ازيكم يا قمرات
بعد ما شجعتوني في مواضيعي الاول و الثاني الخاصة بالمطبخ الياباني المصري
ودي اللينكات بتاعتهم
هوسوماكي سوشي من مطبخ dr.yama المصري الياباني
الحلوى اليابانية دايجاكو ايمو من مطبخ dr.yama الياباني المصري
النهارده ان شاء الله هقدم لكم وصفة لأشهر الاكلات اليابانية و هي كرات الارز onigri
الاكلة دي عند اليابانيين بيعملوها لكل الاوقات يعني فطار و غدا و ممكن كمان في العشاء
و كمان دي زي الساندويتشات عندنا يعني بياخدوها معاهم الشغل و الرحلات ووو ……. لأن اليابانيين عندهم الارز هو الاساس في الاكل
لكن احنا عندنا العيش هو الاساس في الافطار و العشاء
المهم نيجي بقى للاونيجري
الوصفة الاصلية متنوعة جدا بس معظمها بتتحشي سمك بأنواعه ومأكولات بحرية
و كمان ساعات بيلفوها بعشب النوري و بتبقى شبيهة بالسوشي شوية
ان شاء الله هبقى اعملها مع وجبة بحرية
بس النهاردة هقدملكم نوع من الاونيجري اسمه yaki onigiri وده بيتعمل بصوص الصويا
تقدروا تعملوه مع اي وجبة
وتحشوه بالحشوة اللي تفضلوها
نبتدي بقى بالمكونات
طبق ارز ابيض مستوى أوي (لو معجن يبقى تمام ههههه)
صوص صويا
اي حشوة تحبيها حسب الوجبة اللي بتعمليها
انا استخدمت مشروم متبل بصوص الصويا و الملح و الفلفل
نيجي بقى للطريقة
هنحط صوص صويا على الارز
و نبل ايدينا بميه
و نعجنه ونشكله كور
ونحشي كل كورة بالحشو
وبعدين نضغط كويس عليها و نشكلها زي ما نحب (مثلث – قلب – …….)
و بعدين نحط عليها نقط صوص صويا على الوش و نرصها في طبق و ندخلها تحت الشواية لحد ما تتحمص و لونها يبقى دهبي او بني على حسب الرغبة
وبعدين نقلبها على الوش التاني و نحط نقط صويا صوص و ندخلها الشواية برضه
وده هيبقى الشكل النهائي
كرات ارز محمصة و مقرمشة و محشية مشروم
انا قدمتها مع ستيك بالمشروم و سلطة متنوعة
الوصفة دي ميزتها في كذا حاجة:
اولا تقدري تنوعي في الحشو و ممكن تعمليها ببواقي الاكل
ثانيا لو عاملة ريجيم تقدري تاكلي ارز بكمية قليلة
ثالثا تفتح النفس و خصوصا للاطفال المتعبين
رابعا بقى انتوا اللي تقولها بعد ما تقروا الوصفة
وده لأول واحدة هترد
douzo
مواضيع هذا القسم برعاية
dr.yama dr.yama 46_7.gif Free Soul can’t be tamed Fatakat 46 i wish to live in utopia – my world