حبايب قلبى القمرات
واحلى فتوكات فى الدنيا كلها
جبتلكم طريقة لصينية المسقعه بس جميله جدا
على فكرة الاضافات والتكات اللى فيها من ابتكاراتى بفضل الله
ومافيش حاجه منقوله من اى مواضيع تانيه
يللا بندأ بسم الله
ومهم اوى يابنات وانتوا بتعملوا الاكل تذكروا الله
وتصلوا على رسوله الكريم صل الله عليه وسلم
وتستحضروا نية انكم بتعملوا الاكل ده لنية صالحة
زى مثلا انك تأكلى زوجك وولادك وبتعينيهم بالاكل ده على طاعة الله
وان الاكل ده يدخل جسمهم ويفيد صحتهم
وكذلك لو انسه وبتعمله لباباها وماماتها واخواتها
ونوايا كتيييييييييييييير جميله اوى يابنات
والله يابنات ذكر الله والنيه الصالحه بيدوا الاكل جمال تانى خااااااااااااااااااااالص
بسم الله توكلنا على الله
طريقة عمل المسقعة باللحمه المفرومة والمكسرات:_
_______________________________________
اولا : بتجيبى البتنجان وتقشريه خالص وبعدين تقطعى حلقات متوسطة الحجم وتغسليه وترشى عليه ملح وتسيبيه فى مصفى عشان الملح ينزل مايته
وتجيبى الفلفل الرومى وتقطعيه على شكل صوابع وتغسليه
وتجيبى البطاطس بس مش كتير يعنى مثلا لو هتعملى كيلو بتنجان يبئى بطاطسيه واحدة وانا شخصيا بقطعها على شكل مكعبات صغيرة وطبعا بتحمريها عادى
ثانيا : بتيجى فى الحله وتحطى زيت وحته سمنه صغننه وعليهم توم مدقوق وتقلبى التوم شويه صغيرة وبعدين تحطى عليهم عصير الطماطم وتسيبها تتسبك ولما تستوى تماما هاتى حته توم تانيه مدقوقه وحطيها على الطماطم بعد ماتتسبك وحطى بئى ملح وفلفل وكزبرة وزنجبيل وقرفه
ثالثا : تجيبى حله وتحطى اللحمه المفرومه وتخرطى عليها بصله وتسيبيها تتعصج ولما تستوى كويس تحطى حته سمنه والتوابل ملح وفلفل وتسيبيها تبرد وبعد كده تجيبى فلفل اخضر اللى هو الرفيع وتقطعى كام قرن وتقلبيهم على اللحمه المفرومه المتعصجه ديه
رابعا : لو هتعملى حمص شام ومكسرات يكون افضل طبعا انا عملت حمص الشام عادى زى مابنعمله مشروب نقعت حمص الشام فى مايه سخنه لمدة حوالى ساعتين وبعدين غسلته وحطتله مايه نظيفه وحطيته على النار وجبت بصله وبشرتها عليه بالمبشرة وتوم مدقوق وعصير طماطم وممكن تدقى قرن فلفل مع التوم وسبته يستوى تماما وفى الاخر بتحطى التوابل وده بئى لازم تحطيله كمون وملح وفلفل وشطه بسيطه وبالنسبه للمكسرات جبت اللوز والبندق وغليت ميه وسلقتهم فيها لمدة عشر دقايق بس عشان القشرة البنى الخفيفه اللى عليهم اعرف اقشرها وقشرتهم وبئى لونهم ابيض قدامى وكان عندى كمان صنوبر وزبيب الاول بتجيبى طاسه فيها حته سمنه وتشوحى الصنوبر لانه بيستوى بسرعه واول مايحمر شليه وبعدين شوحى الزبيب ولما بردوا ينفش كده ويحمر شليه واخيرا شوحى اللوز والبندق وطبعا لو السمنه قلت بتزوديها كل مرة
خامسا : طبعا بتكونى حمرتى البتنجان والفلفل والبطاطس بتجيبى بئى صينيه وتحطى الاول رصة بتنجان وفوقها شوية فلفل وشوية بطاطس وعليهم لحمه مفرومه وشويه من المكسرات وتحطيهم فوق بعض وتجيبى حمص الشام تطلعيه من ميته وتحطيه فى قلب الصلصه وتقلبيه فيها كويس بس ابئى سيبى شوية حمص بره عشان نزين بيهم وش الصينيه المهم بئى بتحطى نص الصلصه ديه بالحمص على الحاجات اللى فاتت وبعدين تكملى رص تانى تحطى بئى باقى الفلفل وباقى البتنجان ولما تخلصى كل اللى عنك ابئى حطى على الوش شويه الصلصه اللى فاضل وحطى على الوش حمص الشام اللى سبناه وباقى المكسرات وتدخليها الفرن
ملحوظة صغيرة: لاحظى انك لو هتحطى حمص شام يبئى جهزيه من بدرى من قبل المسقعه بفترة لانه هيتنقع الاول ساعتين وهياخد وقت على النار.
وكمان خلى بالك ان الصنوبر سعره غالى نار الكيلو ممكن يعمله 300 جنيه عشان كده لو حابه تجيبى يبئى ممكن 5 جرام او 10 جرام فقط
او ممكن تستغنى عنه وتكتفى باللوز والبندق والزبيب.
وبالف هنا على قلبكم ياقمرات
ديه يابنات صورة توضيحيه من جوجل
وزى ماانتوا شايفين مافيش على وشها مكسرات
احنا بئى بتاعتنا تكسب
مواضيع هذا القسم برعاية
مسلمة غيورة مسلمة غيورة 548636_10.gif برنسيسة فتكات Fatakat 548636 الدمام – السعودية