هنحط الكريمة على خليط الفراخ و نقلب كويس لحد ما تبدأ الكريمة انها تتقل و هتروحي ضايفة عليهم معلقة اللبن و تقلبي كويس بعدين نضيف الملح و الفلفل و الماجي ( لو حبيتي تحطي الشطه البودره يبقى تحطيها معاهم في الخطوه دي ) و نقلب كويس و نخلي الخليط ده على النار 3 دقايق بالكتير و نقفل عليه
– طبعآ المكرونه هتكون اتسلقت و خلصت , هنصفيها من المايه و نحطها في طبق التقديم المناسب , بعدين نحط عليها خليط الفراخ و الكريمه و نرش على الوش جبنة الموزاريلا و نحطها في الميكرويف دقيقة بس عشان الموزاريلا تسيح
و بكده الوصفه تكون خلصت و يارب تعجبكم مواضيع هذا القسم برعاية
Princess Gogy Princess Gogy 869607_1.gif فتكات جديدة Fatakat 869607 My Dreams – My Own Kingdom