الســلام عليكم ورحمة الله وبركاااااااااااااتة
ازيكوو يا فتوكاااااااااااااتى
فراخ على الطريقة المكسيكية كلمة تحفه قليلة عليها بجد
النهارده بنقلكم اول طبخة طبختها لجوزى ( لسه عروسة جديدة بقا) بجد تحفففففففه وطعمها حلو اووى وعجبت جوزى جداا
انا عمرى ما كنت باكل اى فراخ بايته لكن الفراخ دى اكلتها تانى يوم اكنى لسه طابخاها بجد محستش باى فرق بل احلى كمان بدون مبالغه
حابة اشكر الفتوكى اللى اخدت منها الطريقة sweet girl ربنا يكرمها يارب اخدت منها هدية بجد الوصفة دى
يلا ندخل على الطريقة والمقادير
بسـم الله نبدأ
المقاديـــــــــر
نص فرخة ( عملت ورك ونص الصدر لاننا اتنين بس )
2 طماطم مضروبين فى الخلاط بشوية مية
بصلتين وسط مقطعين
فلفل اخضر واحمر مقطع
جزر مقطع
بتنجان مكعبات ( دى زيادة من عندى عشان جوزى مش بيحبه ف قولت احطهوله ف وسط الاكل ومش هياخد باله بس هقولكم ف الاخر حصلى ايه )
ورق لورة وحبهان وفلفل اسود وكمون وملح وزعتر وبابريكا وجوز الطيب واى توااااااااابل عندك متعودة تحطيها ف الشوربة او مع الفراخ
الطـــــــــــريقــة
اول نكون مجهزين كل الحاجات اللى محتاجة تتقطع
ودى الفراخ قطعتها اربع قطع
– نجيب الحلة اللى هنعمل فيها ونحط معلقتين سمنة وننزل بالبصلة لحد ما تتدبل كده
اول ما تدبل البصلة تنزلى بالفلفل والجزر والبتنجان ( مش اساسى وعموما انتى ممكن تحطى اى خضروات لو بسله او بطاطس حتى . اى حاجة براحتك كله ف النهاية بيخلى الطعم احلى ) وتقلبى كويس شوية
بعدها تنزلى بالفرااخ وتلوحيها شوية لحد ما لونها يتغير( مش عارفة انتو بتسموها فى المرحلة دى ايه لانى جديدة ف هذا العالم الغريب هههه)
بعد ما تتلوح تكونى انتى ضاربه الطماطميتين ف الخلاط بشوية مية مش كتير ومش قليل بس ف النهاية تكون مغطية الفراخ عشان تستوى براحتها ويتبقا صوص من الفراخ
تضيفى اطماطم للفراخ وتحطى توابلك بقا يا فتوكتى
ودى التوابل اللى حطيتها
ملح – فلفل اسود – كمون – مستكة – ورق لورى – زعتر – حبهان – جوز الطيب بسييييط
حطيتها وقلب وقفلت الحلة وسبت الفرخة تستوووى
ودا شكلها بعد ما استوت فى الحلة
بعد كده نقلتهم الفراخ والصوص لصنية بيركس على قدهم ودخلتهم الفرن لحد ما احمرت وبقا شكلها لذيذ كده
بعد ما اتحمرت ف الفرن بقت كده
ودى سفرتنا الجميلة تخيلو بقا ان كل دا على ترابيزة السفرة اللى جوزى حارمنى من الاكل عليها عشان خاطر التلفزيون ههههههههه لازم تلفزيون ع الاكل
اقولكو بقا اللى حصل
احنا قعدنا ناكل وجوزى كل شوية اقوله حلو يقولى جميييييييل تسلم ايديكى
وانا ف نفسى اقول هيييييييييه انتصرت الارادة النسائية واكلته بتنجان اكلته بتنجان وما اخدش باله يا جدعاان
وعماله افكر بقا ف موضوع اعمله على فتكات احتفالا بالموضوع وبينى وبينكو سستمت نفسى ان خلاص انتهت مشكلته البتنجان لانى كنت عامله كبدة وقولت احط فيها بتنجان ومش اكتشفه
ف قاعدين نتفرج ع التلفزيون ومندمجين واذا الاقي الصدمة دا بتنجان يا *** ( لاسمى والله مش شتيمة )
بصو انا تنحت اه والله ما بقتش عارفه اتكلم وهوا زعل جامد اتارينى نسبت اشيل القشرة من قطعه من البتنجان ودى اللى كشفتنى
بس الحمد لله عدت على خييييييييييييير
الرجال دول ما يضحكش عليهم ابدااااااااااا
يلا اسيبكو تحلو
ودا الحلو يا فتوكااااااااااات
ودى طريقتة على اللينك دا يارب يعجبكم برده عمايلى برده
اسهل طريقة لعمل حليب مكثف + شكلمــة ولا اروع ولا اسهل كله بالتفصيل والصور المملة D:
وبجد بجد الفراخ جميلة وهتعجبكم باذن الله وهتحبوها اوووووى
واهو تغيير عشان مش نزهق
مواضيع هذا القسم برعاية
قلبى الصغير لا يتحمل قلبى الصغير لا يتحمل 268447_1.gif سوبر فتكات Fatakat 268447 على الحوض – مـــــصــر