بعد الاجهاض اربع مرات طلع لازم اعمل حقن

ازيكو يا فتوكات
انا اجهضت اربع مرات وكلهم في 6 اسابيع وروحت لدكاترة كتير وعملت تحاليل كتير والدكتور قالي انت عندك نسبة تجلط لازم تخدي حقن للسيولة وخدتها في اخر حملين وبرضه الجنين كان بينزل فروحت للدكتور قالي انت عندك ورم ليفي هوا اللي بيسبب الاجهاض روحت لدكتور تاني قالي انه مش السبب وعلشان نتاكد اعملي اشاعه ثلاثية الابعاد وطلع فعلا ان الورم مش السبب لانه بعيد عن بطانه الرحم وحجمه صغير
فروحت لدكتور احمد فتي طلب مني تحاليل وراثية مع العلم ان قولت لدكاترة كتير عليها وقالولي ملهاش لازمة
المهم لاقيت ان تحليل الوراثة هوا اللي فاضل قدامي فقولت اعمله لان الدكاترة كانوا بيبقوا مستغربين ان ازاي الحمل مش بيكمل مع الكورتيزون والحقن للسيولة
واخيرا عملت تحليل الوراثة انا و جوزي عند دكتور عزت السبكي وطلع في مشكلة في الكرموسومات عند جوزي وهيا اللي بتسبب الاجهاض وان لو كان الحمل كمل كان ممكن يكون مشوه ومن فضل ربنا انه بينزل في الاول الحمد لله يااااااااااارب
دكتور عزت السبكي بتاع التحاليل قال لازم تعملي حقن مجهري علشان نختار الجنين السليم قبل الحقن وروحت لدكتور احمد فتي قالي برضه لازم حقن ولازم قبل الحقن نشيل الورم الليفي علشان ميكبرش مع المنشطات وكل ده هايتكلف فلوس كتير ربنا يسهلها من عنده ادعولي لان نفسي افرح جوزي لانه يتيم وملوش اخوات وياريت كل اللي بيحصلها اجهاض متكرر متهملش في موضوع التحاليل الوراثية
انا نفسي اعملها في مستشفي الحسين الجامعي لان التكاليف هاتقل النص بس في ناس بتقولي مستشفيات الحكومه فيها اهمال يااااااااريت اللي عملت حقن تقولي مركز او دكتور كويس وسعره كويس وياااااااااااارب محدش يشوف اللي انا شوفته
انا طولت عليكم بس كنت محتاجة افضفض ومحتاجة دعواتكم قوي

Bosa2015 Bosa2015 فتكات حبوبة Fatakat 1034995 الجيزة – مصر

سبحان الله و بحمده