السلام عليكم ورحمة الله وبركاته
عندي مشكلة واكيد في كتير عندهم المشكلة دي بس املي ان الاقي علاج لسوء تصرفي مع الناس الخبيثة المؤذية (خصوصا لما يكونو رؤساء العمل)
للأسف مش بعرف اتعامل معاهم لاني ماتربتش على التعامل مع امثالهم وكنت منغلقة على اسرتي واهلي ناس طيبين وده عامللي مشاكل كتير …. مش بعرف ارد على الناس دي لما بتكلمني ودايما كلامهم وراه مصيبة ليا بحاول ساعات اهرب شوية عشان اعرف افكر هقول ايه وارد ازاي او حتى استشير حد بيفهم في التعامل اللي زي ده بس نادرا لما بانجح دايما بيبقو محاصرينني .
وزميلاتي دايما يقولولي ليه مش بتردي عليهم ، او يقولولي ردك ده مش صح كان المفروض تقولي كذا … بس للأسف معنديش سرعة البديهة اللي تخليني ارد في نفس الوقت الرد المناسب دايما ردودي مش صح او ماردش خالص وبيكون رد فعل غلط او حتى لما بفكر في رد مش بيكون مناسب برضو يعني مش رد يحميني من خباثتهم او المشاكل اللي عاوزين يوقعوني فيها …
مش عارفه اعمل ايه … وعلى فكرة ده مش في المكان اللي بشتغل فيه بس ده في كل مكان باشتغل فيه ويكون فيه ناس بالشكل ده … وباستغرب ان في ناس بتعرف ترد على الخبثاء دول وبيعرفو ازاي يوقفوهم عند حدهم وببقى نفسي اقوللهم عايزة اخد عندكم كورس بس مش عارفه ازاي .
وعلى فكرة والدتي برضو كده بس طلع عليها في الآخر وجالها الضغط والسكر وكل الامراض اللي بتسمعو عنها دي نتيجة الضغط العصبي وعدم الانفجار في وش العالم الزبالة اللي زي دول … ووالدي الله يرحمه كان بيرد امثالهم بس ايه كان بيهزء ويطلع اللي عنده كله مش بيهمه وساعات كان بيرد بهدوء بس للاسف محضرتش معاه مواقف زي دي كنت اتعلمت منه الردود الصح تبقى ايه … وطبعا ماينفعش ابهدل اللي قدامي لانه بيبقى شخص كبير وميصحش وكمان رؤساء في الشغل يعني ايدي تحت ضرسهم وممكن يضايقوني باشكال كتير ، ودي اكتر حالة مش باعرف اتصرف فيها ان ايدي تبقى تحت ضرس حد ….
هل ده بيبقى بالتربية ولا ممكن اتعلمه ولا ايه … طيب لو ممكن اتعلمه اتعلمه فين ؟؟؟ هل في التعليم ده بالعلاج السلوكي مثلا ولا ازاي ؟؟؟
وفي الأول وفي الآخر ربنا هو الحافظ من كل شر … وانا نفسي اتعلم "اساليب الدفاع الكلاميه " …. شوفتو الجمله اللي فاتت دي … تجنن هه
يا رب حد يفيدني بقى لحسن اطفش من ام البلد النكد دي
باحس ان الناس بتتغذى على مضايقة الآخرين والنكد عليهم
elz0000 elz0000 1102884_1.gif فتكات نشيطة Fatakat 1102884 القاهرة الكبرى – جمهورية مصر العربية