حبايبى الفتوكات عاملين ايه يا رب تكونوا بخير
انا امبارح عملت الكفتة المشوية بس ايه طلعت زى بتاعة المحلات بالظبط اه والله وعجبت جوزى جدا وقالى ابقى اعمليهالنا على طول اصل انا كنت معقداه فى الكفتة بس دى عجبته اوى الحمد لله
هى مقادير الكفته عادى يعنى
بصل بس ابشريه واعصريه من المية بتاعته عشان تقدرى تشكليها
بقدونس
ملح وفلفل
طماطم مبشورة (واحدة بس كفاية )
شوية زيت او سمن زى ما تحبى
وبس كده اخلطيهم مع بعض ويا ريت لو تسيبيها فى التلاجة ساعة عشان تجمد شوية
بس لو اتزنقتى ممكن تعمليها عادى انا عملتها عادى بس قبل كده لما سبتها فى التلاجة كانت احلى
وبعدين تجيبى شبكة الفرن وتحطى عليها الكفتة يا ريت تلفيها على قلم عشان تبقى مجوفة
وبعد ما تخلصى حطيها فى الفرن وحطى تحتها الصاج عشان الادام اللى ينزل منها يبقى فى الصاج
انا قبل كده عملتها وحطيت الصاج بتاع الفرن تحت الشبكة على طول ولما كان الادام ينزل كان بيتحرق فى الصاج ويغلبنى فى تنضيفه
اخترعت فكرة انى احط فى الصاج شوية مية وده سهل عليا اوى فى تنضيفه وكمان كان بيعمل دخان جامد من الادام اللى بيتحرق فجربى الطريقة دى هتريحك
وانا طبعا بموت فى طعم الفحم قرب ما تستوى ولعى الفحمة فوق على البوتاجاز لحد ما تحمر اوى وبعدين طلعى الكفته وحطيها فى صينية او حلة وحطى الفحمة فى النص وحطى عليها معلقة زيت واقفلى عليها بسرعة ولو عايزة الطعم يبقى اكتر ممكن تولعى واحدة تانية بالتبادل انا عملت كده
وقدميها وبالف هنا وشفا
واسيبكم مع الصور بقى
دى لما ولعت الفحمة وحطيتها فى الصينية
وهنا لما قدمتها
كده خلاص يا رب الوصفة تعجبكم
ومستنية ارائكم
فى رعاية الله وحفظه مواضيع هذا القسم برعاية
& أم أدهم وجنى& & أم أدهم وجنى& 768931_4.gif فتكات رائعة Fatakat 768931 الدوحة – قطر