اخواتى فى الله حبيت اعمل الموضوع دا يمكن حد يستفيد من تجربتى ويارب ما اكونش ضيفه تقيله عليكم هدخل فى الموضوع على طول
من سنتين و9 شهور ربنا رزقنى ببنتى اول فرحتى وربنا الحمد لله على عطيته اراد انها تتولد وعندها جلوكوما خلقيه وفى مرحله الخطر كمان وبفضل الله عليا رزقنى بدكتوره هى اللى اكتشفتها ساعه الولاده ولفتت نظرنا للموضوع وبعد اسبوع من الولاده بدأت رحله علاج لشهور طويله كانت من اطول ايام حياتى عليا وعملت بنتى خلالها 5 عمليات وبفضل الله وكرمه نسبه الجلوكوما بقت عاديه جدا وهى بتابع مع الدكتوره ودا طبعا هيكون طول عمرها الحمد لله المهم وانا بتابع عند الدكتور لقياس ضغط العين لاقيت امهات كتير مكنوش واخدين بالهم من مرض اولادهم وراحو فى اوقات صعبه جدا وممكن يكون الطفل فقد بصره فى عين وهى مش حاسه عشان كدا حبيت اعرفكم على المرض دا يمكن حد يستفيد منه معلش طولت عليكم تعالو نبدأ :
الجلوكوما الخلقية هى مرض يصيب عين الطفل قبل أو بعد الولادة مباشرة، وينتج عن ارتفاع ضغط العين فى هذه المرحلة المبكرة والتى تكون أنسجة العين فيها شديدة المرونة أن تنمو عين الطفل بصورة غير طبيعية، وفى هذه المرحلة كثيرا ماينخدع الوالدان متصورين أن هذا الحجم الكبير للعينين هو علامة من علامات الجمال، وعندما يزداد تأثير الضغط يبدأ السائل داخل العين فى الإرتشاح داخل القرنية مما يؤدى لتدميع شديد بالعين عند تعرضها للضوء وأيضا على عتامة جزئية أو كلية بالقرنية مما يظهر كلون رمادى أو أزرق فى القرنية وهى الجزء المركزى فى سطح العين من الخارج، ولذلك ينصح د خليل الوالدين بالإهتمام الشديد بعرض الطفل على الطبيب المتخصص إذا ظهرت أحد أو كل الأعراض الآتية
كبر غير طبيعى فى حجم العينين
اختلاف فى الحجم بين العينين اليمنى و اليسرى
تغير فى لون العين إلى اللون الرمادى أو الأزرق الباهت
تدميع العين خصوصا مع التعرض للضوء الساطع
فى وجود أى من هذه الأعراض يجب استشارة طبيب العيون الذى سيحيل الحالة بدوره إن لزم الأمر إلى الإستشارى المتخصص
فى ناس بقى للاسف بتفتكر ان الطفل عينه ملونه او عنده عين وعين زى القطط ومن هنا بيجى الاهمال
وبعد تشخيص الحاله غالباالدكتور بيطلب تدخل جراحى عشان يلحق العصب البصرى من التلف ولا قدر الله فقدان الطفل البصر نهائى
الجراحة
أثبتت جراحات المياه الزرقاء التقليدية نسبة نجاح منخفضة للغاية عند استخدامها للأطفال رغم نسبة نجاحها العالية فى المياه الزرقاء (الجلوكوما، الزرق) عند الكبار، وكذلك الجراحات التى تدعم بحقن مواد مضادة للتليف، فرغم نسبة النجاح العالية فى البداية إلا أنها تعرض العين لحدوث مضاعفات خطيرة بعد عدة سنوات من إجرائها، وللأسف فإن هذه الجراحات هى الأكثر شيوعا فى علاج الأطفال فى الوقت الحاضر لنتائجها الجيدة فى المراحل الأولى.
وعلى مدار السنوات الأخيرة ظهرت النتائج المبشرة فى حالات جلوكوما الأطفال بجراحة شق النسيج الضفيرى التى تعتبر الآن أفضل عملية للمياه الزرقاء الخلقية (الجلوكوما الخلقية)، وقد قام د خليل بفضل الله للقيام ببعض التعديلات عليها والتى قام بوصفها فى عدة كتب ومؤتمرات دولية، والتى أظهرت نتائج بأفضل النسب العلمية بفضل الله، و يتابع حاليا أطفال فى عمر الزهور يسعدون ببصرهم و قد تم إجراء الجراحة المناسبة لهم فى الوقت المناسب بعد الولادة.
ودا اللى خلى بنتى تعمل العمليه اكتر من مره لانهم جربو العمليه التقليديه فى الاول لصغر سنها لان كان عندها 21 يوم وفشلت الحمد لله واضطرت الدكتوره لعمل جراحه شق النسيج وبفضل الله نجحت نيجى بقى لما بعد العمليه
الفحص الدورى مبدئيا بيكون كل اسبوع من العمليه بنقيس ضغط العين وبعد كدا الفتره بتبعد لحد ما تبقى مره كل سنه ولازم يكون الضغط مستقر وفى المعدلات الطبيعيه ودى صوره الفحص
فى الصوره دى البنت كانت صاحيه ودا بيكون حسب ما اتعود الطفل فى المتابعه لان اغلب الاطفال بتاخد منوم اثناء الفحص
انا اسفه لو طولت عليكم بس حبيت اقولكم على تجربتى واى سؤال او اى استفسار انا تحت امركم ولو حابين تعرفو اسماء الدكاتره ومين احسن دكاتره اتعاملت معاهم لبنتى انا تحت امركم
واخيرا لاتنسوا بنتى من دعائكم ان ربنا يكمل شفاها على خير
شهد عمرى و آسر روحى شهد عمرى و آسر روحى images/lettersavatars/D_c.gif سوبر فتكات Fatakat 436844 ارض الله الواسعه – مصر