ازيكم يا بنات يارب تكونوا بخير
النهارده جايبه لكم طريقه فته لبناني طعمها خطييير
وكمان تغيير عن الفته المصري بتاعتنا اللي انا بموت فيها
هي بتتكون من 4 طبقات
هكتب طبقه طبقه عشان مش الخبطكم
الطبقه الاولي :طبقه العيش المحمص
عيش شامي بنقطعه مربعات ونحاول تكون قد بعض عشان كلها تستوي زي بعض
والاسهل نقصها بمقص المطبخ وممكن بايدك كمان
هنقلي العيش في الزيت ونطلعه في مصفي عشان نتخلص من الزيت الزياده
ولو عايزاه اخف رصي مربعات العيش في صينيه ورشي عليهم رشه خفيفه من الزيت ودخليهم الفرن وابقي كل شويه قلبيهم لحد ما كلهم يتحمصوا
الطبقه التانيه :طبقه الارز
2 كوب رز بسمتي (او رز عادي)
1 جزر مبشوره
ملح _فلفل_ كركم _قرفه ناعمه
2 فص حبهان _4 قرنفل _عود قرفه خشب _ورقه لوري
مكعب مرقه
في حله نضع معلق زيت ونشوح كل التوابل البودره والصحيحه
لحد ما نشم ريحتها
وبعد كده نضيف الجزر المبشور ونضيف الميه والملح ومكعب المرقه ولما تغلي نضيف الرز ونسيبه علي النار لحد ما يبدأ يتشرب ونهدئ عليه النار لحد ما يستوي
الطبقه التالته :طبقه اللحم
2/1 كيلو لحم قطع صغيره
معلقه توم مفروم
ملح _فلفل _شطه
في طاسه علي النار نضع معله زيت ونشوح التوم المفروم يدوب يدبل نضيف قطع اللحمه والملح والفلفل والشطه
ونشوحها لحد ما تتغير لونها
ونسيبها تستوي ولو احتاجت ميه نضيف شويه صغيرين ويكونوا مغليين
الطبقه الرابعه:طبقه الصوص
2 علبه زبادي
3 معالق طحينه
2 معلقه خل
عصير ليمونه
ملح
في سرفيس هنحط العيش المحمص الاول وبعد كده الرز وبعدين الصوص وبعدين نوزع اللحمه علي الوش
(في الاخر خالص ممكن تعملي طشه للفته معلقه زبده بتشوحي فيها معلقه توم مفروم لحد ما يدبل وتطشيه بالخل ووزعي الطشه دي علي وش الفته بتديها ريحه وطعم خطييير)
مواضيع هذا القسم برعاية
حته سكره 80 حته سكره 80 286735_1.gif سوبر فتكات Fatakat 286735 مع جوزى حبيبي – مصر