السلام عليكم ورحمة الله وبركاته
ازيكوا يا فتوكات عاملين ايه ؟؟
مبدأيا احنا لازم نتفق على حاجه صغيره !! انك لازم تنجحى في حياتك عشان ربنا ما خلقكيش عشان تاكلى وتشربي وتنامى وتصحى وتتجوزى وتخلفي وبس!!المفروض اما حد يسألك قدمتي ايه لمجتمعك ؟؟ طب قدمتى ايه للناس اللى حواليكي؟؟ طب قدمتى ايه لنفسك وطورتيها ازاى؟؟!! يبقي عندك اجابه مهما كانت ظروفك عشان ربنا خلقك بامكانيات لو عرفتيها هتنبهري!! بكنوز كتير بس انتى دوري عليها وهتلاقيها ما تخافيش!!
على فكره الوقت ما فاتش!! و حتى لو عندك 70 سنه مش يمكن ربنا هيعيشك لل 90؟؟ تضيعي 20 سنه ليه من عمرك في مافيش !! ربنا هيسألنا عن عمرنا عملنا فيه ايه مفيد!! ومش يمكن اما تحطى هدف انك تعمري الارض باللى تقدري عليه وتحطى خطه انك تحسننى نفسك حتى بعد العمر ده كله ربنا يمد في عمرك عشان يخليكي نموذج للاراده والتغيير ؟
انتى كمسلمه مطلوب منك تعمري الارض وعشان تعمري الارض ابدأى بانك تعمري نفسك وتتعلمى مهارات جديده تخلى حياتك اسهل واحسن!! ويبقي عندك طموح كبير بتتحركى ناحيته في حياتك لان الكسلان عقابه في الدنيا بيكون الكأبه وعدم التقدير ولا من نفسه ولا من الناس ! وعقابه في الاخره على عمره اللى ضيعه ربنا اعلم بيه!!
يعنى انا في مره دخلت عالنت وسالت عن المذاكره الصح بتكون ازاى!! وكنت في الامتحانات وتقريبا مش مخلصه ولا منهج بقيت بذاكر
طب ايه هو االنجاح ده!؟ النجاح من الجانب المهنى (وده اللى هنتكلم عنه النهارده) انك تشتغلي في الحاجه اللى بتحبيها وبتستمعى بيها حتى لو مكونتيش موهوبه فيها طالما الحاجه دى بتسعدك وانتى بتعمليها وبتحبيها يبقي دى احسن وظيفه هتطلعى فيها كل امكانياتك وهتبدعى فيها وهتتميزى وهتستمتعى بوقت شغلك !!
النجاح في حياتك ليه طريق واحد "ان قيمتك كشخص تساوى قيمة الوظيفه اللى انتى عايزه تشتغليها "
وفي مصر معظم الوظايف قيمتها 3 حاجات
اول حاجه :انك تتكلمى انجليزي زى الاجانب
تانى حاجه:انك تقرأى وتفهمى وتحفظى احسن 5 كتب في مجالك
تالت حاجه:انك تفكري وتتصرفي وتتكلمى بطريقه احترافيه
ودى معناها انك تعملى شغلك وتتصرفي وتتكلمى بطريقه صح زى المحترفين في مجالك ما بيفكروا ودى هتيجي من انك تتعلمى منهم عن طريق الخطوه اللى قبلها انك تقري احسن 5 كتب في مجالك وتفهميهم وتحفظيهم وانك تشوي نفسك وتتتصرفي على اساس الوظيفه الى انتى عايزاها يعنى انتى مثلا عايزه تكونى مدير يبقي فكري واتعاملى واتكلمى زى المدير العام بنفس الثقه ونفس المعرفه الواسعه والثقافه والنشاط والدقه في الشغل لان اى غلطه بتحصل منه بتاثر عالشركه كلها فبيكون حاسس اوى بالمسئوليه وده المطلوب
(هنا ممكن ناس تتفهمها على انك تتكلمى ب ألاطه زيهم ) لأ اى حد ناجح بيتصرف بغرور بيفشل دى قاعده عامه !! لو مش فشل وظيفي بييبقي فشل اجتماعى!
*************************************
ما تقوليش حتى لو عملت ال 3 حاجات دول مش هقدر اشتغل الوظيفه اللى عايزه اشتغلها لأن معظم الشركات بتدور على الخبره وانا معنديش خبره ……الكلام ده صح في شركات كتير اووى بتدور على الخبره لكن في شركات اكتر بتدور على ال 3 حاجات دول ومش فارق معاها الخبره…..بس انتى اعملى اللى عليكي والباقي بتاع ربنا !!
وحتى لو فرضنا ان كل الشركات عايزه خبره….طب ما تعملى اللى عليكي وتاخدى بالاسباب وبعدين نشوف موضوع الخبره اتكلمى انجليزى زى الاجانب واقراى وافهمى واحفظى احسن 5 كتب في مجالك وبعدها اشتكى ان مافيش وظيفه محترمه ليكي عشان الخبره!
وساعتها لو لقيتى وظيفه هتكونى جاهزه وقيمتك تساوى قيمة الوظيفه المحترمه !! طب انتى دلوقتى بتشتكى انك مش لاقيه وظيفه محترمه علشاان الخبره طب افرضي لقيتى هل قيمتك كشخص تساوى قيمة الوظيفه المحترمه خليكي جاهزه !
وماتقوليش اجيب فلوس كورسات الانجليزي منين!! لازم تشتغلي شغلانه مرحليه في حياتك !! ستيف جوبز مخترع الايفون والايباد والايبود وكل منتجات ابل ومؤسس شركة ابل وشركة بيكسار وهو اللى عمل الكرتون المجسم زى شريك وتوى ستوري ما كانش معاه فلوس يكمل تعليمه في المدرسه فكان بيلم الازايز الفاضيه من الزباله ومن جيرانه ومن الشارع ويديها لمصنع اعادة تدوير في مقابل مبلغ بسيط بيدفع بيه مصاريف المدرسه احنا هنا بنتكلم عن اغنى اغنياء العالم بلا منازع !! اينشتاين اشتغل في وظيفه صغيره جدا في مكتب تسجيل براءات الاختراع في اول حياته !! العالم الكبير فاراداى كان بيجلد كتب في مكتبه (فاراداى ده عالم ليه اكتشافاته كتير في مجال الكهربيات والمغناطيسيات وهو اللى اخترع الدينامو وصاحب فكرة تحويل الطاقه الحركيه لطاقه كهربيه)
اشتغلى في التسويق او في اى شغلانه بسيطه مش عيب بس العيب انك ما تحققيش هدفك ويبقي مالكيش دور في المجتمع ! ابداى من بكره لمدة 30 يوم كل يوم انزلى دوري على شغل وشوفي في الجرايد واسالى صاحباتك واهلك !! اشتغلى في حضانه تدخل لك فلوس تقدري تاخدى بيها الكورسات اللى انتى عاوزاها او روحى مقرات جمعيى رساله بتقدم كورسات مجانيه او خدى الكورسات عالنت في الموقعين دول
1- اكاديمية الدارين للتعليم عن بعد و فيه جميع انواع الكورسات وتعليم اللغات
https://www.aldarayn.com/!
2- موقع انوار رساله للتنميه البشريه (وهتلاقي فيه مواعيد الكورسات في الفروع كمان )
https://www.anwarresalateam.org/
اتعلمى واشتغلي وحسنى نفسك وابهري اللى حواليكي باللى وصلتيله!
اعملى CV (سيره ذاتيه) محترمه وتشرف وانشريها في كل حته في مصر على مواقع التوظيف في الشركات في شركات التوظيف وربنا هيجازيكي على تعبك وهتلاقي الوظيفه اللى انتى عاوزاها !!
وما تقوليش الناس اللى بتلاقي شغل حظها كويس لان مافيش حاجه اسمها حظ !! الحظ ده تعريفه "فرصه لاقت منك استعدادا" فدول ناس كان عندهم استعداد ولقوا فرصه ف احنا شفنا ان حظهم حلو واللى بيشتغل ربنا بيبعتله صدقينى! وقليلينم اووى اللى لاقوا من غير استعداد وغالبا مش بيكملوا عشان مافيش شركه بتدفع مرتب من غير مقابل يعمل تغيير في الشركه!
وده مركز تعليم انجليزي هيحققلك انك تتكلمى انجليزي زى الاجانب (دى صفحة تعريف فكرة الاكاديميه)
https://www.notcourses.com/videoNew.html !!
وتوكلي دايما على ربنا وما تياسيش مهما حصل "وانه لا ييأس من روح الله الا القوم الكافرين" صدق الله العظيم ربنا مكن يحققلك كل اللى انتى عايزاها بس اتعبي واجتهدى وقربي منه
الموضوع اخدت فكرته من الفيديو ده
اذا لم يعمل المقطع فاضغطي هنا
لو اى حد عايز ينسخ الموضوع في اى مكان تانى بس يحط لينك الموضوع في فتكات في اخر الموضوع انا معنديش اى مانع !
ادعوولى ربنا يثبتنى وانتظم على الصلاه على طوول وادخل الكليه اللى انا عايزاها !!
emy272 emy272 288387_5.gif فتكات متميزة Fatakat 288387 cairo – egypt