السلام عليكم ةرحمه الله وبركاته
انا جايبه لكم طريقه الفسيخ المعتمده عندى والله زى بتاع المحلات واحلى
واهو علشان ميبقاش حد يقول ده سمك بيعفنوه ولا غيره
ماشى ماشى هبطل رغى من غير شخط
اولا هنجيب سمك بورى بس يكون كبير يعنى السمكتين كيلو لانه كل ما يكون كبير بيكون احلى
وهنغسل السمك كويس ونحطه يتصفى ازاى بقى ….هقولكو نجيب شفشق ونحط فى ارضيته
مناديل مطبخ ونوقف السمك فى الشفشق راسه لتحت بس الاول نضغط على كل سمكه من
ديلها لحد راسها وبعدين نحطهم يتصفو على الاقل 6ساعات ونجهز اكياس بلاستيك كبيره
ولما يصفى السمك نجيبه ونحشى الخياشيم ملح وشطه كتير ونرصه فى الكياس بشكل
عكسى يعنى واحده راصها يمين والتانيه راسها شمال ونحط على الوش شويه زيت وشويه خل
والكيس يتحط فيه سمكتين بس ونطلع الهوى من الكيس ونربطه وبعدين نحطه فىكيس جوا كيس
جوا كيس يعنى حوالى 8-7اكياس وتلزقيه بلزق وتشيليه فى الفرن او دولاب المطبخ اودولاب البلكونه
وكل يوم تقلبيه على جنب غير اليوم اللى قبله يعنى ينام النهارده على اليمين بكرة على الشمال
ونسيبه15يوم ونفتحه وشمى بقى ريحه احلى جريمه فى الدنيا
كان نفسى احطلكم صور الفسيخ بتاعى بس انا لسه مبعرفش ارفع صور
انا كده خلصت مش هوصيكو لو الموضوع عجبكو تدعولى بالهدايه وحسن الخاتمه
وربنا يهديلى زوجى واولادى ويرزقنى ببنوتين تلاته انا مش طماعه
واللى مش هتدعى ولا تقيم هعمل فسيخ كتير ووزع عالمدونة كله الا هى
انى احبكم فى الله مواضيع هذا القسم برعاية
زوجه اطيب رجل زوجه اطيب رجل سوبر فتكات Fatakat 891759 القاهره الكبرى – مصر
سبحان الله و بحمده