التواااازن … كلمه لها بريق بتديني احساس بالراحه والتحكم والنجاح
كتير كنت بشتكي ان الشغل بياخد وقت البيت وبقصر في حق البيت وساعات بهمل في نفسي كتير بحجة ان مفيش وقت وبقيت مشغوله جربت طرق كتير عشان اوفق بين شغلي وبيتي ونفسي وكنت بنفذ يوم ولا اثنين وبعدين ازهق لحد ما لقيت الحل النهائي اللي هيرجع توازنك ويخليكي تنجزي حاجات كتير في وقت اقل وكمان يتفضل لك وقت فراغ وهتكوني مرتاحه نفسيا ومبسوطه وانتي بتقومي بنفس الاعمال اليوميه ……
رغيت كتيييير انا عارفه اصله اكتشاف الحل في الصوره اللي جايه دي
الجدول ده من تصميمي انا بقالي ثلاث اسابيع ماشيه عليه وفرق معايا كتيييييييييير اوي وهنشرح نقطه نقطه فيه
فكرة الجدول تعتمد على اني جمعت معظم جوانب حياتنا اللي تخلي يومنا مليان حاجات مفيده وضروريه وتحسي بالرضا بعد انتهاء اليوم وتقيمي نفسك كمان الجدول مكون من عشرة اعمدة كل عمود عليه عشر درجات بحيث يكون المجموع النهائي 100% وتحت كل بند قوسين العمل اللي يتم انجازه نحط عليه صح ونجمع الدرجات في الاخر ونشوف مدى تقدمنا كل يوم لعبة مسليه جدا ومرنه وهتريحك والمثل بيقول نص العمى ولا العمى كله اهو تبقي عملتي حاجه من كل حاجه فاهمه حاجه ؟ هههههههههه نمسك بند بند ونتكلم عنه شويه
1- الصلاه: كتير كنت بنسى صلاة العشاء بالذات بصراحه فحطيت قدامي الخمس صلوات كل ما اصلي صلاه اعلم قدامها وفي نهاية اليوم ادي نفسي عشره من عشره وبكده مش هنسى ابدا
2- المصروفات: من اسباب تعبي النفسي ان مرتبي بيخلص بسرعه لاني بصرف كتير واتفاجئ اخر الشهر ان الشنطه خاويه على عروشها واروح استلف بقى لكن مع بند المصروفات بقيت بسجل كل حاجه اصرفها حتى لو مواصلات او لو شربت عصير وما شابه عشان اراقب انا صرفت قد ايه وبقيت اتحدى نفسي مصرفش اكتر من 15 جنيه في اليوم وطبعا بتكلم عن مصاريفي الشخصيه الزائده مش حاجات البيت الضروريه وفي نهاية اليوم اقيم مصروفاتي اديها كام من عشره
3- الاكل: وطبعا دي عقدة كل واحده فينا وفي نهاية اليوم نحس بالذنب ونتعب ونقول من بكره هبدا ريجيم وييجي بكره وبرضه نحس بالذنب فعملت بعض الاكلات اللي يحتاجها الجسم وتفيده وكل ما اكل حاجه اعلم عليها في نهاية اليوم بكون شبعت اصلا ولو اكلت حاجه غلط بكتبها تحت عشان هتنقص من درجاتي واقيم نفسي كل اكله بنقطه ولو مكلتش العشره كاملين كمان بدي لنفسي عشره المهم مزودش حاجه غلط
4- الاذكار: وطبعا الجانب الديني مهم لتحقيق التوازن وانتي ممكن تستبدليها باي اوراد بتقوليها لنفسك انا بقول اذكار الصباح والمساء عشان مش انسى اي حاجه منهم ولو بستغفر او اقول حاجه زياده بكتبها تحت واقيم نفسي عليها
5- القران: كتير كنت بكسل اني اقرا كل يوم جزء لكن لما حسيت ان عليه درجات بقيت بشجع نفسي اني اقراه واخصص وقت ليه عشان اخد درجات وحسنات اكيد طبعا واقيم نفسي عليه ده لوحده عليه عشر درجات
6- اعمال الخير: مكانش ينفع انسى في جدول توازني كمان الجانب الروحاني والخيري فحطيت خمس حاجات كل واحده عليها درجتين تخليني اتحمس اساعد الناس وابسط نفسي فبقيت احرص على اني اطلع صدقة يوميه ولو مش هخرج كذا يوم بشيل اللي هتصدق بيه على جنب لحد ما انزل واحرص امي اسعد كل يوم انسان واحد انشالله برساله على الموبايل او اتصال واجري اساعد اي حد محتاج مساعده عشان اخد درجتين وادعي لحد وعملت قايمه بالناس اللي بحبهم ومش بحبهم عشان ادعي للكل واخرى دي حطيتها لاي عمل خير طارئ زي مثلا اني اطعم حيوان في الشارع او العصافير او لي بند تحبوه
7- اهتمام بنفسي: وده طبعا كان الجزء المظلوم في حياتي لكن اكتشفت اني لو كل يوم عملت حاجه بسيطه على نهاية الاسبوع بلاقي نتيجه حلوه ومش هتاخد وقت كتير صنفتهم طبعا عشان يبقى تقييمي سهل واي جزء بهتم بيه بعلم عليه كل واحده ليها درجتين ماعدا الاسنان والايدي بدرجة واحده عشان تبقى النتيجه من عشره ولانهم سهل نهتم بيهم
8- الرياضه: برضه جانب كنت دايما بنساه في حياتي لكن لقيت ان التمارين السويديه البسيطه لما اركزها على جزء من الجسم يعني البطن اقعد اشد فيها العب تمارين تشدها وتقبضها اجري في المكان مثلا لمدة ربع ساعه بس او عشر دقايق زي ما تحبي هتفرق معاكي يوم بعد يوم من غير ما تحسي كل جزء بنقطتين
9- الشغل: وده لاني انا بشتغل فبدون اي حاجه بعملها خاصه بالشغل عشان اشجع نفسي للي مش بتشتغل ممكن تستبدلي البند ده بالاطفال مثلا والاهتمام بيهم وقيمي ادائك في اليوم ده تاخدي كام من عشره واللي بتشتغل وعندها اطفال الاثنين ممكن تحطهم في بند واحد الجدول يتمتع بالمرونه حسب ظروفك انتي
10- اعمال المنزل: وعشان مش اقصر في بيتي كمان حطيت الخمس وظائف الاساسيه اللي كلنا بنعملهم الترتيب او الترويق والمواعين والطبيخ والغسيل وشراء حاجات للبيت على كل عمل من دول ادي نفسك درجتين هتلاقيكي عايزه تشتغلي في البيت اكتر عشان تجمعي نقط اكتر (طمع بعيد عنك ههههههههه)
ملحوظات: الجدول ده مش اجباري تعملي كل حاجه فيه وتجيبي الميه في الميه ولو انك تقدري الجدول معمول عشان تشوفي مدى تقدمك كل يوم اطبعي منه 30 نسخه او اكتبيهم في اجندتك وكل يوم اجمعي النهائي واعرفي جبتي كام في الميه وشوفي نفسك وانتي بتتطوري
لو جبتي مجموع قليل في يوم متزعليش حطيه واتحدي نفسك تجيبي الميه في اليوم التالي وممكن تعمليه تحدي بينك وبين حد قريب منك
البنود انا حطاها لتتوافق مع حياتي انا لو تناسبك امشي عليها لو فيه حاجه مش مناسباكي حطي انتي اللي يناسبك ومفيش داعي تجاملي نفسك في النتيجه انا عارفاكم ههههههههههه محدي هيشوف النتيجة غيرك انتي وبس
لو استمريتي على الجدول ده شهر بس هتحسي بتغير كبيييييييير اوي ومش هتحسي بتعب وضغط هتحسي ان حياتك بقت مرتبه وهاديه ومضبوطه ومتوازنه اكتر … انا جربته اللي تجربه تيجي تحكي المشكلات اللي قابلتها والمميزات اللي جنيتها وغيرت حياتها
وانا مش بحب اقولك قيمي والموضوع يتثبت وعايزه تعليقات كتير انا عايزه الكل يستفيد زي ما انا استفدت ولقيت التوازن في حياتي ولو ربنا قدرله يتثبت يارب يستفيد بيه اكبر عدد ممكن لاني مبسوطه باللي وصلتله
بحبكم في الله يا احلى فتوكات :*
قلب صافي حنون قلب صافي حنون 614082_1.gif فتكات هايلة Fatakat 614082 القاهرة – مصر