السلام عليكم و رحمة الله و بركاتة
بعد الصلاة و السلام على نبينا محمد اللهم صلي و سلم عليه
النهاردة عملت كفتة تجنن يمكن منكم يعرفها بس انا ملقتش في المدونة وصفة ليها بس بجد روعة جربوها هتعجبكم جدا
دي صورة بطله موضوعنا عشان الكل يكون فاهم
كفتة السيبيا زي ما احنا بنقول( البورسعيدية ) او السبيط زي ما بتقولوا انتو ( بتوع القاهرة و ما حولها ) مع مراعاة فروق التوقيت دي صورتها عشان تتشجعوا و تقيموووووو
مقاديرها
كيلو سيبيا انا استخدمت الشراشيب بتاعتها او اهدابها بس ممكن تستخدمي جسمها نفسه
2 ثمرة بطاطس مسلوقة جيدا بقشرها عشان متشربش ميه
2 بصلة متوسطة + شوية ثوم حلوين
خضرة ربطة شبت+ربطة كسبرة خضرا
2 معلقة اكل دقيق
بهارات ( ملح فلفل كمون كسبرة ناشفة جنزبيل مطحون نعناع )
و بس كدة
الطريقة
بنحط في الكبة الخضرة و البصل و التوم نفرمهم كويس اوييييييي بعدين نحط السيبيا المتقطعة و نفرمهم سوا
بعدين نهرس البطاطس بالشوكة و نحطها على العجين هي و التوابل و معلقتين الدقيق و نعجنهم سوا
و نحط الكفتة في الفريزر نص ساعة عشان نعرف نشكلها لانها بتبقى طرية جدا
ونشكلها زي ما نحب صوابع كور مبططة اي حاجة براحتك خاااااالص بس لما تشكليها حطي جنبك طبق صغير فية زيت تبلي ايدك منة عشان متلزقش في ايدك و تعرفي تشكلي
و تبتدي تقليها في زيت حرارتة متوسطة عشان تستوي كويس لغاية ما تحمر تشليها على مناديل مطبخ
و تقدمها اما محمرة و خلاص زي ما قدمتها النهاردة مع سلطة طحينة و عيش و الذي منة او ممكن تعملي لها تسبيكة بالتوم زي بتاعة كفتة الرز و تسقطيها فيها تاخد من طعم صوص الطماطم و تقدمها مع رز ابيض بتبقى خرافية
و دة شكل الكفتة بتاعتي بعد ما حمرتها
و دي كماااااااااااااااااان
التقييم بقى يا فتوكات امااااانة اتمنى اكون افدتكم بحاجة جديدة و مختلفة
و السلام عليكم ورحمة الله و بركاتة مواضيع هذا القسم برعاية
ماليكا ماليكا 72169_11.gif سوبر فتكات Fatakat 72169 بورسعيد – مصر