كباب الحله اكله معروفه فى كل بيت مصرى وطعمها ماشاء الله مايختلفش عليها اتنين وتقريبا طرق عمايلها متشابهه
بس مهما كان التشابه فى تكات معينه كده بتنجح الاكله او تبوظها تعالوا بقا نشوف الصوره النهائيه
ــــــــ
المقادير:
-لحمه مقطعه مكعبات ويحبذ يبقا معاها كام قطعه دهن صغيره
-بصل
-فص توم
-نص معلقه سكر صغيره
-توابل المستخدمه..(ملح وفلفل ورق لورا حبهان بهارات لحمه
مكعب ماجى)
الطريقه
ـــــــــــــــــــــــــــ
اول حاجه بحط معلقه زيت وبنزل باللحمه عليها وافضل اقلب كويس
هلاقى اللحمه بدات تغير لونها وتنزل ميتها هسيبها خالص لغايه ماتشرب ميتها تانى وتنشف تمام
دى بعد ماشربت ميتها ونشفت ببتدى لمده دقيقتين اشوحها وبعدين احط عليها التوابل كلها اللى قولتها فى المقادير.(ملح وفلفل ورق لورا حبهان بهارات لحمه
مكعب ماجى) واقلب
اضافه التوابل فى المرحله دى بتظهر نكهتها قوى
#تكه مهمه اوووى
بعد ماشوحتها شويه كده اللحمه تقريبا استوت حوالى ربع سوا هنكمل سواها الزاى هقولك
هتضيفى ربع كوب ميه مغليه ع اللحمه او ع حسب ماتحتاج بحيث ان الميه تبقى يدوب فى مساواه اللحمه وبهدى عليها وبسيبها تستوى ولو شربت ميتها واحتاجت بزود شويه بشويه وبحط معاها فص توم صغير مفتوح بالسكينه بيدى نكهه حلوه اووى لما بيتحط فى المرحله دى
ليه بقااا بسويها كده
علشان اللحمه لما تستوى فى ميه قليله هتنزل كلها سوايلها والعصاره اللى فيها وتشربها تانى وبالتالى هتبقى اللحمه طريه وجميله معاكى وكمان بتاخد من نكهه توابلها كويس اوى وبتبقى منكهه وماشاء الله تجنن
هنا اللحمه استوت
#ملحوظه بقا
لما اللحمه تستوى بخلى فيها شويه صوص من عصاره اللحمه دى وهقولك هنعمل بيها ايه فى الخطوات الجايه
بجيب طاسه وبحط فيها ربع معلقه سكر وبسيبها تتكرمل معلشى نسيت اصور الخطوه دى لان السكر كان هيتحرق المهم بعد مالسكر اتكرمل وبقى لونه جولد بزل بالبصل مباشره واقلب واشوحه شويه لمده دقيقتين كده
#تكه مهمه السكر هنا من ضمن الاسباب الاساسيه فى طعامه الاكله وانها تبقى مميزه ومتخافيش مبيبقاش طعمه باين خالص هو بيدى طعم جنان للحمه ماشاء الله والبصل
بعد ماشوحت البصله بضيف اللحمه معاه و بنزل بالصوص اللى اتبقى من سوى اللحمه فاكرينها
#تكايه هنا بقا
الصوص ده بيدى نكهه حلوه اووى للبصل واهدى النار عليها واغطيها واسيب البصل يستوى شويه ويشرب الميه
ودرجه سوى البصل على حسب ماتحبى يعنى فى ناس بتحبه فيه كرانش كده وفى ناس بتبحبه مهرى انا بحبه متوسط بصراحه
هنا بعد ما كباب الحله استو بجمر فحمه واحطها فيه واسيبه شويه لغايه ماياخد نكهه الفحم وبكده يكون كباب الحله خلص معاكى وجاهز للتقديم بس انا بحب ازود عليه تكه اختيارى كده هتشوفيها فى الصوره الجايه
بحب ازود فلفل حااااااااااااااااااااااار متقطع قطع صغيره بجد بيفرق اووى فى طعمه ودى طبعا اختيارى
#ملحوظه
بضيف الفلفل فريش بعد مالاكله خلصت يعنى الفلفل ميتحطش ع النار ويتقلب مع كباب الحله تضيفيه وقت التقديم بس
وهنا شكل كباب الحله فى الاخر بجد ماشاء الله مش قادره اقولكم طعمه يجننننننننننننن اتمنى تجربوها وتعجبكم
ولو عجبتكم الاكله مش عايزه غير دعوه حلوه بظهر الغيب ان ربنا يقر عينى بما اتمنى ويريح قلبى ويسعدنى ويبعد عنى وعن اهلى اى حزن او ضرر وميشمتش فينا حد ابدااااااااا فى رعايه الله يااحلى صحبه فى الخير مواضيع هذا القسم برعاية
angelsmile2311 angelsmile2311 963758_5.gif فتكات رائعة Fatakat 963758 my home – egypt