بسم الله الرحمن الرحيم
السلام عليكم ورحمة الله وبركاته
ازيكم يافتوكات انا قلت آجي واحكلكم عن تجربتي في الاشعة بالصبغة على الرحم والانابيب علشان تستفادو من تجربتي زي ما افادتوني في حجات كتييييير
معلش رغيت كتير بس كان لازم الكلمتين دول
اولا انا الدكتور بتاعي طلب مني الاشعة دي علشان اطمن على كل حاجة وللعلم انا عندي تكيس على المبايض بس دا ميمنعش برده اني اطمن على الانابيب صليت استخارة وعملتها في السرايا اسكان في سموحة في اسكندرية اتصلت بيهم قبلها علشان اتاكد من ان فيه دكتورة والحمد لله لقتها بعد لف ودوران كتيييييير على مراكز الاشعة لان كان كلهم دكاتره
الممرضة ادتني الحقنة المسكنة قبل الاشعة بساعة وتوكلت على الله وعملتها بدون بنج واللي كانت قبلي طلعة معيطة وانا اقول يارب استرها
بس بصراحة مكنتش خايفة وكنت قاعدة اضحك واهزر عادي الموهم دخلت وادوني بنطلون مخصص للاشعة دي لبسته ونمت على السرير واستنيت الدكتورة ولما جت قاعدت تهزر معايا وتهديني وكان فيه دكتور قاعد على جهاز كمبيوتر بيشوف فيه حركة الاشعة داخل الانابيب
وابتدت الدكتورة تحقني بالصبغة وكااااااانت المفااااااجأة محستش بألم فقلقت قلتلها انا محستش بحاجة قالتلي دا معناه ان الانبوبة مسدودة هنحاول تاني بس رخي نفسك خالص متتحركيش رخيت نفسي وتحركتش ولا حركة على قد ما اقدر واعدت ادعي ان احس بألم
فجأة حسيت بالالم وبيزيد وهو زي الم البريود يعني يحتمل قلت الحمد لله والدكتورة قالتلي ان الانبوبة بدات تتسلك والحمد لله الاشعة طلعت سليمة اللهم لك الحمد
وطلعت عادي من غير آلام ولا اي حاجة حتى ما وظبتش على الادوية المسكنة اللدكتور كاتبهالي لان الحمد لله ماتعبتش بعدها بل بالعكس روحت عند حماتي واشتغلت في البيت وكأن شيئا لم يحدث
عايزة اقولكم يابنات ان الالم البسيط اللي بتحسي بيه دا مهم قوي علشان دا دليل ان الصبغة بتدخل الانابيب وان الانابيب سالكة وسليمة علشان كدة لااااازم ترخي نفسك خالص وتسمعي كلام الدكتورة وتعليماتها
وانا عايزة اطمن كل واحدة مقبلة على الاشعة بالصبغة وخايفة وعمالة تأجل فيها :صدقوني الموضوع اصغر من ان يتخاف منه بل بالعكس سهلة جدا وبترتاحي نفسيا بعد ماتعمليها وكمان علشان تبعدي عنك الشكوك والاوهام ولعل تكون سبب في حملك بعد كدة
ربنا يكرمني ويكرم كل مشتاقة بالحمل الثابت السليم المعافى قبل رمضان
آمميييييين ياااااارب
واي استفسار انا في الخدمة
بحبكم في الله
والسلام عليكم ورحمة الله وبركاته
Salma Dream Salma Dream 735587_2.gif فتكات متميزة Fatakat 735587 القاهرة مدينة نصر – مصر
سبحان الله و بحمده