جيبالكم انهاردة طريقة عمل صينية الرقاق الطري بحشوة مكونات البيتزا
تعالوا شوفوا
أولا نصف كيلو رقاق طري و بتكون عجينته زي السمبوسك ( مورقة )
مش زي الرقاق الناشف
و كمان هنحط بسطرمة و جبن رومي مبشور و جبن شيدر وطماطم مقطعة و لحم مفروم معصج
وفلفل اخضر و بصل مقطع جوانح و زيتون اسود و زعتر ناشف و سمن بلدي و شوربة فراخ
بوصي هي زي البيتزا يعني تشيلي مكون وتضيفي غيره حسب ذوقك
نجيب الرقاق و نقطع حوافة على مقاس الصينية أزاي ؟
تحطي الصينية و هي نظيفة على الرقاق و تقطعي حواليها
و بعدين ندهن الصينية سمن كويس جدا
نجيب أول رقاقة و نحطها في الصينية من غير شوربة علشان متلزقش
تاني رقاقة تبل بالشوربة الدافية في صينية بيتزا مثلا ثم توضع على الاولى في الصينية المدهونة
ثم تدهن بالسمن
ونكمل باقي نصف عدد اوراق الرقاق و غالبا نصف الكيلو بيكون 6 ورقات
يعني ترصي 3 ورقات
ثم تبلي نصف كمية أحرف الرقاق اللي قطعناها في الأول وتضيفيها قبل الشوربة
ثم تضيفي اللحم المفروم
هتقولي لية اللحمة اكتر في نصف عن الآخر ؟ دة علشان لو حد مش بيحب حشوة البيتزا و عايز رقاق عادي باللحم فقط
فهنعمل الصينية نصف و نصف
ثم باقي حشو البتزا جبن وبسطرمة و فلفل وزيتون و بصل و رشة زعتر
ثم تضيفي باقي حواف الرقاق
ثم باقي كمية الرقاق تبليه في الشوربة ثم تضعيه في الصينية ثم تدهن بالسمن
و تغطيها بغطى حلة و تضعي الصينية على النار بس متنسيش تحتها الشياطة و على نار هادئة
و تفضلي تلفي الصينية علشان تحمر كلها من تحت
لو عايزة تنجزي دخليها الفرن بس النتيجة بتكون احلى كتير على النار من فوق
لما بتستوي من تحت تحطي عليها صينية بيتزا اصغر شوية من صينية الرقاق علشان نقلبها بسهولة
بس احترسي علشان متتلسعيش
و هتحتاجي كمان سكينة او ملعقة طويلة علشان تساعدك
و كدة بعد ما قلبناها على صينية البيتزا
وااااااااااااااو على ريحة الزعتر و البسطرمة
و بعدين نعيدها تاني الى الصينية و على النار
و نغطيها و نسيبها تستوي بنفس الطريقة الاولى
بس خدي بالك المرة دي مش هتاخد نفس المدة الاولى يعني هتستوي اسرع و دة علشان الصينية سخنة
و تقطعيها و تقدم مع بطاطس محمرة مرشوشة بالزعتر
وبالهنا والشفا
لو عجبتكم جربوها وقيموها
بالمناسبة شوفتي البطاطس دي عند الخضري ؟
انا أول مرة اشوفها بس بجد طعمها روعة و مقرمشة جدا لو شوفتوها جربوها
مواضيع هذا القسم برعاية
دودو بيبي دودو بيبي 606749_2.gif فتكات متميزة Fatakat 606749 القاهرة – مصر