دى عزومتى الصغيره على قدى وما حدش يتريق عليا عشان كنت مستعجله فصورت بسرعه وال حاتتريق حاعضها يلا بقا
دى صوره كده عشان التشجيع
الاصناف
ممبار
بطه بطوطه مشويه فى كيس الشوى
فراخ
لسان عصفور
محشى ورق عنب وباذنجان
مكرونه نجرسكو
سلطه بنجر
سلطه خضراء
اولا المحشى
خلطه المحشى
بقدونس وشبت- بصل – رز – طماطم – صلصه –ملح – فلفل – شويه نعناع ناشف
نغسل الخضره كويس واقطعها وبعدين الطماطم انا بحطها فى ميه مغليه وبعدين اشيل القشره بتاعتها واقطعها صغير وافرم البصل واغسل الرز واحطه واحط التوابل وزيت ذره وما ننساش النعناع بيدى ريحه تحفه للمحشى ونحط الصلصه
ونبدأ نحشى
ورق العنب اهو لما اتحشى
وهنا وهو على النار
والباذنجان منور اهو لما اتحشى
وهنا وهو على النار
وهنا لما استوى
والممبار نضفته وغسلته ونقعته فى ميه بخل وبقا زى الفل
وبنفس الخلطه حشيت الممبار اهو وحطيته فى حله فيها ميه وملح وورق لورا وسبته لما استوى
وهنا لما استوى
ندخل بقا على البطوطه
انا غسلت البطه كويس قوى ونقعتها فى ميه وخل وملح وخلتها زى الفل وبعدين تبلتها ببصل مفروم ومله وفلفل اسود وحطيت معاها ورق لورا وواحده لمون مجفف وبعدين عصرت كيلو برتقال وحطيته معاها وحطيتها فى التلاجه لتانى
يوم تانى يوم طلعتها وحطتها بالخلطه بتاعتها فى كيس الشوى وحطيت معاها جزر مقطع وكرفس وعلى النار وادى النتيجه طعمه فوق الوصف تحفه تحفه
النجرسكو
مكرونه – فراخ مقطعه مكعبات – بصل – فلفل اسود وملح وبهارات فراخ – بشاميل
لعمل البشاميل
انا كان عندى خلطه بشاميل الجاهزه حطيت اربع معالق كبار على كيلو لبن ونقلبه كويس ونحطه على النار ولما يغلظ بحط شويه كريمه لبانى او جبنه ال موجود عندى بحط منه بيدى للباشميل طعم جنان
نسلق المكرونه
نسخن صنيه ونضع فيها قطع الفراخ تاخد صدمه وبعدين ننزل بالبصل المفروم والملح والفلفل والبهارات ونسبها لما تستوى
نحط مكرونه فى الصنيه وعليها بشاميل وعليها الفراخ وعليها مكرونه وبعدين البشاميل وندهن الوجه ببيضه مضروبه كويس وندخلها الفرن
تبعونى حانزل الباقى وعلى فكره انا تعبت قوى على ما نزلت الموضوع لو عجبكم ياريت التقيم ولو ما عجبكوش التقيم بردو عشان التشجيع امال ايه
مواضيع هذا القسم برعاية
osha 2024 osha 2024 561077_3.gif فتكات رائعة Fatakat 561077 alx – egypt