ازيكو يا فتوكات وأخباركم ايه وعاملين ايه في الصيام
ربنا يتقبل منا جميعا ويعيننا على ذكره وشكره وحسن عبادته
انا انهردة جاية عشان احكيلكو تجربتي الشخصية مع النحافة , يعني الموضوع ده مش منقول وان شاء الله حرد على اى سؤال من أي حد بخصوص الكلام الى حقولو هنا , وعلى فكرة انا كنت نزلت الموضوع ده قبل كدة فى منتدي تانى والحمد لله نال اعجاب البنات وأسأل الله أن يجعل فيه فائدة ومنفعة لكم
باختصار الموضوع ده خاص بالبنات النحاف اللى حابين يزيدوا وزنهم
أنا قاسيت كتير أوي من النحافة والحمد لله رب العالمين تخلصت منها وبتمني من ربنا ما يعيد الأيام الوحشة دي تاني -قولو ما شاء الله و ادعولي بالثبات يا بنات بالله عليكم لأني حصلت لي ظروف اتسببت فى ان وزني بدأ يقل – بس الحمد لله مش كتير حوالى 2 أو 3 كيلو كدة
المهم لازم تعرفو ان ده كلام من قلبي
أنا عشت طول عمري نحيفة ولا مرة زاد وزني برغم اني جربت كل الطرق والوصفات والفيتامينات لكن ولا شئ أفادني
عارفين ليه؟؟
لأن كان عندي أنيميا نقص حديد ومكنتش عارفة , أو بمعني أصح كنت بتعالج منها شوية وبعدين ما أستمرش عالعلاج فبترجع تاني الأنيميا ده غير ان شهيتي للأكل كانت جدا ضعيفة ومكنتش بقدر أكمل رغيف عيش على بعضه وبمجرد ما أبدا أكل أحس انى شبعت علطول إلي جانب طبعا عدم الثقافة الغذائية وعدم تناول الجسم للخضروات والفواكة بسبب انعدام الشهية وكمان بسبب سوء الحالة النفسية وعدم الثقة بالنفس وتعليقات الناس لما يشوفوني ويقولولي مالك رفيعة كدة ليه ؟ معقول انتى سنك كدة ؟ شكلك طفلة كأنك لسه في المدرسة ….. إلخ من التعليقات السخيفة اللى تحرق الدم
المهم
قررت أروح لدكتور سمنة ونحافة وفعلا رحت من ايام ما كنت فى الثانوية لكن بغبائي كنت لما أبدأ أحس بتحسن أبطل أروح وأقول ححاول أستمر على نفس النظام اللى عمله لى الدكتور بنفسي وطبعا كنت برجع أفقد الوزن الى زدتو لعدم المتابعة وعدم الإرادة.
لحد ما قررت أنتظم مع الدكتور وأستمر للآخر لحد ما أوصل للوزن المطلوب والحمد لله فعلا تابعت معاه للآخر ولحد دلوئتى بتابع معاه كل شهريين مرة و لأول مرة فى حياتي وزني يزيد ولأول مرة أحس بتغيير فى لبسي ومش قادرة اوصفلكو اد ايه كنت فرحانة لما كنت الاقي هدومي ضاقت عليا ياااااااه احساس عمري ما حسيتو قبل كدة – اصلا عمر ما كنت الاقي حاجة ضيقة عليا هههههههه – ولأول مرة لما بطلع عالميزان أشوف المؤشر بيعدي ال50 ويقرب من ال 55 بعد ما كان أٌقصي وزن بشوفو عالميزان حوالي 43 (من فترة وزنى وصل ل 61 بس عشان الظروف الى قلتلكو عليها حاليا انا بقيت 58 او 57 )
خلاصة الكلام ده واللي بتمني من قلبي انو ينفعكم لأن النحافة دي معاناة ومشكلة كبيرة جداااااااااااااااا جدا لا تقل معاناة عن مشكلة السمنة بل العكس والله
كل واحدة عايزة تتخن لالالالالالازم تتبع الخطوات الى حقولها دي :
1- الأنيميـــــــــــا
اذا كنتي نحيفة وشهيتك ضعيفة وعايزة تتخني أول حاجة لالالالالالالالالالالالازم تتأكدى من عدم وجود أنيميا وده حتعرفيه من تحليل صورة الدم لأن حسب ما قاللى الدكتور الأنيميا كارثة بتدمر الصحة و الشهية والنضارة بشكل عام
ومهما أكلتي اذا عندك أنيميا الغذاء مش حيبان عليكي والدكتور قال لي ان فيه علاقة بين ضعف الشهية والأنيميا لذلك أووول خطوة هي علاج الأنيميا وأنا كنت استخدمت كبسولات حديد اسمها ( هيموتون ) لمدة 6 شهور والحمد لله بعد ما عدت التحليل ارتفعت نسبة الهيموجلوبين في الدم ومن وقت ما الانيميا راحت والله يا بنات وانا حاسة ان شهيتى بقت تمااااااام بقيت اقوم من عالغدا بعدها بساعتين احس انى جعععععااااااانة جدا لدرجة انهم فى البيت اشتكو مني وقالولى ارحمينا ههههههههه
2 – التركيز على الأكلات عالية السعرات الحرارية
وانتو طبعا عارفينها زى مثلا المكرونات والمخبوزات والحلويات وحاولوا يكون في البرنامج كمية ولو قليلة من الخضروات واذا كنتي مش بتحبي السلطة زيي فممكن تاخدى ثمرة واحدة من كل صنف بحيث تكوني أكلتي ما يعادل فنجان كبير من الخضروات زى الطماطم والخيار والفلفل والجزر مثلاوده عشان بشرتنا تبقى نضرة والغذا يبان على وشنا
3-الحلبـــــــة
يلهووووووووووي دي بقي قصة لوحدها , الحلبة يا بنات رهييييييييييييييبة جدا والله وكل اللى بقولو ده عن تجربة شخصية وكاتباه بايديا مش منقول وأنا مش حقول حاجة إلا لو كنت جربتها وجابت معايا نتيجة
من ضمن برنامجي كنت كل يوم لازم أخد معلقة ( حلبة حصي ) يعني مش مغات عشان انا مبطيقش المغات وكنت أحط عالنار كوباية ميا وأغليهم شوية وبعدين أحط عليهم تلات معالق لبن نيدو أو دانو اى حاجة مع السكر وأشربها , أنا لما استمريت عليها مكانش فى بالي نحافة ولا سمنة ولكني لاحظت بعد فترة من الاستعمال بتغير راااااااااائع فى جسمي خاصة صدري ووشي واقسم بالله يا بنات انى زمان مكانش ليا صدري خالص لدرجة كنت وانا خارجة بحط أوبليتات فى الستيان هههههههههه ( فضايح والله ) تعالو شوفو دلوئتى والله بدور على طريقة لتصغير الصدر ههههههههههه لأن الحلبة معروف انها بتحفز الجسم على افراز هرومونات الأنوثة وده السبب فى استخدامها فى بعض مستحضرات نفخ الصدر والوجه .
ايه كمان 
4- ضرورة الأكل بين الوجبات :
وده أهم حاجة , بمعني انك مينفعش تكتفي بالوجبات التلاتة الأساسية وخلاص وتقولي أنا كدة عملت اللى عليا , لالالالاء مينفعش , لو مهما أكلتي فى الوجبات الأساسية لازم تحاولي تاخدي أي حاجة بين الوجبات ومتسيبيش معدتك فاضية لأكتر من أربع ساعات ( والكلام ده بقولو لنفسي معاكو لأني حاليا الدنيا باظت ورجعت مأكلش بسبب الظروف الغلسة الى بمر بيها , المهم نرجع لكلامنا ) , يعني مثلا بعد الفطار حاولي تعمليلك كوباية نسكافيه أو كابتشينو ولو كابتشينو يبقى أجمد وتاكلي معاه كيك أو أي شئ تحبيه , وبين الغدا والعشا حاولي تشربي عصير وتاكلي فواكة أو خضروات أو حلويات أو لو حسيتي بالجوع مفيش مانع تقومي تعمليلك ساندويتش أو تعمليلك طبق مهلبية بالحليب مثلا , وحاولي تأخري العشا بحيث تاكلي وتنامي قبل ما تعملي مجهود يتسبب فى لحرق اللي أكلتيه ودى نقطة مهمة اوى للى عايزين يتخنو مع انها مش صحية , كلنا بنسمع الدكاترة بيقولو للى عايزين يخسو يحاولو مياكلوش بالليل من بعد الساعة عشرة لسببين اولا ان الواحد لو كل ونام الاكل ده حيتحول لدهون تتخزن فى الجسم بعكس لو أكل ومارس اى نشاط او مجهود الاكل حيتحرق , احنا بقى عايزين نعكس الكلام ده يعنى ناكل من هنا وننام علطول عشان الاكل ميتحرقش باى مجهود , السبب التانى بيقللك ان معدل حرق الجسم بيقل بالليل يعنى لو أكلنا بالليل صعب الجسم يقدر يتخلص من الأكل بسهولة عشان معدل الحرق أقل .
وعشان تاكلي ده كلو لازمك طبعا شئ يفتح الشهية , أنا عن نفسي جربت حاجات كتير منها الموسيجور ومنها تريزوركس وآخر محاولاتي كان حبوب سيبروفيتا لكنها مش موجودة غير بالكويت ولبنان طبعا بالإضافة للأعشاب اللى كان بيديها لي الدكتور اللى انا بتابع معاه
اذا قدرتى تروحي لدكتور كويس يتابعك ويشجعك بيكون أفضل طبعا لأن الدكتور بيحمسك للأكل وانتى مرة مع مرة لما بتروحي وتشوفي وزنك زايد بتتحمسي أكتر وبتحسي إن الموضوع فيه منه أمل .
آخر شئ في بالي الآن
5- الرياضـــــــــة
ايوا الرياضة , متستغربوش , الرياضة مفيدة جدا للجسم ولتحسين الدورة الدموية لكن الشائع ان الى بيلجأوا للرياضة لتنسيق جسمهم هم التخان
لكن أنا وعن تجربة لما سمعت ان الرياضة مفيدة كمان للنحافة نزلت اشتريت جهاز الأوربتراك وقعدت اداوم على استعماله على خفيف زى ما قال لي الدكتور
يعنى قبل ما آكل كنت أستخدمه ببطء لمدة عشر دقايق بس وبعد ما أنزل منه آكل مباشرة , الجهاز فادني جدا في تعريض ذراعاتي اللى كانو ضعاف جدا جدا , من بعد الرياضة حسيت شكل ذاعاتي اتغير كتير واصبحت عريضة أكتر لأن العضلات اللى فيها نمت وكبرت وده طبعا عمل شكل جميل للذراعات أحلي من أول كتير .
شئ أخير بقي بس ده بعد ما تتبعو النصائح دي وتزيد أوزانكم إن شاء الله
ضرورى جدا لأي بنت بتتبع نظام غذائي سواء للتسمين أو للتنحيف الإهتمام بترطيب جسمها كويس جدا , لأن أنا للأسف بعد ما وزني زاد ظهرت لي مشكلة مكانتش علي بالي وهي : الخطوط البيضا والحمرا , دكاترة الجلدية بيسموها ( التفاتيح ) ودي خطوط بتظهر على الجسم نتيجة لزيادة حجم الجسم بعد السمنة بسبب تمدد الجلد بصورة مكانش الجسم واخد عليها – زى ما تقولي كدة انك فاجأتي جسمك بشئ غريب عليه _ وطبعا بما اني كنت طول عمري نحيفة ولا عمر وزنى زاد طلعت لي الخطوط دى فى مناطق معينة زى الأرداف وانزعجت جدا لما قرأت بالمنتديات ان آثارها صعب تروح لكن تقدري تتجنبي ظهورها بالاهتمام بترطيب جسمك بالقدر الكافي أثناء تغير الجسم
خدو بالكو من النقطة دي أوي يا بنات لأننا مش معقول حنصلح حاجة ونخرب حاجة تانية
خلاص ده كل اللى كنت عايزة أقولو وبتمني أكون قدرت أفيدكم ويارب ينول كل واحدة اللى في بالها والسمينة تنحف والنحيفة تسمن ونقدر نستمتع بحياتنا في رضا واستقرار نفسي و طاعة لله عز وجل
وكل سنة وانتو طيبين : )
habhooba24 habhooba24 images/avatars/orangeflower.gif فتكات رائعة Fatakat 159902 القاهرة – مصر