باذن الله هقولكم على طريقه سهله وبسيطه جدا عشان نغير فى شكل وطعم اللحمه المسلوقه ولا هتحسى اصلا انها كانت مسلوقه ان شاء الله
اكيد فى فتوكات كتير يعرفوها بس انا هقولها للى ميعرفهاش
ندخل على الطبق النهائى
اول حاجه ندخل على مقادير وطريقه سلق اللحمه
انا عن نفسى بعملها بالطريقه دى وليكى طبعاً حريه الاختيار فى طريقتك لسلق اللحمه
-لحمه+زبده وزيت+ميه سخنه+بصل مقطع اربع انصاف+ورق لورا+حبهان+رشه سكر صغيره+ملح وفلفل+ماجى للحمه+طماطمايه متقطعه نصفين
ولو تحبى تزودى المنكهات بتاعتك زى قرفه او..الخ اى حاجه تحبيها اوك براحتك بقا
– اول حاجه بحط قطعه زبده وحبه زيت ومعاهم ورق لورا والحبهان (وانا الحبهان بدق عليه بالسكينه الاول عشان يطلع الطعم بتاعه) واسيب الحبهان واللورا فى الزبده والزيت يتشوحوا شويه على اساس انى اخد نكهتهم بقدر الامكان وبعدين بنزل بالبصل واللحمه ورشه سكر وفلفل اسود ورشه بسيطه جدا على نار عاليه عشان اللحمه متنزلش ميتها احنا عايزين نشوحها ونفضل كل شويه نقلب فيها لغايه ماتتشوح وهنشوف فى الصور هيبقى شكلها ايه اما تتشوح كويس (احلى حاجه فى الطريقه دى انها مبتخليش اللحمه تطلع الريم بتاعها اللى بيبقى على الشوربه من فوق بتفضل الشوربه نقيه
وده الشكل المطلوب ان شاء الله
وبعد ماتتشوح كويس نبتدى ننزل عليها بالميه السخنه ولاازم ميه سخنه عشان نضمن ان اللحمه متعملش ريم وانا فى الخطوه دى بضيف الماجى اللحمه وببحب اضيف طماطمايه مقطعه نصفين (دى خطوه اختيارى) ومبحطش ملح خالص غير قرب ماللحمه تستوى عشان الملح بيبطىء عمليه سوا اللحمه
تعالوا نشوف بقا هنغير فى شكل وطعم اللحمه المسلوقه الزااى
كل اللى هنتاجه
–قطعه زبده وشويه زيت
-بصل متقطع بالشكل اللى تحبيه
-فلفل متقطع
-فصين توم مفرومين
-ملح وفلفل
-فحمه
اول حاجه هنحط قطعه الزبده وشويه الزيت ومعاهم البصل ورشه ملح عشان البصل يدبل ونسيبه يتوشح ويدبل
وبعدين هنزل بفص التوم والفلفل واحط رشه فلفل اسمر واسيبهم يتشوحوا كام دقيقه كده وبعدين انزل باللحمه واسيبهم يتشوحوا مع بعض وتندمج الاطعمه مع بعضها وفى الاخر خالص بعد مابقفل عليها النار بولع فحمه واحطها عليها واقفل عليها الغطا عشان تاخد ريحه الفحم وبعدين بحط رشه بقدونس وشبت والصور هتوضح كلامى
وده بقا الشكل النهائى ماشــــــــــــاء الله بجد طعمها يجنن ولا تصدقى اصلا انها لحمه مسلوقه
وكالعاده مش طالبه منكم غير دعوه حلوه بظهر الغيب ان ربنا يقر عينى بما اتمنى ويريح قلبى ويسعدنى
فى رعايه الله مواضيع هذا القسم برعاية
angelsmile2311 angelsmile2311 963758_5.gif فتكات رائعة Fatakat 963758 my home – egypt