السلام عليكم ورحمة الله وبركاته
مبدئيا بجد انا بشكر كل واحده بتساهم بنصيحه فى القسم ده بالذات لانه نقطه مهمه جدا فى حياة المصريات بدون استثناء وربنا يجازيها كل خير اللى تحاول دايما تفيد بمعلومه جديده فى نظم التخسيس وانقاص الوزن
وبما انى واحده من الناس اللى عملت نظام فى حياتها قدر ينزل وزنى من 85 ل 69
مع انى مبقدرش استغنى عن المشروبات المسكره والنشويات بس اللى عملته بجد تحدى فى حياتى نفسي كل واحده تجربه بنفسها بس امانه بعدها تفيد الناس وتنقل عنى اللى هقوله ده
اقسم بالله اللى هقوله ده جد الجد ومفيهوش اى تجربه منقوله دى تجربتي انا شخصيا
نبدأ بسم الله
فجاة وبدون مقدمات دخلت صيدليه اشترى شويه حاجات ولاقيت الميزان جنبي قلت وليه لا
اقفلكم على الميزان الاقيه طالع يجري على ال100 كيلو وانا كنت هموت لحد ماثبت ولاقيته ثابت عند 85
لميت عليا الصيدليه من الفجعه والله العظيم وخرجت رحت 4 صيدلياات غيرهم وللاسف النتيجه واحده
وفجأة كان القرار … استوووووووووووووووووووووووب
طبعا كل الناس متصورة انى هددخل اكتب نظام اكل وشكرا
لا افتكر اننا محتاجين نصيحه مختلفه والا مكنتش دخلت لان بسم الله ماشاء الله المدونة مليان وصفات ريجيم
بس ببساطه هقول اللى حصل بالظبط
مبدأيا // قعدت اسبوع اكل فراخ مشويه عالغدا وربع رغيف ومنعت تماما الارز والمكرونه وكنت باكل سلطه كتير اوى باى كميه فى اى وقت ونزلت خمسه كيلو على اخر الاسبوع وكنت طايره من الفرح
والفطار :2 بيضه وربع رغيف والعشا زبادى وبعدها بساعه كنت بنام
بس طبعا للناس اللى بتجوع زيي نصيحه ….. بيتك ميخلاش من الكابوتشي ياحبيبتى منك ليها لانه بيشبع جدا ومعدوم السعرات الحراريه
ثانيا // قعدت اكرر ده مفيش فايده بخس نص كيلو واحيان ازيده
وفجأة قررت اغير سلووووووووووووووووكى مش اكلى
بمعنى :
1 / لازم اشرب كل يوم 8 كوبايات مايه
2 / بجري مرتين فى الاسبوع ساعه يعني مش كتير والله العظيم خالص
او تمشي كل يوم ساعه
طبعا انا كنت واقفه عند 80 وفى اخر الاسبوع اللى جربت فيه الايه والجري كنت 76 وكنت عامله فرح وليله لاهل الله على الانجاز العظيم ده
الاسبوع الرابع …. تناااااااااااااحه فى الوزن ومش عاوز ينزل
قلت اعك عكايه واشوف ايه هيحصل
نزلت اشتري اورليستات شريط سعره 30 جنيه
وقررت اكل كل ماحرمت منه فى الاسبوع ده
فوجئت ان البطايه اللى هو انا طبعا كنت باكل الاول قطعتين بشاميل بالاضافه الى اللحمه او الفراخ
انما الصدمه انى مش قادره اكمل حته مكرونة بشاميل لا وايييييييه مفيش جنبها لحمه او فراخ والله ماهتقدرى لان ببساطه جسمك شد ومعدتك صغرت نسبيا عن الاول
بس للامانه الاسبوع ده عكيت فيه جدااااااااااااااااااااا بس كنت باخد اورليستات مع الغدا
وفى اخر الاسبوع لاقيت نفسي 73
فرحه مابعدها فرحه
وقررت ارجع للحرمان تانى والحمد لله نزلت لل69 كيلو مع انى بعك بطريقه غريبه
وانهارده حسيت انى هموت واكل شيكولاته واكلت واحده كامله
بصوا يابنات:
كل كلامى اللى فات ده ملغبط اوى اوى يعني مفيش نظام ثابت
لاااااااااااااااااااااااااازم لااااااااااااااازم جسمنا مياخدش على نظام واحد
كل اسبوع اعملى حاجه جديده فى معدتك احرميها من حاجه واديها حاجه
وبجد بجد بجد حبيب البدانه وعدو الرشاقه والله العظيم العييييييييييييييييش
انا كنت باكل 5 معالق مكرونه وكنت زى الفل بس منعت العيش كله
الغرض من كلامى …..
1 / اشربوا مايه على قد ماتقدروا
2 / متفطريش اى فاكهه ولا حاجه مسكره لانها بتدخل الدم على طول
3 / افضل فطار توست مونجيني مع الجبنه منزوعه الدسم بتشبع والله العظيم وممكن كمان تحطوا عليها شريحه جبنه رومى عاااااااااااااااااااااادى
4 / لازم المشي مش اى رياضه تانيه
5 / لا تحرمى جسمك من الخليه الدهنيه لانها بتمتص الفيتامينات ونقصها هو اللى هيحسسك بالخمول والهمدان
6 / كل اى حاجه بتحبيها بس بعقل وبحدود
7 / جدول السعرات الحراريه لااااااااااااااازم يكون معاكى كل يوم وكل كل حاجه انشاله جاتوه بس المهم خليكي فاكره انك مش هتعدى فى اليوم 1000 سعر حرارى … مع نفسك بقا
________________________________________
انا كده خلصت ويارب الناس تستفيد … ادعولى اخس كمان خمسه كيلو عشان ادخل اوزع شربات فى المدونة واتجوز السنادى
CaR(H)mIn CaR(H)mIn فتكات رائعة Fatakat 332033 القاهره – مصر