ازيكم يابنات يارب تكونوا بخير
انا بكتبلكم اخر موضوع ليا ف قسم الحوامل بعد ما كنت قاعده ف القسم هنا تسع شهور هالم العزال واروح اشوفلى قسم تانى
انا الحمد لله ولدت يوم 14-5 وجبت حلا ربنا يخالهالى يارب ويحفظها من كل سوء
طبعا اللى كان بيشوف مواضيعى ف القسم كان بيشوف انى بحاول اولد طبيعى بعد قيصري
انا تقريبا عملت كل حاجه تولدنى طبيعى بس ربنا ماأردش بس اكيد خير ليا لانى كنت بادعى دايما بالخير اى كان
انا كنت والده قيصري من سنتين وشهرين ورحت لكزا دكتور وكلهم قالولى ادام كل حاجه عندك طبيعى لغايه الاخر هنحاول نولدك طبيعى
بشرط ان يجيلك طلق لوحدك ونبض البيبي والميه تكون كويسه ومفيش ضغط ولا اى مشكله
وفعلا الحمد لله كل حاجه كانت طبيعى للاخر
ومش عايزه اقولكم ع المشي اللى مشيته ف التاسع ف ايام كنت ممكن امشي بالاربع ساعات وكنت حاسه بالحوض وسع جدا
واصلا طول الحمل ابنى مطلع عينى وباتحرك كتير اوى
المهم عدى عشرين يوم ف التاسع وما ولدتش ولا جالى اى اعراض وكمان البيبي حجمها كان صغير ما مكلش تلاته كيلو
فمكنتش عايزه افتح وخلاص لغايه ما روحت لدكتوره غير بتاعتى قبل ما اولد باربع ايام وقلت اطمن قالتلى انتى عديتى كتير ف التاسع وغالبا هايبقي قيصري وتعاليلى بعد اربع ايام لو مفيش اعراض هانفتح
طبعا اترعبت وقولت لجوزى ازاى هايجيلى نوم قبليها وانا عارفه انى داخله عمليات وقولتله انا هافضل مع دكتورتى وخلاص
المهم كان يوم المتابعه عادى جدا وقبليها بيوم نمت عادى وفضلت ادعى الرقيه الشرعيه للحامل وادعى ربنا بانه يقدرلى الخير
ونمت عادى وصحيت وانا رايحه المتابعه قرأت سوره مريم
ورحت للدكتوره كشفت علياوضغطت ع الجرح بأيديها فوجعنى اوى فقالتلى انتى مش مستحمله ضاغطه يبقي اكيد مش هاتستحملى الطلق وحولتنى عمليات
انا كنت داخله مرعوبه اوى اكتر من اول مره يمكن اول مره كنت داخله وانا عندى طلق وباصوت واقولهم خلصونى فمكنتش ف وعيي
لكن المره دى داخله عادى وفضلت اقرى اذكار الممرضات جهزونى وانا داخله اوده العمليات كان ف واحده خارجه وانا شوفتها وخفت اكتر
المهم المستشفي دى اللى بيولد قيصري هو الدكتور الاستشارى وانا اصلا ما كنتش متابعه معاه ولا اعرفه بس الدكتوره بتاعتى قالتلى هو كويس
المهم دخل لاقانى مرعوبه فقعد يهدينى ويقولى ما تقلقيش وفضل يضحكنى عشان انا بطنى صغيره اوى فمكنتش باينه انى هولد فبيقولى انتى داخله تشيلى الانتفاخ الصغير ده
وبعدين سالونى بنج كلى ولا نصفي قلتله لا كلى طبعا انا كنت ميته من الرعب
المهم اخر حاجه فاكراها وهما بيدونى المحلول
وبعدين فوقت لاقتنى بردانه اوى وعماله اقولهم برررررررررردانه وهما عمالين يغطوا فيا
والوجع كان بشع كنت حاسه بسكاكين وعماله اقولهم عايزه مسكن قالولى احنا ادناكى هايشتغل دلوقتى وبجد كان وجع غير اول مره
حتى الرعشه دى اللى ف جسمى كله ماحصلتليش ف اول مره
وبعدين نقلونى اودتى وقضيت اول يوم تعبانه اوى بس كل شويه مع المسكن باهدى شويه وارجع تانى
وتانى يوم الحمد لله قومت واستحميت وبقيت احسن وابتديت امشي واتحرك طبعا ده ما حصلش اول مره
انا فاكره اول ماقومت اول مره ودوست ع رجلى اول حاجه جت ف بالى هو انا هابقي سليمه تانى
فيمكن ده اللى خلانى اطول موضوع النفسيه مهم جدا
وفعلا من تالت يوم ابتديت اتمشي واحاول اعتمد ع نفسي انى انزل من السرير وادخل الحمام
بس اللى تاعبنى الرضاعه انى كل شويه افضل اقوم واقعد بيتعب الجرح بس الحمد لله عدت ع خير
وف سؤال عايزه اسأله انا اول مره ولدت قيصري كانت الخياطه سلك مش ليزر
المره دى مفروض انهم قالولى ليزر
بس لما فكيت البلاستر ف المستشفي قبل ما اخرج شفت غرزه سوده ف بدايه الجرح ونهايته بس مش سلك خيط كده زى البلاستك فانا عايزه اعرف هو ده كده ليزر ولا لا وهل الخيط ده هايتفك لانه الفك بتاع السلك المره اللى فاتت وجعنى اوى
وفي الاخر ربنا يقوم كل الحوامل بالسلامه يارب ويرزقهم بالذريه الصالحه ويرزق كل مشتاقه يارب
وياريت تدعولى ربنا يكمل نفاسي ع خير وان حلا تطلع نسبه الصفرا عندها قليله وتخف بسرعه يارب
مامت نوسى مامت نوسى images/avatars/pinkflower.jpg سوبر فتكات Fatakat 408141 القاهره – مصر