بصو يا فتوكات انا بعمل الفول ده ولما ببقى محمره بطاطس وحاطه بيض وجبنه ومربى او اى حاجه جنبه مش بناكل غير فول
الوصفه كالتالى
1/2كيلو فول + 3معالق حمص+لمونه +طماطمايه صغيره جدا+3معالق عدس اصفر+1معلقه صغيره ارز
1/اولا ننقى الفول من اى طينه او شوائب تكون فيه عادة الحمص بيكون نضيف واللى عايشين فى مصر انا بجيب فول وحمص الضحا خطيروبعد ما ننقيهم نبل الفول والحمص من بالليل بماء ساخن بس لو هتصحى بالليل وانتى رايحه الحمام ولاحاجه وتغيريلو الميه يبقى بليه بميه سخنه لو ممكن تنسى تغيريها يبقى بليه بماء بارد
2/ نحطهم فالدماسه يعنى الفواله على النار واول مايغلى نضع اللمونه وتكون مقفوله زى ماهى عشان تمتص السواد والطماطمايه الصغنونه ونغطى ونوطى عالاخر بس لازم نكون حريصين انها تكون مغطيه
3/ بعد مرور ساعه ونصف نضيف معلقة الارز +العدس الاصفر اللى بيقولو نضيف العدس فالاول غلط ده هيخليها تلزق فالقعر ده غير ان العدس مش محتاج اكتر من ربع ساعه للسوا ونتركهم ساعات بياخد معايا ساعتين او ساعتين ونصف انا بسراحه بحبه زى العجينه بيبقى خطير اللى بيقولو بياخد 5 و 6 ساعات انا مش متخيله والله وعلى فكره دى طريقتى ويوم محبيت اجرب طرق تانيه بالخضره وحاجات تانيه كان الطعم وحش جدا ومتذودوش خالص فالمقادير وخصوصا الارز مره حطيت معلقتين عالنص كيلو كان الرز منفوش ومكنش حلو بس جربوه وانا اتحداكم لو مستواش فى اقل من ساعتين ونصف بس ابقى قلبيه وبعد ما بيستوى لو مش هناكل منه النهارده بسيبه يبرد واحطه فالتلاجه ولما اجى اعمل منه بجيب طاسه او طبق الومنيوم واحط 4 معالق زيت واقطع طماطمايه حمرا تكون مستويه يعنى واقطعها رفيع اقل من السلطه وارفعهم عالنار واوطى وسط بعد دقيقه واحده هتلاقى الطماطمايه دايبه فالزين اهرسيها بالشوكه وحطى فوقيها كبشتين صغيرين من الفول مصفى من الماء اللى استوى فيها وحطى ملح كمون وشطه وفلفل اسود وقلبيهم ووطى واتركيهم دقيقتين ونزليهم وضيفى عصير لمونه وادعيلى
على فكره انا بعمل مخلل زى اللى بيبقى فى مطاعم الفول والطعميه :sFun_bananaunripe :وهو
كالاتى بجيب بتنجان اسود صغير جدا وممكن الابيض تخيلو؟ مع كام قرن شطه خضرا واحمرهم فالزيت بس ما يحمروش يدبلو بس والبتنجان يصفر ويبقى طرى بس واكون محضره كام فص توم وافرمهم واحط شطه خضره وادقها مع التوم وفلفل اسود بس بسيط وشطه برضو حبه بسيطه واقطع طمطمايه وادقها برضو واحط عصير لمونه او معلقة خل وملح بسيط واتبل بيه الفلفل والبتنجان وارصهم فى طبق هو المفروض الحاجه دى تتبل قبل الاكل بساعه عالاقل بس مره عملتها وفطرنا على طول وكانت حلوه انا رغيت كتير معلهش بس عشان شرحتلكم بالتفصيل على فكره انا مش هجرب فيكم انا بجد مجرباه وقررت انى مغيرش طريقتى بسراحه من كتر اللى شفته بس فيه طرق تانيه حلوه برضو عشان محدش يزعل على فكره الطريقه سهله وبسيطه بس لما انا شرحتلكم بالتفصيل فانتو ممكن تحسو انه صعب والكميه دى بتكفينى انا وجوزى اسبوع مش بعمل اكتر من كده عشان بخاف لا يحمض لانى مبحبش اخزن فالفريزروهتدوقو الفول بتاعى يعنى هتدوقو الفول بتاعى بس مواضيع هذا القسم برعاية
nada h nada h 70636_1.gif فتكات رائعة Fatakat 70636 ************** – مصر
سبحان الله و بحمده