السلام عليكم يا فتوكات
طبعا انا كنت مبلطة في القسم ده بقالى سنتين والحمد لله اتجوزت من 12 يوم بالظبط
ومعنديش خبرة كبيرة في الجواز اقدر افيدكم بيها .. لاني لسه بقول يا هادى
بس في كام حاجه كده مريت بيها وحبيت افيدكم باللى اتعلمته منها .. لعل وعسى ينفع اى مخطوبة فرحها قرب
نبدأ بالمطبخ اللى بياخد وقت طويل جدا في التجهيز مننا ومخلى بنات كتير تلف حوالين نفسها:
1– الحلل السيراميك اختراع يا كوتش لا تقولى بقى بتحرق الاكل ولا بتشيط ولا مبتسويش ولا الكلام ده خالص انا جربت فالز وبدرينى ونوع اسمه ايديال هوم (لانى كنت مجمعة السيراميك فردانى كده من كل ماركة حلة أو طاسة) و التلاته أحسن من بعض وأحسن من أجدعها حلة تيفال كمان .. وتنضيفه سهل جدا فبجد الطقم السيراميك رغم انه غالى بس مهواش رفاهية لا ده بقى اساسى هاتيه وهاتى جنبه طقم ستانلس وشكرا على كده ووفرى فلوس الالومنيوم والصاج والتيفال لحاجه تانية.
2- الرفايع الكتير بتلخمك ومع الوقت بتكسلى تستخدميها عشان بتقعدى تغسلي فيها وهتستسهلى تستخدمى السكينة او ايديكى في العصر .. انا عارفه ان في اختراعات بتشد انتباهنا وبتخلينا نتهبل، انا جوزى كل ما يفتح درج الرفايع في المطبخ يقعد يسألنى ايه دى ايه ودى وينبهر لما اقوله بس مش كلهم بستخدمهم فهاتي بس بالمعقول والحاجه اللى تكونى مجرباها في بيت مامتك وعارفه انها هتفيدك فعلا.
3- الكبة الكويسة بتكون ايدك ورجلك في المطبخ تعصري طماطم للطبخ تعملى عصير فريش شغاله في كل حاجه وبتغنيكي عن الخلاط وعن الكبة البراون الكبيرة بس هاتيها بحجم معقول بلاش المولينكس الصغيره دى جربتها عند ماما وبتجيب شلل أطفال فماما ربنا يخليهالى جابتلى واحده تركى قد اتنين من المولينكس ومش كبيرة زى البراون فنفعانى وتنضيفها واستخدامها سهلين.
4- وانتىعروسة جديد حاجتك بتكون لسه بزهوتها وعلى قد نضافتك في مطبخك على قد ما الناس بتحترمك وحاجتك بتعمر معاكى .. خديها قاعدة مطبخك وحمامك لو نضاف عمر ما حد هيقول عليكي ست مش نضيفة حتى لو ايدك مش في باقى الشقة اوى لان دول اكتر مكانين معرضين للمياة وبيستخدموا يوميا ومتعبين .. انا جربت لما بروق المطبخ قبل ما انام وجربت لما بسيبه بمواعينه لتانى يوم .. حقيقى انك تبقى نايمه ومطبخك نضيف ده بيدي راحه نفسيه ما بعدها راحة .. تبقى صاحية شايفة الارض نضيفة وناشفه والحوض فاضى تدخلى تفطرى وتطبخى لجوزك بروقان وانتى بتبدعى .. غير لما تصحى وانتى عماله تقولى ياااه لسه هنضف المواعين دى واطبخ وبعدين ارجع اغسل مواعين تانى!!
5- بمناسبة النضافة بقى انا عندى ارضيات المطبخ والحمام سيراميك مط فاتح .. عايزه اقولك المط في ارضيات الحمام والمطبخ بالذات تحفه لانه بينشف بسرعه غير السيراميك اللى فيه لمعه حلنى على ما ينشف خصوصا في الشتا بس عيبه بقى انه فااتح فأقل حاجه بتبان فيه .. فلو لسه بتأسسى شقتك هاتى سيراميك المطبخ والحمام مط غامق وادعيلى.
6- بالنسبة للبس اللانجيري الكتير مالوش تلاتين لازمة خصوصا اللى بالروب هاتى بالمعقول عشان تعرفى تجددى كل فترة والكاشات القطن والبرمودات والهوت شورت عمليين عنه ويتلبسوا في أى وقت .. انا عارفه ان الحاجات دى بتكون جديدة علينا كبنات وكذلك الميكب والبرفانات عشان كده بنكتر منهم بس صدقونى الحاجات دى مالية الأسواق وتتجاب في اى وقت وانتى اصلا كعروسة بتكونى مغرية لجوزك في شهر العسل من غير حاجه .. كترى بس من الهدوم الداخلية القطن وهاتيلك روبين شتوى بينفعوا جدا في ايام السقعة اللى زى دى.
7- متزنقيش نفسك في أيام الفرش خصوصا لو شقتك مش قريبه من شقة مامتك وعددكم قليل انا شقتى بينها وبين بيت بابا حوالى ساعة ونص مواصلات وبدأت افرش في أسبوع الفرح وكان معايا ماما واختى بس وكنت فاكرة انى هخلصها في يومين ولحد قبل الفرح بيومين كنت بفرش فيها فارهاق الفرش مع الطريق الطويل ده رايح جاى يوميا تعبنا كلنا وملكيش دعوه باللى يقولك لازم في آخر اسبوع ولازم معرفش امتى اعملى اللى يريحك ويريح الناس اللى بتفرش معاكي.
8- يوم فرحك ده يوم في العمر مهما حاولتى تعيدي الشريط وترجعى بالزمن مش هتعرفى .. وكل ما هتشوفي شكلك في الصور هيحصل حاجه من اتنين يا هتقولى ده كان أحلى يوم في عمرى يا هتكرهى اليوم اللى اتجوزتى فيه – بعد الشر يعنى – فنصيحة بجد وفرى فلوس في اى حاجه ممكن تستغنى عنها الا الفستان والكوافير اللى هتروحيله في اليوم ده .. انا من اول ما حجزنا القاعة والفستان والكوافير كانوا عاملين لى قلق .. خصوصا انى يوم خطوبتى روحت لكوافيره جنب البيت ومكنتش حلوه خالص فمكنتش عايزه اعيد التجربة المأساوية دى تانى .. فحجزت مع ميكب ارتيست اسمها رانيا السعيد وعندها سنتر قدام حديقة الطفل في مدينة نصر والحمد لله كنت طالعه حلوه جدا ولحد ما روحت البيت الميكب كان زى ما هو لا ساح ولا عرق ولا اى حاجه وهى عسوله وبتاخد رأيك في كل حاجه وتسالك عايزه ميكب تقيل ولا خفيف ولفة الطرحة ازاى وكده.
9- حاولى تخليكي هاديه على قد ما تقدري يوم الفرح وبالك رايق ومتخليش اى حاجه تعكنن عليكي عشان كله بيبان على وشك وهيلزق في الصور وشريط الفرح انا حذرتكم اهو ههههههه .. بقولك كده ليه لانى يوم فرحى اتحطيت في موقف يارب محدش يتحط فيه .. كنت قبل الفرح بشهرين حاجزه مع فوتجرافر فوتوسيشن لمدة ساعة قبل الزفة ومأكدين على بعض المعاد والراجل راح في معاده بالدقيقة واحنا اتأخرنا عليه شوية وكنا المفروض هنتصور في الحديقة الدولية وحظى الجميل بقى ان المغرب كان أذن بسبب تأخيرنا والشمس راحت والنور كمان قطع في الحديقة والمولدات فصلت .. وضاع الحلم الجميل يا ولدى الفوتوسيشن اللى بحلم بيها من يوم ما اتخطبت .. بس قولت الحمد لله وتقبلت الموضوع وجوزى قعد يهدينى ويهزر معايا عشان عارف ان موضوع التصوير ده كان واكل دماغى .. وروحنا استوديو واتصورنا ورميت حكاية الفوتوسيشن دى ورا ضهري والحمد لله .
آخر نقطة بقى: لازم تعرفوا ان الحياة في بيت بابا وانتم بنات قمرات كده حماده والحياة بعد الجواز وشيل المسئولية حمادة تانى خالص .. الموضوع فعلا كبير ومش مسألة اتجوز وخلاص عشان يقولوا دى اتجوزت .. فأحسنى الاختيار عشان مترجعيش تندمى وتقولى ياريت.
لو الموضوع عجبكم قيموه عشان البنات تستفيد منه وادعولى ربنا يخليلى زوجى ويوسع رزقه ويرزقنا بالذرية الصالحة.
ko.0k ko.0k images/avatars/cartoony.gif فتكات ست الكل Fatakat 176398 كايرو – مصر