بسم الله الرحمن الرحيم
السلام عليكم ورحمة الله وبركاته
طبقت يا بنات امبارح طريقة الشيف لطيفه في السمبوسة وطلعت رووووعه وكمان شيلت منها في الفريزر بطريقة الشيف لطيفه برده ربنا يكرمها ويصلح حالها ويديهي كل اللي تتمناه
طبعا انا مكنتش بعملها كنت باكلها من بره تطلع بقي الجبنة حلوة ولا ناشفه ولا قديمة ولا جديده
لحد ما بطلتها خااالص المهم الطريقة دي سهلة ب س من غير القطاعه بتاعة السمبوسة ومش عندي عجانة فبعجن بايدي
مكونات العجينة
2 كوب دقيق _ 1 معلقة كبيرة نشا ذرة_ ربع معلقة صغيرة ملح _ ربع كوب زيت نباتي _ماء للعجن
نحط الدقيق علي النشا والملح ونمزجهم كويس وبعدين نحط الزيت ونفرك الدقيق بايدينا بحيث ان الزيت يتغلغل في كل ذرة من ذرات الدقيق هتديكي شكل زي الرملة المندية انا باخد شوية وبفركهم بايدي الاتنين
بعدين نضيف الماء علي حسب ما تحتاج العجينة انها تلم معاكي تكون طرية بس مش ملزقة وانا مكنش عندي دقيق فاخر لا كان دقيق عادي من عند العطار وبرغم كده اخد ربع كوباية مايه بس مش عارفه ازاي ولمت وبقيت جميلة وده شكلها
عملتها الضهر وحطيتها في باولة ورشيت عليها دقيق وقفلت عليها بكيس نايلون علشان مش تنشف وبدات اشتغل فيها بعد العصر
وكانت هديت وملمسها بقي ناعم وبتمط معايا بس مش بتتقطع
رشيت دقيق علي الرخامة وعلي النشابة وفردتها بالنشابة وخليت سمكها متوسط وبدات اقطعها قطع مدورة
وحشيت كل حتة مدورة بالجبنة البيضة الحادقة المتقطع عليها زيتون وكان عندي جبنة قريش روحت قطعت عليها فلفل حامي صغير اوووي وحشيت بقيت السمبوسة
ولاني مش عندي قطاعه فجيبت الصينية البلاستيك وقفلت السمبوسة علي اطراف الصينية علشان تاخد شكل حلو زي كده
كنت بحطها علي اطراف الصينية وادوس عليها فتاخد شكل الخطوط الصغيرة دي او بالايد كده تديها شكل الصوابع
وعملتهم كلهم وحطيتهم علي الصينية المرشوشة دقيق دي ولما فضل شوية مش قليتهم برده شلتهم في نفس الصينية في الفريزر وبعدين طلعتهم لما جمدوا وحطيتهم بقي فوق بعض في طبق
وبعدين يا بنات حمرتهم مش بياخدوا وقت خااالص علي النار بس مش تقلبي الواحده الا لما تكون نشفت من الناحية التانيه
ودي صورها بعد ما خلصت حطيتها علي المناديل والله ما بتشيل نقطة زيت وحتي الزيت اللي علي المناديل مطرح ما انا بطلع السمبوسة
ودي صورتها بس بعد الفطار لاني مش لحقت اصور الطبق كاامل كان وقت الفطار جيه
ودي من جوا الجبنة سايحه والعجينة طايبه مش معجنه ومن بره مقرمشة وبتعمل صوت وانتي بتاكليها بس للاسف الصور مش حلوة من موبايلي
واكلنا جنبها نجرسكو وبطاطس محمرة وعملت مسقعه لان كان نفسي فيها
بالله عليكم يا بنات عايزة اعرف ازاي احط صور في موضوعي من الموقع نفسه لاني بضطر ادخل موقع تاني انزل منه الصور وبتكون صعبه شوية
يااااااااارب اكون افدتكم والله صورتها علشانكم وعلشان انا حبيتها اووووووووي وطلعت فعلا جميلة اللهم لك الحمد وشكر كبيييييييييييييييييييييير لاختي الشيف لطيفه
مواضيع هذا القسم برعاية
ام انس ورقيية ام انس ورقيية 403027_2.gif سوبر فتكات Fatakat 403027 اسكندرية – مصر