السلام عليكم ورحمه الله وبركاته
المنيو بتاعى كميات قليله قووى من كل حاجه عشان احنا فردين وبس وبنتى اصلا مش بتاكل
وجوزى برضه مش اكيل
عشان كده عامله عينات
المهم المنيو بتاعى
وكفايه رغى
فراخ تكا المشويه
كفته مشويه
حواوشى
بطاطس شيبسى
سلطه خضراء وسلطه طحينه
وصوص الفلفل الحار الى بعمله على ايدى وموجود فى اكتر من موضوع
والحلو
بودينج الفاروله بالكريم شانتى بالشكولاته
تورته شكولاته
عصير مانجو
اولا : الفراخ التكــــــــــــــــــــــا
تتبيلته عباره عن
كوبايه زبادى – زيت – مكعب زبده بدرجه حراره الغرفه – خل – معلقه صوص الفلفل الحار الخاص بيه مش بقدر استغنى عنه – توم – بهارات فراخ – فلفل اسود – كمون – جنزبيل – بودره بصل – بابريكا
ونص كيلو دبابيس
وهنا لما اتحطت فى التتبيله
واقل وقت للتبيل 4 ساعات
وبس بعد كده على الشاويه
انا عندى شوايه سونى حلوه قووى بس للاسف مش صورت اى حاجه وقت الشوى
عشان كنت مستعجله قوووووى
ولو مفيش شوايه مش مشكله على شبكه فرن البوتجاز وتحتها صنيه عشان الى ينزل منها يبقى فى الصنيه وتفضلى تقلبيها نفس النتيجه
وده شكل الفراخ النهائى
الكفته المشويه والحواوشى
انا جبت 350جرام لحمه تقريبا
عملت كوره لحمه دى للحواوشى عشان عايزه رغيف واحد
والباقى للكفته
للكفته بنحط بصل مبشور وطماطم مبشوره بس تصفيهم من المايه كويس وناخد المايه دى ونحط عليها ملح وفلفل – وبشر ليه – توم
وبورده رز ودى بتجيبى الرز وتغسليه وتنقعيه شويه فى المايه بعد كده تنشفيه كويس وعلى الكبه
اعملى شويه وشليهم فى كيس فى التلاجه وقت اللزوم
اخدت منها معلقه كبيره وممكن بديل ليها البقسماط
والبهارات : ملح وفلفل وبابريكا – بهارات لحمه
اما بقى الحواوشى
بصل مبشور وطماطم مقطعه وفلفل حار (حسب الرغبه ) وبشر ليه – وربع معلقه توم
والهباارت :
ملح وفلفل وبابريكا وبهارات حواوشى
وانا بحب احط بودره التوم والبصل على حاجه حاجه
وتقلبى كل حاجه مع بعض
وتصبعى الكفته على اسياخ خشب
بس دى صوره قديمه مش المره دى عشان نسيت اصوره
كنت هنزل الحواوشى قبل كده بس كانت كميه المره دى كان رغيف واحد
وبرضه على الشاويه
بس الكفته بتبلى ايدك بميه البصل والطماطم الى عملناها فى الاول وتمشى على كل صباع
دى طريقه الشيف حسن وبتطلع حلوه قوووى
وتقلبيها كل شويه على الشوايه
اما لو مش عندك شوايه عادى جدا ويمكن اسهل كمان
بتحطيها فى صنيه فى الفرن
والحواوشى بتدهنيه زيت من الناحييتن ويااما برضه على الشوايه
او كنت بحطه فى الفرن على الشبكه من غير ولا فويل ولا اى حاجه
دى طريقه الشربينى بقى
وبقلبه كل شويه وكان تقريبا تلت ساعه وبيستوى وبيبقى حلو قوووى
بعد بقى ما شوينا كل ده
بنحطله فحم ونقطه زيت وغطى
وكانك روحتى عند تكا بالظبط
والرز البسمتى برضه للاسف مش صورته
بس انا قولت طريقه قبل كده كتير
انا بحط زبده وزيت ومعاهم بهارات كبسه – وكارى – وكركم – وروقه لورا – وحبهان – ومرقه دجاج
وعلى فكره فى مرقه دجاج لحمه دلوقتى روووووووووووووووووعه
وتقلبى كل ده دقيقه كده لحد ما تتطلع الريحه
تضيفى الرز
وعلى كل كوبايه انا بحط كوبايه ونص مايه
ونفس تسويه الرز العادى بعد كده
وده الشكل النهائى للحواوشى والكفته
سلطه الطحينه
طحينه – توم – خل – كمون – ملح – شطه وبقلب كل ده واضيف شويه مايه سخنه حبه صغيرين بحبه لحد القوام الى انتى عايزه وومكن معلقه زبادى برضه بتبقى حلوه قووى فيها
وتدوقيها باستمرار عشان تشوفى لو ناقصها خل مثلا او ملح كده يعنى
صوص الفلفل الحار
طبعا انا بعمله فى البيت على طول
وهو عباره عن نص برطمان صلصله – وفنجان صغير خل وزيه سكر ومعلقتين هريسه كبار ورشه ملح وفلفل اسود وبودره توم معلقه كبيره
وبكده اكون خلصت الحادق كله والسلطه الخضراء طبعا مفيش اى افتكاسه فيها
وده كان الشكل النهائى للاكل يارب يعجبكم
لو عجبكم الاكل متنسوش الدعوه الحلوه والتقييييم
مواضيع هذا القسم برعاية
ام رودى العسل ام رودى العسل 258244_26.gif ملكة فتكات Fatakat 258244 مدينه الحب – مصر ام الدنيا