كل سنه وانتم طيبين
الزيكوا يااحلى فتوكات مبدايا بقالى كام مره بنزل موضوعات ومحدش حتى بيقدر تعب انى نزلت الصور وصورت..الخ
طبعا انا بعمل ده علشان كلنا نستفاد من بعض مش عشان مستنيه شكر من اى فتوكه ويكفينى دعوه حلوه من اى فتوكه تجرب الوصفه وتعجبها بس فى حاجه اسمها تقدير
وانا زعلانه منكم لانكم ولا بتقيمونى وتقدروا تعبى ولا حتى بتدعولى دعوه حلوه هو انا مواضيعى مبقتش تعجبكم انا طبعا ماجيش حاجه جنب فطاحله المطبخ فى فتكات ماشاء الله عليهم بس على الاقل شجعونى
ندخل بقا ع الموضوع
علشان الفرخه تطلع لونها جميل معاكى وكمان طريه من جوه مش ناشفه من الفرن فى شويه تكات بسيطه بتفرق جداا
تعالوا نشوفها مع بعض بالخطوات المصوره
-اول حاجه تغسلى الفرخه كويس اوووى بشويه دقيق وتدعكيها بليمون
وتغسليها كوويس اووى تمام
ليكى بقا حريه الاختيار اما تفتحيها من عند البطن كده زيى ماهو موضح فى الصوره او انك تعمليها كامله
بس انا بحب الشكل ده افضل وكمان بعرف اخلى التتبيله تتغلغل جوه الفرحه كلها وبعمل فتحات بالسكينه تفضلى تديها طعنات متتاليه بس مش من ع الجلد من الناحيه التانيه
–
التتبيله بقا
اى تتبيله تحبيها سواء بالزبادى او المسطرده او التتبيله التقليديه وهو ده الى انا عملته محبتش افتكس …
بصله مبشوره (تاخدى الميه بس)
طماطمايه مبشوره +معلقه صلصه+معلقه خل
ملح وفلفل وبهارات فراخ واسيب التتبيله دى من بليل او 8 ساعات تمام كده
تتبليها منكل حته وافتحى الجلد براحه من غير مايتقطع وتبلى من جواه
–
عارفين الشبكه بتاعت الفراخ بتاعت الفحم تحطى عليها الفرخه وتقفليها كويس وتحتها صينيه فيها باقى التتبيله وكوبايه ميه
-وتدخليها الفرن طريقه التسويه بقا
مهم جدااااااااااا
اول #تكه
تدخل على فرن ساخن جداااااااا(يعنى تبقى مولعه الفرن من قبلها علىدرجه حراره عاليه )
-اول تلت ساعه تفضل درجه الحراره عاليه وبعدين نهدى
ليـــــــــه بقا
علشان متفقدتش العصاره بتاعتها وتنشف منك وتفضل الفراخ طريه وجميله معاكى
واول ماتستوى افتحى عليها الشوايه
وده بقا الشكل النهائى ماشاء الله تجنن وشيك كمان فى التقديم لو فى عزومه وممكن علشان تعزى الطعم تولعى فحمه فيها بتبقى واوو بجد لو عجبتك الطريقه مش عايزه منك غير دعوه حلوه بظهر الغيب
ان ربنا يقر عينى بما اتمنى ويريح قلبى ويسعدنى ويفتحلى ابواب رزقه ويبعد عنى وعن اهلى اى اذى
فى رعايه الله يااحلى فتوكات مواضيع هذا القسم برعاية
angelsmile2311 angelsmile2311 963758_5.gif فتكات رائعة Fatakat 963758 my home – egypt