ازيكم يا احلى فتوكات فى الدنيا
انا جيبالكم وصفه النهارده يارب تعجبكم
بطاطس وكوسه محشيه لحمه مفرومه
ومتغرقه بالجبنه الموتزاريلا نبتدى مع بعض
المقادير
كيلوا لحمه مفرومه
3 بصلات متوسطه
5 فلفل اخضر و5 طماطم
ملح وفلفل اسمرورشه جوزه الطيب
2كيلوا بطاطس صغيره و2 كيلوا كوسه
معلقه سمن او زبد
معلقتين صلصه طماطم
طبق صغير بسله وجزر مسلوقه او متشوحه
الطريقه
نقطع البصل فى القطاعه الكهرباء او الكبه
انا بستخدم القطاعه براون والبصل يكون لوحده
بعد كده نقطع الفلفل والطماطم مع بعض
ويبقوا زى الصوره كده
نحط معلقه السمن فى حله على النار ونحط عليها
البصل يتشوح لغايه لما يصفر وبعدين نحط اللحمه
زى الصوره كده
نقلب اللحمه مع البصل ونحط رشه فلفل اسمر
ورشه جوزه الطيب ونقلب جامد لغايه ما لونه يتغير
وبعدين نحط الطماطم والفلفل الاخضر ومنحطش ميه
لان الميه الموجوده فى البصل والطماطم والفلفل كفايه
لغايه لما اللحمه تستوى وتبقى بالشكل ده
وده شكلها بعد ما استوت
نضيف عليها معلقتين صلصه طماطم وكده
تكون جاهزه للاستخدام فى الحشو مع البسله والجزر
زى الصوره كده
نقشر البطاطس ونغسلها ونقورها بالمقوره
ونجرد الكوسه بالسكينه او نقشرها انا بحبها مجروده
ونغسلها ونقورها بالمقوره
نحافظ على قلوب الكوسه والبطاطس كل
واحده لوحدها علشان نحطها فى ارضيه الحله
فى التسويه زى الصوره كده
نحشى البطاطس لحمه مفرومه وبسله وجزر
الكوسه انا بحشيها لحمه بس
ده شكلها بعد الحشو قبل ما اسويها
ارفعها على النار وبحط كبشه شوربه
واحده على الكوسه وكبشتين على البطاطس
اول ما تغلى نهدى النار خالص
الكوسه بتاخد حوالى نصف ساعه
والبطاطس 4/3 ساعه علشان تستوى
بعد ما تستوى برصها فى صاج بالشكل ده
وارش عليها جبنه موزاريلا كده بالظبط
وادخلها الفرن حوالى 20 دقيقه
وده شكلها لما خرجت من الفرن شوفوا الجبنه سايحه ازاى
ريحتها واوا موصفلكوش تفتح النفس
وده الشكل النهائى للتقديم
شوفوا الجمال مش هتبطلوا اكل والله
وعلى فكره الاكله دى مفيهاش غير معلقه سمن
واحده مش هتخن خالص وان شاء الله تعجبكم
ودى صوركمان مش حارماكم من اى حاجه
بالهنا والشفا ومتنسوش التقييييييييييييم
استنوا رايحين فين
اوعوا حد يخرج غير لما يدعى لزيزو ابنى ربنا
يباركلوا فى كليته الوحيده التعبانه اللى اتولد بيها امانه تدعولوا
ربنا يتمم شفاؤه على خير ويباركلى فيه هو واخواته البنات
اسيبكم فى امان الله
مواضيع هذا القسم برعاية
سيسو زيزو سيسو زيزو 822446_8.gif فتكات غالية قوي Fatakat 822446 المنصوره – مصر