السلام عليكم ورحمة الله بركاتة
انا كان عندى الاول مشكلة فى الدايت انى مبحبش السمك ولا التونة ولا الفول وكفاية كدة لتتعقدو منى
المهم جبت رجيم بقى اية فظيع فظيع فوق الفظيع وعملتو تقريبا 3 مرات لانى بجد استسهلتو وبيخسسنى ومش بحرم نفسى من اى حاجة ولا بجوع
بس للامانة كنت كل اسبوع افصل اربع او 5 ايام علشان مزهقشى وسعات اسبوع واسبوع لا والحمد لله خسيت وفاضل على الوزن الى عاوزا اوصلو 6 كيلو
معلشى طولت عليكو ادخلكو بقى فى النظام
اولا بيعتمد على 3 حاجات اساسية …البطاطس فى الغدا ..البطاطس اللى من غير دهون مبتخنشى
بالعكس بتزود نسبة الحرق فى الجسم
ثانيا ان العشا ميكونشى بعد الساعة 8 وياريت متاكليش حاجة بعد الساعة 8 بليل ولو بتسهرى ل 2 او 3 ممكن تملى خضار فاكهه زى متحبى بس مش اكل
ثالثا المشى ولو ربع ساعة ولو زيادة كرم من عندكو نص ساعة
اولا
الفطار ثابت يوميا
كوب شاى او نسكافية بلبن خالى الدسم
+1 كوروسوان او باتية او كورن فليكس مع لبن خالى الدسم
+ ملعقة عسل
(بس انا كنت بالامانة باخد نص ملعقة سكر ) وكنت باكل علطول الباتية
الغداء
اليوم الاول وجبة مفتوحة بس متفتحيش على البحرى ..كلت اى حاجة بس دهون قليلة
اليوم الثانى ربع فرخة مشوية + ربع كيلو بطاطس (ممكن نعمل الفراخ مع البطاطس فى الفرن)+ سلطة
انا بعملها كدة ببصلة وملح وفلفل واسقيها شوربة خفيفة كدة او مية وسبها تتستوى شوية وادخلها الفرن تتحمر وشها علشان
زهقت من اكل البطاطس التقليدى وقولت اغير
اليوم الثالث لحمة + ربع كيلو بطاطس مسلوقة +سلطة
اول اللحمة عملتها ازاى؟؟ ,,قطعت حتة اللحمة مكعبات صغيرة بس مش اوى ..وفصين توم وشوية كمون وملح
وفى حتة سمنة صغيرة اوووى (نفتوتة ) كدة تتشوح فيها بس
وحمرتها لغاية منزلت ميتها وبعدين زودتها مية علشان تستوى وسبتها لغاية متستوى كويس وبعدين
بقى عملت البطاطس صوابع زى بتاعت التحمير واديتها سلقة كدة بس متتهريش برضو ..وصفتها وسبتتها تبرد لغاية ما اللحمة استويت
وجبت شوية بقدونس وقطعتهم ولما اللحمة استوت والمية عملت صوص كدة فى اللحمة مش مية كتير تخليها لما تعمل صوص
رحت حطا عليها البطاطس والبقدونش وقلبتهم بالراحة وسبتهم ربعاية كدة لما البطاطس تشرب الصوص وكلته
اليوم الرابع 2 سيخ شيش طاووق+ربع كيلو بطاطس مسلوقة+سلطة
طبعا زهقت واخترعت برضو فى البطاطس دية عملت اية سلقت البطاطس بس مهرتهاش اوى وقطعتها دواير مش تخينة ولا رفيعة
وفرتها فى صنية ورشيت رشة زيت خفيفة خااااالص على الوش ورشيت رشة زعتر ودخلتها فى الميكرويف او لو الفرن العادى او الكهربا علشان الوش
يتحمر ويديها طعم
اليوم الخامس 2 همبرجر مشوى+ربع كيلو بطاطس مسلوقة+سلطة
هنا سلقت البطاطس وقطعت بقدونس وهرست البطاطس بملح وكمون والبقدونس وكلتهم
اليوم السادس علبة تونة + ربع كيلو بطاطس وممكن ناخد 1 توست
هنا البطاطس مسلقوقة عاوزا تتعملها باى طريقة فى الفرن او بالزعتر او بالبقدونس زى متحبى علشان متزهقيش
اليوم السابع 2 بيضة اومليت+سلطة+ 2 توست مفيش بطاطس
العشاء
زبادى بالفواكة+1توست
انا سعات كنت باكل زبادى وفاكهه
وسعات فى الخباثة كدة لو خرجا اكل فى العشا كيس شبسى بدل التوستا بس مش كتر من مرة
ويفضل بقى علشان لو تخسى اكتر من كدة متكليش حلويات خالص مالص بتاعت اوبالذات البيبسى سواء دايت او غيرو
وان شاء الله بفايدة وانا الحمد لله خسيت 2 كيلو وهكمل على امل انى اخس 6 الباقين
ويالا مين هيقول هيبدا معايا بكرا
وادعولى ربنا يرزقنى بالزوج الصالح عاجلا وليس اجلا انا وكل البنات يارب
M.SH M.SH 222555_7.gif فتكات رائعة Fatakat 222555 CAIRO – egept