السلام عليكم ازيكم يا فتوكات
الموضوع النهارده حلو اوى وخصوصا ان اكيد معظمنا بيزهق من اللحمه والفراخ واللحوم عموما كل يوم
وبنبقى محتاجين لاكل حرش بمعنى اصح او نغير شويه بدل ما كل يوم طبيخ ممكن الوصفات دى تعملوها وسط الاسبوع او براحتكوا
بس بجد كلها روعه والله وطعمها اكتر من رائع واليكم احبائى الوصفات السريعه والشهيه وبجد بتأكل عن الطبيخ والله
1 فته العدس اكله حلوه جدا خصوصا فى الشتاء بس المهم تبقى حلوه وصدقينى اللى مش بيحب العدس والله هيحبه
الطريقه نغسل العدس جيدا ونسلقه فى الماء ونضع معاه بصله مقطعه وحبه طماطم وقرن فلفل وحبه بطاطس وحبه جزر و2 فص ثوم
بعد سلق العدس نتركه يبرد ويضرب فى الخلاط ثم نضع عيش فى الفرن ينشف ويتحمص وبعدين نعمل صلصه زى بتاعت الفته بالتوم والخل ونعمل دقه بيضاء نشوح ثوم فى ذبده وننزل بالخل يدوب تغلى ونرفعها من على النار
وبعدين نحمر شعريه فى حله باذبده طبعا وننزل عليها بالعدس ونهدى النار ونضع ملح وكمون ورشه فلفل اسود ونتركه يستوى
ثم نضعه فوق العيش الناشف ونرش فوقه الصلصه الحمره والبيضه رووووووووووووووووووووعه والله حماتى بتحبه اوى من ايدى ولازم انا اللى اعمله مكنتش تعرفه
2 طاجن الفول بالكسبره الخضراء والطماطم
نشوح بصل على النار فى زيت دره ثم نضع 3 فص ثوم مفروم ونص معلقه سكر صغيره وننزل بعصير الطماطم وقرن فلفل حامى حسب الرغبه ولما تتسبك نضع الكسبره يدوب 5 دقائق ونضع الفول ونتركه شويه على النار
عايزه تكليه كده اوكيه عايزه تحطيه فى طاجن وعليه من فوق بيض يعنى 4 بيضات على الوش ويدخل الفرن على نار متوسطه بيقى حلو برده ومع الاكله دى بقى باذنجان مخلل او جرجير طعميه وعيشى حياتك بقى وعيش ناشف بقى يا سيدىوالله روعه الفول ده
3 الكشرى الاسكندرانى ارز بالعدس الاصفر ومعاه صلصله الفته توم وخل وبصل زى بتاع الكشرى وسلطه وبيض مسلوق اصلا القيمه الغذائيه فى الاكله دى عاليه جدا وخصوصا للاطفال ولذيذه جدا
الطريقه كوب ونصف ارز معاه كوب الاربع عدس اصفر اغسليهم مع بعض كويس وبعدين نكون مشوحين بصله حلوه كده محترمه مع الزيت وننزل بالارز والعدس وشوحيهم حبه على النار ونضع الكمون والملح فقط والماء يدوب مش كتير يغطى بس الارز مش يزيد عن كده عشان مش يعجن ودوقى احلى ارز وبعد الاستواء رشى الصلصه الحمره عليه فى طبق الغرف وعليه من على الوش البصل المحمر ومعاه بيض مسلوق وسلطه خضراء والله جميل اوى
4 الارز بالبيض وده بقى اكلتى المفضله ولازم يتاكل سخن ومش تستغربى بس جربى وادعيلى نشوح البصله فى الذبده وننزل بالارز وبعدين الكمون والملح ونشوحه شويه وننزل بالماء وقبل ما يشرب الماء كله الارز نرفعه من على النار ونحمل حفر بالمعلفه ونضع مكان كل حفره بيضه نيه طبعاوهكذا على حسب حجم الحله هتشيل قد ايه ورشه فلفل اسود على الوش وغطى الحله وهدى النار خالص ودوقى بقى يا ستى جميييييييييييييييييييييييييييييييييل وجمبه سلطه
5 بيتزا التوست ودى بقى اكثر من رائعه وخفيفه وتنفع على العشا ومش بتاخد وقت
هنشيل اطراف التوست ونرصه فى صنيه وندهن الكاتشب عليه ونضع الزيتون الاسود والبصل والفلفل وشرائح الطماطم والجبنه الموزريلا ويكون الفرن سخن شويه من البدايه ودخلى الصنيه يدوب هتسيح الجبنه ودوقى اسرع واخف واطعم بيتزا
واخيرا لو الوصفات نالت رضاكم حطوها فى المفضله او اكتبوها عشان وقت لما تزهقى اختارى واعملى وكلها والله على ضمنتى واكتر من رائعه ودعواتكم ليه والتقيم بقى ايدى وجعتنىربنا يسعدكوا يارب فى رعايه الله مواضيع هذا القسم برعاية
نسوم المصرية نسوم المصرية 770228_1.gif فتكات هايلة Fatakat 770228 الدمام – السعودية