حبيباتي الفتوكات ربنا يسعدكم كلكم ….. قريبت كثير في المدونة عن تجارب للحقن المجهري ربنا شاء لبعضها إنه ينجح وبعضها ربنا لسة يريد إختبار صبر البعض عشان ربنا شايل له أحلا من اللي كان نفسه فيه …
مش هطول عليكم بس حبيت أحكيلكم تجربتي عشان الإفادة ولوي استفسارات براحتكم بس إن شاء الله هتلاقوا الموضوع متكامل
أنا متجوزة من أكثر من 5 سنين عن حب بس ربنا ما أرادش يكون فيه حمل عشان شوية مشاكل بقت عادي اليومين دول بسبب التلوث اللي عايشين فيه وضغطة الشغل وأغلب أزواجنا زي اللي مربوط في ساقية عشان يوفر حياة كريمة لأهل بيته … ربنا يعينهم…
المهم إني بعد سنة من الزواج رحنا كشفنا وعرفنا إن فيه مشكلة وزوجي عمل اللازم وبرده ربنا ما أرادش يحصل حمل فبعدها بسنتين رحنا عملنا محاولة تلقيح صناعي بس ربنا ما شاء إنها تنجح بس المحاولة دي اتكلفت حوالي 1400 جنيه بالأدوية والتحاليل المطلوبة ودي كانت عبارة عن أدوية تنشيط بتتاخد من بعد الدورة على طول ولحد اليوم ال 13 تقريبا وكنت عملها مع د نشوى السعيد ممتااااااااااااازة جدا وكانت في مركز دار المرأة في روكسي … العملية نفسها كانت بحوالي 1000 جنيه … وكل اللي بيتم فيها إنها بتاخد عينة من الزوج ويتم تنشيطها ويتم حقنها في ميعاد التبويض للسيدة كإنها في علاقة عادية وعلى ربنا التساهيل …… فكرنا نكررها تاني بس أنا مكنتش حابة كدة رغم إن الموضوع بالشكل ده مش مكلف بس قلت الموضوع ده ممكن برده ما ينجحش ونكرر الموضوع ده 4 أو 5 مرات فلما حسبتها قلت ما تخلينا نحوش المبلغ ده ونعمل بيه مرة واحدة كدة كتجربة موضوع الحقن المجهري ….
وفعلا بعد سنتين استخرنا ربنا وقلت إني هعمل الموضوع ده طبعا زوجي مكنش موافق عالموضوع عشان شايفه مكلف وبيبقى فيه استغلال ومش بينجح برده من أول مرة بس والدتي ربنا يخليها ادتني الفلوس وقالت لي إن شاء الله لما تنجح ابقي رجعيهم … …. ربنا يخليهم همة دايما اللي واقفين معانا …وطبعا والدي موافقها تماما ….. وفعلا رحت لدكتورة نشوى عشان أجرب معاها الموضوع ده …. من أمانتها قالت لي إنها مش بتشتغل حقن مجهري ولكن هرشح لك دكتور كويس تتابعي معاه وفعلا قالتلي عليه……
وفعلا رحت للدكتور ده … ربنا يبارك له
تاريخ الذهاب للدكتور : 17/2/2015
الطبيب المعالج : د. خالد سعيد محمد موسى
العنوان : 15 شارع عثمان بن عفان – ميدان صلاح الدين – مصر الجديدة – الدور السادس.
وقت الزيارة : الساعة 4 العصر.
طبعا أنا رحت لوحدي لأني مش هستحمل إن زوجي مثلا يزهق من ساعات الإنتظار في العيادة وأنا كنت محتاجة أعصابي تكون هادية وبراحتي وبرده مش عاوزة أعرف حد عشان مش بحب أتعب حد معايا في مشاويري الخاصة
بدأت الرحلة بدخولي العيادة – العيادة نظيفة ويظهر أن أغلب المترددين عليها ناس محترمة جدا منهم اللي فرحان إن ربنا كرمه وغيره بيتباشر بفرح الناس دي– تستقبلك فتاة بابتسامة في مدخل العيادة وتسألك ان كنت كشف واللا استشارة .
أنا كنت كشف ودفعت 200 جنيه رسم الكشف وعملت لي كرت سألت فيه عن اسمي وسني واسم زوجي وانتظرت حيث أن الدكتور يبدأ العيادة الساعة 4 ونص وبالفعل في الميعاد المحدد جاء الطبيب وكان دوري رقم 7 في الكشف وعندما دخلت وجدت الطبيب شكله هادئ ومبتسم …. سألني عدة أسئلة عن مدى انتظام دورتي وهل كنت مصابة بأي أمراض أو أجريت عمليات وما هي الأدوية التي أستخدمها الآن وبدأ في فحص كل الأوراق التي أحضرتها معي والشهادات الطبية واستمع كويس جدااااا لكل ما قلته …. وسألني ناوية تعملي العملية امتى؟ فقلت له وقت ما ربنا يأذن في أقرب فرصة ممكنة …. قال لي انه لازم أعرف ان نسبة النجاح 50-60% وانه العملية بتتضمن جرعة تنشيط للمبيضين – وبعد التنشيط بيتم سحب هذه البويضات تحت التخدير الكامل وبعدين بياخدوا عينة من الزوج ويعملوا ليها التنشيط المناسب والتلقيح وده بيتم في المختبر وتعاد الأجنة المخصبة بواقع جنينين بعد حوالي 3-5 أيام ثم يتم متابعة العملية.
أيضا قام الدكتور بعمل سونار مهبلي …. والبنت المساعدة ليه هية اللي حضرتني وشغلت الجهاز وده كان في غرفة منفصلة ملحقة بغرفة الكشف والدكتور جه على الفحص مباشرة – الحمد لله قال ان حالة الرحم والمبيضين كويسين جدا.
بدأ الدكتور يكتب لي على جرعة الدواء اللي همشي عليها وهية عبارة عن:
12 حقنة decapeptyle نص حقنة يوميا تحت الجلد – بديها لنفسي – وأسبوسيد أطفال قرص يوميا و فوليك آسيد قرص يوميا وسيدوفاج قرص يوميا .
30 حقنة menogon 75 I.U. بمعدل 3 حقن في سرنجة واحدة من ثالث يوم الدورة مع استمرار الدواء السابق.
وطلب تحليل دم يستخدم لتوضيح مدى امكانية حدوث إجهاض في المستقبل خاص بأجسام المناعة اسمه Anti cardiolopin anti bodies IgG , IgM واختبار تاني اسمه Lopus anti cogulent .
وأروح له 7 أو 8 أو 9 يوم من الدورة الجديدة.
وأنا مليانه شوية وسألته وزني ليه علاقة بنجاح أو فشل العملية ضحك وقال لي لااااا وإنه ابتدى مع ناس أوزانهم أكثر مني بكثير والموضوع نجح معاهم وإن الموضوع ده بالذات هو توفيق أو عدم توفيق من عند ربنا.
التكلفة لهذه الزيارة = 200 جنيه كشف + 450 جنيه الدواء الأول + 1500 الدواء الثاني + 500 جنيه التحاليل المطلوبة ( عملتها في معمل الجمعية الشرعية ب 240جنيه) = 2650 جنيه أو 2410 جنيه.
تكلفة العملية لوحدها = 7500 جنيه.
تكلفة تجميد الأجنة = 1500 للأنبوبة الواحدة وتحتوي على 3 أجنة.
التكلفة الإجمالية إن شاء الله من غير أدوية ما بعد التلقيح حوالي 10150 جنيه غير تجميد الأجنة.
بيني وبينكم كان إحساسي الشخصي : زعلانة جداااااا من زوجي لأانه ما اهتمش ييجي معايا واكتفى بتليفون يطمن عليه بيه وفضل يزود من قلقي إنه احتمال يسافر في شغمصر الأسبوعين الجايين ههههههههههههههههههههه وأنا ناقصة يا عم الحاج … احساس وحش وأنا شايفة ستات كتير حولي وكل واحدة معاها زوجها وأحد أفراد أهلها أو زوجة وعاها ناااااس كثير أو هية وزوجها فقط وأنا قاعدة لوحديييييييي ما حدش بيشجعني ولا يحسسني إنه جنبي … اتحرجت أقول لحد تعالى معايا – ماما حماتي صاحبتي قريبتي – كلهم مكانوش هيعرفوا يعوضوا الإحساس ده زي وجود الزوج … وأفكر العمر بيجري وبنت العشرين بقت بنت الثلاثين….
الحمد لله في الآخر حسيت إن ممكن ربنا يرضى علية وأفرح أهلي وأهله بحفيد يشيل إسم العيلة وابن أو بنت أتسند عليه/ها لما أكبر ويبقى لي معاه/ها ذكريات حلوة مش كل ذكرياتي مع أولاد غيري…..
وفضلت أدعي يارب سهل لي الأمور …. رب لا تذرني فردا وأنت خير الوارثين …
النهاردة يوم الأربعاء الموافق 26/2/2015 وكانت الزيارة الثانية للدكتور وهية في اليوم السابع من بداية الدورة الجديدة وماشية على العلاج مضبوط ولو إني زودت جرعة الحقن اللي تحت الجلد بدل من نص سرنجة لسرنجة كاملة يوميا باخد نص الصبح ونص بالليل.
دخلت للدكتور ووريته نتايج التحاليل اللي طلبها قبل كدة بص فيها ………. والإبتسامة تملأ وجهه وقال لي نموذجي وان التحاليل هايلة وكويسة جدااااا … الحمد لله.
قال هنعمل سونار عشان نشوف الأخبار إيه …. ودخلت وبرده دخلت البنت اللي معاه وحضرتني وفي السونار طمني الدكتور إن الأوضاع كويسة جدا وان ده اليوم السابع اتكون 3 بويضات كويسين … طلب بعدها إني أزود جرعة الحقن ل 4 حقن في العضل على 2 مل ماء من النهاردة وآجي ثاني يوم الأحد الجاي وإن يوم الأحد إن شاء الله هتكون آخر زيارة قبل العملية.
إحساسي الشخصي المرة دي فرحت كثير لما لقيت زوجي بيتصل بي قبل ميعاد الدكتور يطمن علية وصلت واللا لأ ولما كنت هناك وبعد ما خلصت كمان وفرحت قوي برده لما سألت الدكتور وقلت له إذا سافر زوجي قبل ميعاد العملية فيه حل؟؟؟؟ ضحك وقال لي لاااا عادي خليه يجيب العينة وهمة بيحفظوها ويكتب هوة تعهد بأن العينة دي تخصه وبإنه موافق وده زواج شرعي وكدة وقال لي الدكتور بيحصل كثير الموضوع ده هما يسافروا يشتغلوا برة البلد وهوة برده بيشتغل هنا بالتعهدات دي…. اطمنت جدا عشان الموضوع ده كان تاعبني قوي – يعني بعد الشكشة دي كلها وتعب العظم اللي أنا فيه يضيع كل ده عالفاضي – الحمد لله.
النهاردة الزيارة الثالثة يوم الأحد … اكتشفت إن النظام في العيادة بتدفعي كشف مرة وليها استشارة مرة ولو جيتي استشارة ثاني بتدفعي كشف جديد … دفعت واستنيت دوري ودخلت للدكتور قال الأوضاع كويسة وآجي يوم الثلاثاء
اليوم الثلاثاء : آخر زيارة قبل العملية واستنيت لحد ما جه ودخلت الساعة 8 وقال الدكتور إن أنا كدة جاهزة كتب لي على حقنة لازم آخدها بعد ما أخرج من عنده على طول مع جرعة الدوا العادية بتاعتي وهاجي الخميس الساعة 8 الصبح في مركز إيليت للخصوبة بمستشفى صفوة الجولف خلف سنترال ألماظة في 25 شارع محمد المهدي متفرع من شارع عبدالله دراز.
خرجت ورحت للصيدلية عشان آخد حقنة الكورميون اللي قال لي عليها وكانت قدام العيادة بتاعته دخلتها وخرجت منها مرتين عشان مكنش فيه بنت تديني الحقنة وبعدين قررت أروح الطوارئ بتاعة مستشفى كليوباترا في نفس الشارع وفعلا دخلت ورحت لقيت مسز آية الممرضة ادتني الحقنة . ودعتلي بالتوفيق ربنا يسمع منها .
اليوم الخميس 6/3/2015 يوم العملية … رحت أنا وزوجي الصبح …. ركبنا تاكسي ووصلنا بسرعة ودخلنا لقينا المستشفى نظيفة وحلوة وفعلا الساعة 8 جه أستاذ علاء المسئول وخدني وطلعنا غرفة خاصة بينا وبعدين الساعة 8 وثلث جت ممرضة وادتنا كوب خاص بالعينة بتاعت زوجي …. هههههههههههههههههههههههههه فضلت أضحك وزوجي طبعا زي عادته مش بيطيق المواقف دي ….. – بس عامة كان المود العام لينا حلو – وفضلنا فاتحين قناة الحرم وسمعنا قرآن وأنا كنت عمالة أدعي في سري ربنا ييسر لينا الحال والحمد لله على كل شيء.
الساعة تقريبا عشرة إلا ربع جت الممرضة تاخدني عشان نعمل العملية بتاعت سحب البويضات وهية هتكون تحت بنج كلي ولبست اللبس بتاع العمليات ودخلت الأوضة لقيت الدكتور مستنيني وطبيب التخدير وركبولي الكانولا وفضلوا يهزروا معايا شوية …. أنا كنت قلقانة وفضلت أتشاهد وأستغفر ربنا وأقول الحمد لله ويارب سهل الأمور لحد ما اشتغل المخدر وما صحيتش غير في أوضتي تاني وجنبي زوجي بيضحك وأنا بقول له افتح لي عيني ….. قعد يحكيلي عاللي قلته وأنا بفوق وفضلت أنده إسمه وأقول حبيبي وبحبك وهوة كان مكسوف عشان الممرضات واقفين وبيبصوله ….. هههههههههههههههههههههههه – آه لو يعرف إني فعلا بحبه أكثر ما يتصور – وبيقول لي كمان فضلتي تضحكي وتقولي الحمد لله …
فقت وجاب لي عصير وشيكولاتة وغيرت هدومي وخرجنا عالساعة 12 وداني عند ماما وباب وراح شغله وأنا قعدت معاهم شوية وروحت عشان أرتاح وأنتظر مكالمة المعمل يقول لي حصل إخصاب واللا لأ وميعاد النقل امتى.
اليوم السبت 8/3/2015 اتصل المعمل وقال لي حصل إخصاب وميعاد النقل يوم الأحد ….
اليوم الأحد 9/3/2015 ورحت الساعة 9 ونص وطبعا الطريق زحمة ومكنش فيه تاكسي …. بس الحمد لله وصلنا … ولقيت أخويا جايب ماما عشان تفضل معايا اليومين دول – ربنا يخليها- وطلعت حضروني برده كإني داخلة العملية ودخلت نفس الأوضة بس المرة دي كان معايا ممرضة بس قعدتني في وضعية كشف النساء وجه الدكتور سلم علية وهزر عشان يفك القلق اللي كنت فيه وقال لي إن تم تخصيب 5 بويضات هينقل منهم 2 ويجمد 3 فقلت له لا بالله عليك انقل 3 وجمد 2 ضحك وقال لي خلاص براحتك وفعلا مفيش ربع ساعة كان خلص وفضلت طول الوقت أدعي " يامن أمسكت السماء بلا عمد استودعتك أجنتي فاحفظها وارزقني أطفالا أصحاء بلا نقص ولا زيادة ، اللهم جنبنا الشيطان وجنب الشيطان ما رزقتنا وترزقنا وسترزقنا به يا أرحم الراحمين ، رب لا تذرني فردا وأنت خير الوارثين ، رب إني وهبت لك ما في بطني محررا لوجهك تعالى فأكرمني " والإستغفار والحمد لله وخرجت لأوضتي ونمت يمكن ساعة ونص ومبقتش قادرة عاوزة أدخل الحمام وفعلا خلت الحمام واستنين الدكتور جه قال على التعليمات وهية استمر على الفوليك آسيد مرة في اليوم وأسبرين الأطفال مرة في اليوم والدوفاستون 3 مرات وكتب لي على حقن تثبيت مرة في اليوم اسمها Prontogest وفضلنا لحد الساعة 12 ونص هناك وبعدين روحنا .. وقال لي هنعمل تحليل الحمل بعد 14 يوم إن شاء الله .
أسعد لحظاتي دلوقتي وأنا شايفة الإهتمام من زوجي وهوة اللي بيديني الحقن رغم إنه بيخاف وما اداش حقن قبل كدة بس أنا بعملها له وأشاور له عالمكان وهوة يديها …. طبعا غير خوفه والدلع ….. ربنا يخليه ويكرمنا عشان أفضل أشوف الفرحة دي فعينيه ولسة في الإنتظار رغم شوية التعب اللي جاي في ظهري وبطني وألم في صدري خفيف بس يارب تكون دي بشارة خير يارب وأنا مش بحاول برده أدلع والكلام ده عشان ربنا يكرم . حتى والدتي لما قعدت معايا ما خلتهاش تعمل حاجة وقلت يارب اليوم اللي هية قاعدة معايا فيها أريحها شوية من تعب البيت حتى لو كان على حساب العملية بحبها قوي ويمكن ده اللي خلى الموضوع ربنا يكرمني فيه إني متعبتهاش وفرغتها للدعاء لية وبس.
الحمد لله ….. رب لا تذرني فردا وأنت خير الوارثين.
وطبعا الحمد لله لما رحت عملت التحليل طلع فيه حمل والحمد لله أنا حامل دلوقتي في توأم بنوتين وفي أو السابع ….. دعواتكم بقى وعاوزة اللي تدخل تدعي لي ولبنات المسلمين والمؤمنين أجمعين بالذرية الصالحة والزوج الصالح وتقولولي على أسعار الولادة والمستشفيات الحلوة والحضانات بكام للناس اللي عارفة عشان نفسي أعمل عقيقة بس مش عاوزة ألاقيني صرفت كل الفلوس في الولادة ….. وأي استفسار تحت أمركم ….. ربنا يسعدكم كلم ويرزقكم بكل ما تتمنوا
nanya1984 nanya1984 فتكات نشيطة Fatakat 1177228 القاهرة – مصر