فتوكات
طريقة عن تجربة وخبرة لتحمير البانيه بدون ما يسقط منها لاخر الكمية وتشيلي الزيت نظيف
وكمان بتكون مقرمشة ورقيقة ده للي بيحبو البانيه يكون رقيق مش تخين
التتبيلة
علبه زبادي
خل
بصل مبشور
ملح
فلفل اسود وابيض
بهارات شوية صغيرين مش كتير
لو عندك اي بهارات فيها ثوم ناشف وبصل تحويجة حطيها
لو بتحبيها مشطشطة حطي شوية شطة ناشفة
وسيبيها من باليل او الصبح بدري لو هتاكلي العصر
نيجي بقه للسر
البقسماط انا بستخدم ريتش باك وبحط عليه نفس الكمية دقيق
وملعقه نشا
كل ده مافيهوش جديد
الجديد بقه انا بصراحه وماما مش بنحب البيض ابدا على البفتيك او البانيه ابدا ابدا حتى لو حطينا عليه بهارات الدنيا والاخرة وفي ناس كتير كده بس البيض ميزته انه بيعمل تماسك دي وظيفته بس انا بعد عناء قدرت اعمل البفيتك والبانيه متماسكين جدا بدون بيض
بعد ما نخلط البقسماط مع الدقيق وملعقه النشا او البيكنج بودر اللي بتحطيه انا مجربتوش بس سمعت عنه حطي شوية ملح صغيرين وفلفل وده اختياري عشان البقسماط بيبقى دلع اوووووي
تجيبي البانيه تشيلي كل البصل اللي عليها وكل العالق بيها كويس وتعصريها شوية
او ممكن لو حاطة زبادي متعصريهاش مش مشكلة
وتحطي القطعه وتدوسي بكف ايدك عليها جامد لدرجة انك تحسي انه النسيج بيروح ويجي معاكي ويفرش
والحتة تكبر
مش عارفه انتو فاهمني ولا ايه ؟؟؟
نسيج الفراخ البانيه طري اووووووي بعد التتبيله بيكون دايب
فبمجرد ما تضغطي عليه بكف ايديكي بيفرش ويترقق اوووووووي
انا بعملها كده عشان بحبها رقيقة اوووووووووووي ومش تخينه
وكمان عشان مش هتحطي بيض فاضغطي براحتك
وحطي حتة حتة على جنب في طبق فوق بعضها متخافيش مش هتلزق
حته حته
وبعدها حطي الطبق ده في الفريزر بس نص ساعه كفايه
وحطي الزيت غزير
ولما يسخن انزلي بيها وتكون النار متوسطة وخليها تستوي براحتها
هتشمي ريحة البصل المبشور والبهارات تحفة
وزي ماتحبي ذهبيه او غامقه ونزليها على كسبرة مفرومة في طبق التقديم متخافيش مش هتكون شاربه زيت
وتنزلي لحد ما تخلصي خالص
انا بقدم معاها بصل مقلي برضو له بتبله في نفس وقت تتبيله الفراخ
تقطعي بصل حلقات
في سلطانيه
تضيفي عليها خل ودقيق انا بعمل بالبركه بصراحه عشان كده مش عارفه مقادير
ملح فلفل بهارات وملقعتين نشا ولبن او زبادي حسب ما تحبي
وبيضه مخفوقه وممكن لاء حسب الرغبه برضو
المهم تسيبيها برضو نفس وقت الفراخ
بعد ما تقلي الفراخ
تجيبي الطبق ده وتشيلي حتة بصل وتسقطيها في الزيت وهو سخن وتسقطي هيبقى عليه خلطه ماسكه فيه
لازقه عليه
وبعدين تقلبيه مرتين مرة وش ومرة ضهر
تنزليه في طبق عادي او ورق نشاف براحتك
طعمه خراااااااااااااااااااااااااااااااااااافة في الاكل
وبحمر بعد البصل فلفل اخضر حامي او رومي في الزيت
والتقديم طبعا البانيه في سيرفيز اللي فيه الكزبره المفرومه
او لو حبيتي تنزليها على مطبخ الاول براحتك
تجهزي السيرفيس وتحطي البانيه وحواليه حلقات البصل البانيه والفلفل الحامي المقلي و الرومي
وتقدم مع بطاطس مقليه وسلطه خضراء
انا اسفة انه موضوعي مافيهوش صور ولكن اوعدكم هنزل صور للطبق والطريقه تاني اول ما اعمل بانيه
الاسبوع الجاي
ويارب تعجبكم مواضيع هذا القسم برعاية
فاتي محمد فاتي محمد 739398_1.gif فتكات حبوبة Fatakat 739398 cairo – مصر
سبحان الله و بحمده