السلام عليكم يافتوكات
النهاردة جايبة لكم غدانا بالصور الكتير
وهو عبارة عن
فراخ مقلية تحفة بجد
ارز بسمتي
سلطة خضراء
بطاطس
تومية الطماطم
وبقولك بقى يافتوكة منك لها هشرحلكم بس تقيموا
لاحسن لما مش بتقيموا بقعد اشد في شعري
لغاية مابقاش عندي شعر يرضيكم كده يعني
المهم بقى لاحسن تقولوا البت دي داخلة علينا بنكد كده ليه مرة مكشرة ومرة بتشد في شعرها لا براحتكم لو عجبكم قيموا ياقمرات وادي ابتسامة وكمان ضحكة
ندخل بقى في الموضوع
دي صورة الاكل الاول
اولا :الفراخ
مقاديرها
فراخ -بصل -كمون-ملح-فلفل اسود-دقيق-زيت
هنجيب الفراخ يافتوكات نحميها كده ونروقها وبعدين نمسكها نقطعها
بصي بقى الورك تفصليه ياتكسري العظمة بتاع الدبوسة ياتفصلي الدبوسة
تخلى الورك جزئين يعني
الصدر بقى هتقطعي منه الجناح والرقبة وتفصليه هو نصين او تغرسيه
بالسكينة بحيث يتشرب التتبيلة اللي هنعملها
نيجي بقى للتبيلة هنقطع بصل مكعبات
ونحط عليه ملح وكمون وفلفل
دي صورة قبل ماقطع فيها
ونبدأ نحشي الفرخة تحت الجلد وفوق الجلد
وكل حتة ماتسيبهاش الا لماتقول حقي برقبتي
بعدين بقى نسيبها في التتبيلة كده شوية على حسب وقتك بس اقل حاجة نص ساعة
بعدين بتكوني مجهزة قلاية عميقة او قلاية كهربا
لو عندك والزيت يكون غزير
هتجيبي طبق تحطي دقيق بس فقط لاغير
وتغمسيها فيه زي السمك كده من كل ناحية
وعلى الزيت جري دي صورة في النص
وتهدي النار وسط يعني وتغطي القلاية
كل قلاية هتاخد حوالي نصف ساعة وهتطلعيها وهيكون ده شكلها النهائي
نيجي بقى للارز البسمتي
انا عملته لونين اصفر وابيض
هنحتاج
رز بسمتي على حسب العدد عندك
اعواد قرفة-حبهان-كركم-ملح-زنجبيل مطحون
هتحطي مية تغلي وتحطي فيها الملح والقرفة والحبهان والزنجبيل
بعدين حطي الرز واستني لين يشرب المية وقرب يستوي
تروحي جاية بمعلقة كركم وتحطيها في جانب من الحلة وتقلبي
ماتجيش الناحية التانية خالص عشان يفضل ابيض
هيبقى عندك الرز في نفس الحلة لونين جنب ابيض وجنب اصفر
بس البخار مش موضح
ساعة التقديم بيبقى لونين ودي صورة وكمان مقربة
نيجي بقى للصلصة التومية بتبقى تحفة عموما جنب اي رز بسمتي
طماطماية -فلفل اخضر -فصين توم -ملح -فلفل اسود
هنحطهم في الخلاط ونضربهم وفي الاخر هنصبهم في الطبق
معليش ابني جه رج الطبق وجري
عملي حد فيه
والسلطة الخضراء اكيد مش محتاجة اقولها طبعا ولا البطاطس المقلية
بس صورة عشان ماتزعلش مني السلطة اهو
ودي صورة مجمعة تانية
وصدقوني والله الاكلة دي تحفة وسريعة
ده انتي من حلاوة الفراخ هتلاقيكي قاعدة بتتسلي فيها كده
ربنا يستر ماتخلصيهاش قبل الاكل تبقى مصيبة
عموما بألف هنا وشفا يافتوكات
وشجعوني بقى عشان اتشجع واصور وانزل
وماتبخلوش عليا بتقييمكم وردودك ودعوة بظهر الغيب
انه ربنا يرزقني بالفرحة اللي بتمناها عن قريب
في رعاية الله ياحبايبي
مواضيع هذا القسم برعاية
الزهرة النجمية الزهرة النجمية فتكات متميزة Fatakat 573270 القاهرة – مصر