سلام عليكم يا بنات
عيد سعيد عليكم كلكم وكل سنة وانتم طيبيننن
ده اول موضوع ليا هنا في قسم الطبخ
النهارده حبيت اقولكم علي طريقة للفراخ عالطريقة الصينيه لاني بحب التشاينيس فود جدااا ومكنتش دايما بلاقيه وبيبقي غالي فقررت بقي اتعلمه والحمد لله بقيت محترفه بعمله لكل اهلي انا قلت لازم اشارك اخواتي الفتوكات في الوصفة دي ويارب تعجبكم وتفيدكم يارب
أولا المقادير :
1- فراخ بانيه متقطعه بالطول او مكعبات
2- صلصة صويا
3- جزر
4- بصل ويفضل يكون اخضر ولو مفيش اخضر مش مهم التاني
4- فلفل رومي ولو معاه كمان فلفل الوان يبقي ياريت
5- توم
6- جنزبيل بودرة او صحيح المهم الطعم يكون موجود
7- ملح -فلفل – بهارات- كزبره
8- صلصة وكاتشب وخل
9- نشا
10 – كرنب اخضر او احمر ورقات مش كتير وممكن نضيف كوسه وذره صفرا حلوة وماشروم لو مش موجودين عادي بس هما بيضيفو طعم حلو
11- مكرونه او رز حسب بتحبو مين
طريقة العمل :
أولا مرحلة تتبيل الفراخ :
بنجيب البانيه ونقطعه بالطول او مكعبات ضغيره ونتبله بالملح والفلفل والبهارات والزبادي وصلصه الصويا و متحطيش كتير لانها حادقة شوية وهي مركزة كمان
نتبل الفراخ كده ونسيبها في التلاجه عالاقل ساعتين ممكن تبيتيها لو تحبي بتبقي شكلها كده
بعد كده نيجي للخضروات اللي قلت عنها نقطعها كلها بالطول وبصو ممكن نستغني عن خضروات محدده بس الاساسي الفلفل الاخضر والبصل والجزر وفص او فصين توم بنقطع الخضروات كده شايفين الالوان وكل دي فوااايد
نبتدي بقي الطبخ اطلع الفراخ المتبله دي واحطها اشوحها عالزبده زبده بسيييط وشوية مياه عشان تستوي وبعد متستتوي اطلعها واحطها في طبق لوحدها بالصوص بتاعها وطبعا اتاكدو من الملح والبهارات
وبعد منطلع الفراخ في نفس الطاسه اشوخ الخضروات المقطعه الزبده واحط عليها صويا صوص وملح وفلفل وزنجبيل مقطع او باودر وكزبره وخدو بالكم متزودوش الملح اوي لان صلصة الصويا حادقه ودايما يابنات نصيحه دوقي الاكل شوف كلها اول متحطت تتشوح
اول مالخضار يبتدي يدبل اقوم حاطه شوية صلصه حمرا ومعلقة كبيرة كتشب بيديها طعم جامد ولو مفيش كتشب حطي صلصة وحبة سكر مش كتير بتدي طعم جامد وسنة خل بسيطه وهنعمل دلوقتي حاجة عشان نعمل صوص تقيله وحلوة بنجيب نص كبايه مياه وادوب فيها ملعقه نشا ادوبها كويس واحطها عالخضار والصلصه واسيبهم يستوي كويس واتاكد انها منشفتش عشان الصوص بسيبهم كلهم سوا ربع ساعه بالكتير واقوم اضيف الفراخ المعموله مسبقا واقلب ياخدو غلوة واطفي انا بحب الخضار يكون كرانشي كده بحسه احلي مش بحب اهريه لو بتحبي تسويه زياده سيبيه ده كان شكلها قبل مغرفها
وده شكلها في الطبق
ودي انا عملت جنبها نودلز الاندومي سلقتها بس محطتش الاضافات واغلب الوقت بعمل مكرونه سباجيتي او رز عشان اعمل اللون ده بقوم واخده حبه صوص بسيطه من الاكلة ونص معلقة صويا واقل فيها المكرونه عالنار ثواني تاخد اللون والطعم بس كده وده شكلها معلش معرفتش ازوق قوي جوزي اصله بيحب الاكله دي واستغرب اني بصور الاكل قالي بتصوري ليه مش هتعمليها تاني ولا ايه
يارب يكون موضوعي عجبكم وياريت اللي يعجبها تقيمني متكسفونيش شجعوني بليز وكل سنة وانتم طيبين
ادعولي ربنا يفرحني بالنونو مواضيع هذا القسم برعاية
rumaz rumaz 388018_2.gif سوبر فتكات Fatakat 388018 Cairo – Egypt