زى العنوان كده يا فتوكات
كتير مننا بتحب المندى أو البريانى أو الكبسه وبيكون نفسها تعمله ألوان أبيض وأصفر زى الجاهز
بس بتلاقى الزعفران لو موجود سعره غااالى ولون الزعفران مش موجود فى مصر
طب الحل إيه ؟؟؟؟؟؟؟؟
الحل لقيت فتوكه بتسأل عن بديل الزعفران لقيت أخت جزاها الله خيرا بتقولها العُصفر
طبعا كلكم عارفينه اللى بيتحط مع الليمون المعصفر
طبعا موجود فى كل مكان وكميه قليله منه تكفيكى فتره كبيره
أنا والله جربته مخصوص عشان لو نفع أفيدكم بيه مع إنكم بتخذلونى وألاقى مشاهدات تحت أد كده تحت وتخرج حتى من غير كلمه حلوه لو من ورا قلبها مع إنى مش بطلب تقييم أومال لو بطلب تقييم بأه
والحمد لله ولادى وجوزى محسوش بطعم متغير ولا علقوا ولا أى حاجه يبأه كده تومام لأن لو فيه تغيير كانوا قالوا طبعا وأنا كمان
ده طبعا لأن تقريبا والله أعلم من وجهة نظرى ان لون الزعفران مش بيدى طعم هوا لون وبس
الموهمممم
آدى صورة العُصفر نقعته فى شوية ميه صغيرين مغليين طبعا وغطيته بطبق عشان ينزل اللون فى الميه على ما أعمل الرز
أنا كنت بعمل مندى لأنى اعتمدت طريقته من أخت هنا ربنا يجزيها كل خير ومن ساعتها بقيت أعمله دايما لما يكون عندى لحمة خروف طبعا وكلها دهن كده ووداعاً للريجيم
وده الرابط وفيه كمان رابط طريقة الاخت اللى خدت منها الطريقه للى تحب تشوفه
https://fatakat.univanet.com/#5589610
الرز غسلته ونقعته فى الميه
وخدت الشوربه بتاعة اللحمه زودتها ميه وحطيت قرن شطه بيدى نكهه حلوه أوى وورقة لورى وليمونه ناشفه عملت فيها فتحات بالسكينه عشان تدى نكهة وقرنفل وقرفه وطبعا ملحها متظبط
ولما غليت حطيت الرز
ولما الرز اتشرب هديت و النار صفيت العُصفر وحطيته على الرز فى جنب كده
وغطيت عليه وسبته شويه وبعدين قلبته كده
وممكن مش تقلبيه عادى بس أنا بحب أقلبه عشان اللون يتوزع كويس
وهنا لما استوى بفضل الله مفلفل وروووعه
وهنا غرفته
وعملت معاه السلطه دى طماطم وفلفل حراق وتوم وعود بقدونس وخل وملح
وهنا غرفت طبق وحطيت عليه اللحمه
فيه تكتين بأه يا فتوكات بقيت أعملهم على طول فى المندى
أنا فى الرابط القديم كنت بحمر بصله تانى وبعدين أنزل بالشوربه انا بقيت آخد الشوربه بتاعة اللحمه والبصله اللى بحطها مع اللحمه معاها وخلاص ونفس الطعم مش بتفرق سبحان الله
وكمان تكه
بولع فحمه واحطها على ورقة فويل ظاو ورقة بصل حتى واحط الفحمه وعليها نقطة زيت بجد بتفرق فى الطعم أوى
وبالهنا والشفا
والحمد لله الذى أطعمنا وسقانا من غير حولٍ منا ولا قوه
الحمد لله رب العالمين
يارب افرجها على كل المُسلمين المُستضعفين فى مشارق الأرض ومغاربها يارب
اللهم أطعم جوعاهم واشف جرحاهم وارحم موتاهم وتقبلهم من الشهداء
وانصرهم على أعدائهم وأعدائك يارب العالمين
اللهم احفظ مصر من كيد الكائدين ومكر الماكرين واجعلها آمنة مُطمئنة وسائر بلاد المسلمين
وانتقم يارب ممن يريدون تدميرها يا قوى يا جبار
واشف الجرحى وارحم الموتى وتقبلهم من الشهداء وفك أسر المأسورين المظلومين والشرفاء يارب العالمين
وحسبنا الله ونعم الوكيل فى الظالمين وأعوانهم
ربِ اغفرلى ولوالدىَ وللمؤمنين والمؤمنات والمسلمين والمسلمات الحياء منهم والأموات وآخر دعوانا أن الحمد لله رب العالمين
سبحانك اللهم وبحمدك أشهد أن لا إله إلا أنت أستغفرك واتوب إليك
مواضيع هذا القسم برعاية
الاميره ام يوسف نور عيونى الاميره ام يوسف نور عيونى images/avatars/landscape.jpg سوبر فتكات Fatakat 571455 مصر حبيبتى الله يحفظها ويحميهامن كل شر – مع زوجى وولادى ربنا يحفظهم ويحميهم