اولا كل سنة وانتو طيبين وربنا يبلغنا رمضان يااارب
ندخل بقى فى الموضوع
النهاردة عملالكم صنية فراخ بالخلطة وصوص الطماطم بس ايه بجد روووعة
اولا هنجهز فرخة تكون متوسطة الحجم ونقطعها ونغسلها كويس جدا ونتبلها بالاتى
بصلة كبيرة مقطعة
وزعتر
وفلفل اسود
وبابريكا
وقررررررفة اساسى
وملح
وجنزبيل
وكمون
ونقلبهم فى قطع الفراخ جيدا ونتركهم على الاقل ساعتين تلاتة
نغسل بقى حبتين طماطم حلوين كدة ونطحنهم فى الخلاط مع فصين توم وقرن فلفل ونص كوب ماء
ونركنهم على جنب
نجيب بقى طاسة تيفال او اى حلة المتوفر عندك ونحط فيها معلقة سمنة ونبدء ننفض قطع الفراخ من البصل ونحطها فى الطاسة ونحمرها من الجنبين بالشكل ده
نشيل قطع الفراخ وفى نفس الطاسة نشوح البصل اللى كنا متبلين فيه الفراخ لحد مايتبل وبعدين نحط فصين توم مفرومين
ونرجع عليهم الفراخ تانى ونقلب تقلبتين وننزل بالطماطم المعصورة
ونضع ملح وفلفل اسود حسب الحاجة
ونغطيها لحد ماتشرب الطماطم وتبقى بالشكل ده
هى لونها غامق وجميل بس الكاميرا بتاعتى الله يسامحها بقى
المهم نحضر صنية على قد الفراخ ونصب فيها خليط الفراخ وندخلها الفرن تكمل سوى لحد ماتنشف وتحمر خالص بالشكل ده
وادى طبق منها
طعمها حكاية ولا الصوص بتاعها يجنن
ندخل بقى على البطاطس فى الفرن
طبعا هنجيب بطاطس على حسب افراد الاسرة انا عملت 4 حبات وسط
وقطعتهم حلقات سميكة شوية
ونعصر اربع حبات طماطم فى الخلاط ومعاهم فص توم وربع معلقة سكر ونركنهم على جنب
ونخرط البصل حلقات ونحطة فى الحلة على النار مع حبة زيت او سمنة حسب ماتحبى
ونشوح البصل لحد مايتبل وبعدينن نحط عليه
فصين توم كبار مدقوقين مع قرن فلفل
وتقليبتين كدة ونحط البطاطس ونقلب كمان تقلبتين وبعدين نحط الطماطم المعصورة
ونحط بقى ملح وفلفل اسود وكمون ومكعب مرقة على حسب المذاق
ونغطيها ونسيبها لحد ماتبقى نص سوى
وبعدين نصب البطاطس فى صنية فرن وعلى الفرن لحد ماتتحمر وتنشف
بس انا ملحقتش احمرها لانى كنت مستعجلة والعيال جعانين ومش صابرين علية لا هم ولا ابوهم هههههههههههههههههه
نيجى بقى لاخر حاجة الرز بالقرفة والزعتر
نغسل نص كيلو رز كويس ونصفيهم من المية كويس
وبعدين نجهز حلة فيها معلقتين سمنة عليهم حبة زيت علشان يفلفل الرز
ونحط تلت كمية الرز ونحمره بالشكل ده
وبعدين نحط باقى الرز ونقلب لحد مايفلفل معانا خالص
نحط بقى معلقة زعتر ومعلقة قرفة وبعدين نحط الشوربة او المية ومعاها مكعب مرقة
ونغطيه ونسيبه على نار هادية لحد مايستوى
مش عايزة اقولكم بقى على ريحته بالقرفة والزعتر وااااو
كدة انا خلصت
يارب اكلاتى تعجبكم ومتبخلوش علية بتقييم صغير وعسل زيكم كدة
مواضيع هذا القسم برعاية
ام جو ام جو 108364_4.gif سوبر فتكات Fatakat 108364 البدرشين – مصر