ازيكو يا احلى امهات مستقبل
احكيلكو حايتى بقا عشان اكيد هيكون فيكو حد بيمر بنفس اللى مريت بيه
انا اتجوزت من سنه ونص تقريبا والحمد لله حياتنا مستقره ومكناش مستعجلين على خلفه وسيبنها زى ما تيجى تيجى .. جيت بعد اربع شهور من الجواز لقيت صدرى كبر وبيوجعنى قلت بس يبقا حمل قامت البيريود جت وخلصت والوجع مارحش ولا الحجم نزل رحت لدكتورة الهانم عصرتلى صدرى ( واكتشفت بعد كده ان ده غلط او بمعنى اصح جهل ) وقالتلى عندك هرمون لبن واديتنى العلاج خلصت العلبه وروحتلها .. ها ايه الاخبار .. الحمد لله الوجع راح والحجم رجع طبيعى .. وده من غير ما تكشف تانى ولا حتى تبص عليا
بس الهانم منها لنفسها راحت كتبالى منشط والحقنه التفجيريه برغم انى مكنتش اساسا محتاجه والتبويض كان كويس ولا طلبت منها بس هو اجتهاد شخصى وماعرفتش انه منشط غير بعديها بفتره ووقتها برضو مكنتش لسه مهتمه بموضوع الحمل
لما لقيت عدى 9 شهور عالجواز ومفيش حاجه قلنا نطمن على نفسنا جوزى عمل تحاليل الحمد لله كويس وانا رحت لدكتور تانى كشف بالسونار المهبلى قالى انتى كويسه هنتابع مع بعض تبويض لمده 3 شهور لو ماحصلش حمل نبقا نشوف حاجه تانيه المهم فى مره من المرات اللى كنت عنده بقوله انا كان جالى هرمون لبن قبل كده مش يمكن لسه موجود … بكل غرور يرد عليا لا لا لا هرمون اللبن ده من الحاجات اللى بتعبر عن نفسها لو موجود كان ظهر على جسمك
كملت السنه ومفيش حمل قالى خلاص نعمل اشعة صبغه … خرجنا من عنده وجوزى حالف ما نرجعله تانى وقالى بدرى اوى عالكلام ده ندور بقا على دكتور استاد حد يكون فاهم مش حافظ
وفعلا رحت لدكتور فى ميدان الجامع اينعم كشفه حراق شويه بس قولنا بجملة المصاريف وبجد بدعيله ربنا يباركله
الراجل كشف بالسونار المهبلى قالى انتى ظاهريا كويسه عملتى تحاليل ايه بقا .. قولتله ما عملتش محدش من اللى رحتلهم طلب منى وحكيتله على موضوع هرمون اللبن قالى طالما ماعملتش تحاليل الدكتوره دى عرفت ازاى لسه بشاور بايدى بمعنى انها عصرت لقيت تعبير على وشه ( هو لسه فى حد كده ) المهم قالى روحى اعملى التحاليل وتعاليلى لما تخلصيها كلها وانتو طبعا عارفينهم البرولاكتين والبروجسترون والال اتش وتي اس اتش واف اس اتش وطبعا لانهم بيتعملو فى ايام مختلفه فقعدت شهر بعمل فيهم وروحتله بعد الشهر طلعت المشكله ان النورمال بتاع اللبن المفروض بين 0 ، 30 وانا كان عندى 36 حمدت ربنا انها جت على قد كده اصلى كنت خايفه اوى انى اضطر اعمل اشعه صبغه … المهم خدت العلاج واستمريت عليه شهر وقالى لو البيريود جاتلك اعملى تحليل لبت تانى لقيتى النسبة لسه عاليه من غير ما تجيلى كررى العلاج واشوفك ان شاء الله على رمضان يا تيجى تقوليلى حامل يا تيجى نشوف المشكله فين
جت البيريود وعملت التحليل ولقيت النسبة بقيت طبيعية جدا الحمدلله وقلت بس يبقا الشهر ده بتاعى وكالعاده ظبطنا المواعيد انا وجوزى والشهر عدا والبيريود جت
جوزى وقتها قالى تعالى بقا نشوف دكتور تانى نتابع معاه تبويض عالاقل وانا كنت متضايقه جدا من موضوع كل شويه عند دكتور وكشف وعلاج وقرف فقلتله لا احنا يعتبر ده اول شهر يعدى وانا كويسه فمفيش مشكله لو ماحصلش حمل نستنى شهر كمان وكده كده كانت دخلة رمضان وقلتله شهر رمضان هيضيع بسبب الصيام فخليها بعد رمضان واتفقنا ان الشهر ده هنقضيه لمزاجنا وبس وهنشيل من دماغنا الخلفه خالص ولا ترتيب مواعيد ولا بتاع …. وظبطت نفسى وجسمى ولا كأنى عروسه وهو حس كأنه عريس من اول وجديد وعشنا شهر رمضان احلى شهر نفسيا من ساعة ما تجوزنا مع العلم ان بسبب ظروف شغلى ووقت الفطار القليل ماتجمعناش مع بعض طول الشهر غير يمكن خمس مرات منهم مرتين بس وقت التبويض
المشكله انى من قبل البيريود اللى كانت قبل رمضان على طول صدرى كان واجعنى جدااااا قلت بس يبقا هرمون اللبن رجع عملت التحليل لقيته فى الطبيعى جت البيريود وجه رمضان والوجع لسه موجود … رحت كشفت لقيت الدكتورة بتقولى عندك كيس عالمبيض هو اللى مسببلك وجع صدرك وملخبط هرموناتك هنستنى لما البيريود تيجى ونشوف لو الكيس ما رحش لوحده يبقا هتاخدى حبوب منع الحمل تنشفه وتمنع ظهور اى كيس تانى
بينى وبين نفسى ضحكت وقلت يعنى اطلع من حفره اقع فى دوحديره وعشان الوجع يخف يبقا اخد اللى يمنع الحمل !!!! طب استحمل الوجع وامرى لله … بس مين قال انى ممكن احمل والوجع هيفضل موجود …. رميت حملى على ربنا وقلت اللى ربنا رايده هيكون يمكن الكيس ينزل لوحده مع البيريود اللى جايه زى ما قالت
ويعدى رمضان وانا مستنيه البيريود تيجى قبل العيد بيومين … ماجتش …. قلت عاااااااادى جدا مش اول مره تتأخر ده انا مره اتأخرت 10 ايام … جه العيد والهانم مش عاوزه تيجى … مع ان وجعها موجود الضهر والبطن والركب … واكمن ملهاش ميعاد ثابت يعنى بتيجى بمتوسط 30 يوم تزيد يومين تقل يومين فمش قادره اقول انها اتاخرت … وعماله احس بالوجع … قلت يمكن ده من اعراض الكيس
تالت يوم العيد ما قدرتش استحمل وبرغم انها كانت بتتأخر عن كده وبرغم انى لسه ما وصلتش لمرحله ان اى حاجة تبان يعنى كان عدى 36 يوم بس على البيريود الاخيره قررت اجيب تحليل حمل منزلى وجبت اتنين عشان كنت متأكده ان الاولانى مش هتظهر فيه نتيجه فلو لقيتها اتأخرت يومين كمان ابقا اعمل التحليل التانى وكنت جايبه التحليل ب 2.5 لانى متأكده ان مفيش حاجه
والاقى المفاجأه ……………… التحليل يظهر فيه شريطين …………….. اكيد فى حاجه غلط ……………….. جريت على ورقة التحليل اللى بتوضح طريقة الاستخدام مع انى كنت رميتها (مش فى دماغى بقا ) لقيت ان ده معناه انى حاااااااااااااااااااااااااامل
سجدت عالارض وانا مش مصدقه وبدعى ربنا انه ما يكونش حلم وما رضتش اقول لجوزى عشان ماعشموش لان فى دماغى اكيد فى حاجة غلط
نزلت تانى يوم جبت تحليل اغلى شويه قلت يمكن المشكله فى التحليل لقيت نفس النتيجه اتصلت بجوزى جه على ملى وشه … فى ايه …… انا حاااااااااااااامل …. ما ردش ولا فتح بقه غير بعد خمس دقايق قومى هنعمل تحليل دم دلوقتى وبلاش تعشمى نفسك بحاجة عشان ما نتعبش وكل اللي يجيبه ربنا كويس ….. جرينا على المعمل واستنينا النتيجه …. مبرووووووك يا مدام
مبرووووك !!!! انا بيتقالى مبروك !!!!!! قد ايه كان نفسى اسمعها !!!قد ايه دخلت على فتكات وكنت بقرا قصص البنات اللى حملت بعد فتره عشان اهدا واقول لنفسى كله بأوانه …….. قد ايه كنت بتعب لما الاقى واحده بتشتكى انها قعدت بالسنين وادعيلها واخاف اوصل للمرحله دى لحد ما بطلت ادخل الموقع خالص وقلت المره الجايه اللى هدخله هيبقا وانا بكتب واقول انا حامل
ارمو حملكو على ربنا يا بنات وما تحطوش الحمل فى دماغكو وعيشو احلى ايامكو مع اجوازكم بلاش تنكدو على نفسكم وعليهم
وعن تجربة داومو فى الصلاه فى التحيات الاخيره قبل ما تسلمو على دعاء " اللهم لا تدرنى فردا وانت خير الوارثين ، اللهم هب لى من لدنك درية صالحة انك سميع الدعاء " والله دعاء سيدنا زكريا ده انا قولته شهرين بس وربنا مأخرش الاستجابة الحمد لله
nahola17 nahola17 فتكات نشيطة Fatakat 549480 على وشك أكون فى بيت جوزى – مصر